Azərbaycan torpaqlarındakı rəsmən sülhməramlı kontingentin tərkibindəki Rusiya hərbçiləri ilk dəfə olaraq Qarabağda Rusiya Federasiyasının Dövlət Bayrağı Gününün təntənəli qeyd olunmasında iştirak ediblər. Bu barədə Rusiya Müdafiə Nazirliyinin mətbuat xidməti məlumat yayıb.
Rusiya hərbi kontingentinin baş qərargahının yerləşdiyi Xocalı hava limanı ərazisində keçirilən tədbir Rusiya Federasiyası himninin sədaları altında Rusiya Dövlət Bayrağının qaldırılması ilə başlanıb. Uzunluğu 50 metr, eni 5 metr olan bayrağı onun Moskvada hazırlanıb Qarabağa gətirilməsini təşkil etmiş “Biz birik” ümumrusiya forumunun rəhbəri, erməni mənşəli Armen Karenoviç Gülnazarov təqdim edərək, Rusiya hərbçilərini təbrik edib. Rusiya sülhməramlı birləşməsinin komandan müavini, general-mayor Oleq Yeqorov şəxsi heyətə müraciətində bunları deyib:
"22 avqustda ölkəmizin Dövlət Bayrağı Gününü qeyd edirik. Bu bayram Vətəninə sadiq olan, öz ölkəsinin, xalqının tarixinə dəyər verən bütün insanları bir araya gətirmək və birləşdirmək üçün tanınır. Bu münasibətlə Qarabağa “Biz birik" cəmiyyətinin könüllüləri ilə birlikdə Rusiya Federasiyasından Rusiyanın 50 metr uzunluğu, 5 metr eni olan bayrağı gətirilib "
Görünən budur ki, Rusiya sülhməramlıları Azərbaycan üçün olduqca həssas nöqtə olan Xocalıda belə addım atmaqla bizi daha da qıcıqlandırmağa çalışırlar. Qeyd edək ki, Xocalı hava limanının fəaliyyətinə Azərbaycan icazə verməyib. Ən maraqlısı isə budur ki, sülhməramlılar bu addımı Azərbaycanın Füzulidəki Beynəlxalq Hava Limanında yoxlama uçuşlarına başladığı gün atıblar. Rusiya sülhməramlılarının bu addımını necə qiymətləndirmək olar?
Ana Vətən Partiyasının sədr müavini Arzuman Abdulkərimov “Bakı-Xəbər”ə bildirdi ki, Rusiya sülhməramlılarının yerləşdiyi ərazilərdə, onların hərəkət etdiyi avtomobillərdə bayraqlarının olması normaldır: “Məsələyə başqa bir aspektdən yanaşanda, ortaya maraqlı suallar çıxır. İlin-günün bu vaxtında, Qarabağda hər an gərginliyin yaşandığı zamanda buna ehtiyac varmi? Rusiya sülhməramlıları bu addımı bayraq gününün olması ilə izah edirlər. Belə təqvimdə hərbi hissələrdə bayraq günü qeyd edilə bilər. Bunu erməni mənşəli bir adamın təşkil etməsi isə məsələyə bir qədər siyasi rəng vermiş olur. Qeyd edim ki, son vaxtlar Rusiya sülhməramlılarının ermənilərə dəstək olan addımları barədə mütəmadi məlumatlar verilir. Onların öz reputasiyasını düzəltmək əvəzinə, bir erməninin gətirdiyi bayrağı Xocalı kimi həssas yerdə qaldırmaqları bizdə, təbiidir ki, haqlı narazılıq yaradır. Sülhməramlıların yol verdiyi provokasiyalar, Rusiya Müdafiə Nazirliyinin öz rəsmi saytında yerləşdirdiyi materialarda “Artsax müdafiə ordusu” kimi ifadələr işlətməsi həmin kontingentin öz missiyası ilə lazımi şəkildə məşğul olmadığına bir işarədir. Əldə olunan razılaşmaya əsasən, sülhməramlılar bütün erməni silahlılarını bölgədən çıxarmalıydı. Biz bunu görmürük. Əksinə, bizim maraqlarımıza zidd addımların sülhməramlılar tərəfindən dəstəkləndiyinin şahidi oluruq. Azərbaycan təcili şəkildə öz ərazisində antiterror əməliyyatlarına başlamalıdır. Rusiya sülhməramlıları öz öhdəliklərini yerinə yetirmirsə, biz bunu edə bilərik. Cənab Prezident son müsahibələrdən birində Ermənistanı Rusiyanın müttəfiqi, Azərbaycanı isə onun qonşusu kimi təqdim edir. Rusiyanın belə addımları bu qiymətin verilməsini zəruri edir. Bütün bunlardan Moskva ciddi nəticə çıxarmalıdır. Bilməlidir ki, bu cür sülhməramlı missiyanın sonu heç də yaxşı nəticə verməyə bilər. Onlar müqavilədə göstərilən müddətdə Qarabağda qalmaq istəyirlərsə, mütləq üzərlərinə götürdükləri öhdəliklərə əməl etməlidirlər”.
Məhəmmədəli QƏRİBLİ
