Rusiya Xarici işlər nazirinin sözçüsü Mariya Zaxarova Estoniyada “meşə qardaşları”na abidə qoyulmasını tənqid edib. Onun sözlərinə görə, Estoniya Qırmızı Ordu əsgərlərinə deyil, onları cəzalandıranlara hörmət etməyə davam edir.
Rusiya XİN rəsmisi Estoniyada Böyük Vətən müharibəsinin başlamasının 80-ci ildönümündə “əllərini dirsəklərinə qədər insan qanına bulaşdırmış” antisovet millətçilərinə hörmət etməyə davam etdiklərini deyib. Onun fikrincə, “meşə qardaşları” tarixə döyüşçü kimi deyil, “adi qatillər, yəni günahsız dinc sakinlərə gizli şəkildə divan tutmaq” adı ilə düşüblər. Zaxarova bunun son bir ildə millətçilərin ikinci abidəsi olduğunu da əlavə edib.
Eyni zamanda, Zaxarova xatırladıb ki, təkcə rəsmi məlumatlara görə, Estoniyadakı "meşə qardaşları" 500-ə yaxın mülki şəxsin həyatından məsuldur.
Qeyd edək ki, “meşə qardaşları”nın əsas fəaliyyət dövrü İkinci Dünya müharibəsi və sonrakı illərə təsadüf edir. Onlar tək Estoniyada deyil, digər Baltikyanı ölkələrdə - Latviya və Litvada da fəal olublar. Bəziləri 20-ci SS diviziyasının üzvü olub. Buna baxmayaraq, Estoniyada "meşə qardaşları" milli qəhrəman hesab olunur.
Maraqlıdır, Estoniyada “meşə qardaşları”nın adının əbədiləşdirilməsinə sərt və geniş yazı ilə reaksiya verən Zaxarova, görəsən, 2016-cı ildə Ermənistanın paytaxtında faşist Qaregin Njdeyə abidə qoyulanda niyə belə reaksiya vermədi?
“Bu onu göstərir ki, Rusiya xarici siyasətdə qonşulara münasibətdə səmimi siyasət yeritmir”
Məsələyə münasibət bildirən AVCİYA-nın vitse-prezidenti, professor Məhərrəm Zülfüqarlının sözlərinə görə, bu, Rusiyanın səmimi olmamasından irəli gəlir: “Rusiyanın postsovet ölkələrində siyasəti fərqlidir. NATO-ya inteqrasiya olunmuş Baltikyanı ölkələrə münasibət düşmənçilik səviyyəsindədir. Artıq Ukraynaya da eyni münasibət sərgilənir. Ancaq maraqlıdır ki, Ermənistanda bir dənə rus məktəbi olmadığı halda, faşist Njdeyə heykəl ucaldıldığı halda, biz Zaxarovanın bənzər münasibətini görmürük. Nədənsə, Zaxarova bu barədə danışmır. Faşistlərlə əməkdaşlıq edən ermənilər əsirlərə, dinc insanlara daha çox divan tutub. Prezident İlham Əliyev MDB-nin tədbirlərində Njdeyə heykəl qoyulmasının doğru olmadığını dəfələrlə qaldırıb. Ancaq Rusiya gərəkən tədbirləri görmədi. Bu onu göstərir ki, Rusiya xarici siyasətdə qonşulara münasibətdə səmimi siyasət yeritmir. Yəni məsələyə özünün imperialist maraqlarından yanaşır. Başqa bir tərəfdən, 1939-cu ildə imzalanan Molotov-Ribbentrop müqaviləsinə görə, Qərbi Ukrayna, Qərbi Belarus və Pribaltika ölkələri SSRİ tərəfindən işğal olunub. Bu müqavilə, bir növ, faşistlərlə kommunist Stalin rejiminin dost olduğunu göstərir. Zaxarova həm də yaxşı olardı ki, Molotov-Ribbentrop müqaviləsinə də nəzər yetirsin. Özlərini elə göstərirlər ki, sanki bunların heç bir günahı olmayıb. Ona görə də bu cür reaksiya verərkən onların səmimi olmadığı ortaya çıxır”.
Professor hesab edir ki, ədalətli yanaşma olmadıqca, Rusiyanın tənqidləri ciddi qarşılanmayacaq.
Vidadi ORDAHALLI
