Ermənistan və erməni xalqına artıq heç nə kömək edə bilməyəcək. Belə bir açıqlama ilə erməni siyasi şərhçi Tevos Arşakyan çıxış edib. O hesab edir ki, Ermənistan indi Azərbaycana daha böyük fərqlə uduzmağa başlayıb.
Ekspert, istənilən halda, Azərbaycanın Ermənistandan istədiyini alacağını vurğulayır. O hesab edir ki, İrəvan Bakı qarşısında bütün mühüm parametrlər, o cümlədən insan potensialı baxımından sürətlə zəifləyir: "Hazırda Ermənistan cəmiyyətində ailə qurmaq, hətta dünyaya uşaq gətirmək istəyən gənclər yoxdur. Bizim hakimiyyət isə 3 uşağa görə 100 dollar vədi verir. Bu gülməlidir. Ümumiyyətlə, indi bizim gəncləri nə nikah, nə ailə, nə də uşaq düşündürür. Onları düşündürən əsas məsələ tezliklə Ermənistandan qaçıb getməkdir. Son 4 ay ərzində tanıdığım onlarla ailə Ermənistanı tərk edib. Cavan oğlanlar və qızlar... Azərbaycanla sərhəddə olan bütöv kəndlərimiz boşalıb. Oranın sakinləri qaçıb Rusiyaya gediblər. Gənc ermənilər Rusiyada öz ailələrini quracaqlar. Ermənistanda iş və yaşayış üçün heç bir perspektiv yoxdur. Gənclər buradan başlarını götürüb qaçırlar. Hökumət isə yaxın illər üçün Ermənistanda demoqrafik vəziyyətin yaxşılaşdırılması strategiyasından danışır. Bu absurddur". O, həmçinin, Azərbaycanla həmsərhəd erməni kəndlərinin praktiki olaraq boş qaldığına dair sübutlar da təqdim edir: "Hamı evlərini qoyub çıxıb gedir. İnsanlar istəmirlər ki, oğulları müharibədə həlak olsun. Bu kəndlərin sakinləri bizdən çox şey bilirlər və onlar başa düşürlər ki, bütün bu ərazilər Azərbaycan tərəfinə veriləcək". Erməni tarixçi Armen Ayvazyan isə hesab edir ki, bu halda Ermənistanın Azərbaycanla sərhədi sərhəd deyil, cəbhədir: “Bundan başqa, Azərbaycan Prezidenti İlham Əliyev açıq şəkildə yaxın gələcəkdə Zəngəzuru və Göyçəni, sonra isə İrəvanı da ələ keçirməyi vəd edir. Lakin bütün bunlar Ermənistan hökuməti üçün hər hansı əhəmiyyətə malik deyil. Kim görüb ki, cəbhəyə yüngül silahlanmış və az sayda olan sərhəd qüvvələri nəzarət etsin?”.
Ermənistan parlamentinin keçmiş deputatı Arman Abovyan da Ermənistanın Azərbaycana müqavimət göstərmək iqtidarında olmadığını qeyd edir: “İlk növbədə ona görə ki, vəziyyəti qeyri-adekvat qiymətləndirən, müharibənin fəlakətli nəticələrinə baxmayaraq Ermənistanı tam hərbi, diplomatik və iqtisadi tənəzzülə aparmağa davam edən hökumətə sahibik”. Abovyan qeyd edib ki, illər ərzində davamlı olaraq Ermənistan cəmiyyətində nifrət toxumları hərtərəfli şəkildə əkilib, sonunda bu, ermənilərin “vahid milli ocağının” sürünərək məhvinə gətirib çıxarıb: “Bir ildə hakimiyyət Ermənistanın əsas dövlətlərarası yollarına nəzarəti rəqibə verəcək, Türkiyə ilə sərhədi açacaq və türk kapitalı Ermənistana axaraq, Ermənistan iqtisadiyyatının qalıqlarını əlinə alacaq”. Abovyan qeyd edib ki, demarkasiya və sərhədlərin açılması pərdəsi altında Ermənistanın mərhələli parçalanması hazırlanır: “Bu hakimiyyət çirkli kapitulyasiya sənədini imzalayanda türklərə uduzmadıq. Biz, guya ermənilərin bir qismi yüngülləşərək nəfəs aldıqda məğlub olduq, guya nəhayət Qarabağdan qurtulduq. Biz əsgər valideynləri oğullarının Qarabağdan Ermənistana qaytarılmasını tələb edəndə məğlub olduq”. O hesab edir ki, sərhəd məsələsində Azərbaycan tezliklə istəyinə çatacaq. Qeyd edək ki, bu günlərdə Ermənistanın Dilican vilayətinin qubernatoru Ayk Qalumyan Azərbaycanla həmsərhəd rayonlardan əhalinin təxliyyəsi ilə bağlı planın yeni redaksiyasının hazırlanması barədə sərəncam imzalayıb. Sənəddə bu rayonlar yaşayış üçün təhlükəli adlandırılıb. Sənədə görə, əhalinin həmsərhəd zonadan 10 kilometr aralıya, ölkənin iç bölgəsinə təxliyəsi nəzərdə tutulur. Sənədə edilən əlavə və dəyişikliklərdə Dilican rayonunun Azərbaycanla həmsərhəd kəndlərindən təxliyə edilərək köçürüləcək erməni sakinlərin sayı, onların yaş bölgüsü, tibbi dəstək qüvvələrinin hesablanması, yenidən yerləşdirilmə məkanları, müvəqqəti ərzaq təminatı, geyim, alt paltarı və ayaqqabılar verilməsi, Dilican bölgəsinin əhalisinin siyahıyaalınması, bu şəxslərin qəbul məntəqələrinin yaradılması, sonradan Dilicanda müvəqqəti və ya daimi yaşayış yerlərinin müəyyənləşdirilməsi kimi məqamlar qeyd olunub.
Politoloq Qabil Hüseynli isə qeyd edir ki, Ermənistandakı isterikaya rəğmən, Azərbaycan sülh tərəfdarıdır və bölgədə sülhün bərqərar olması üçün əlindən gələni edir: “Ermənistan tərəfi sülh müqaviləsinin bağlanması üçün lazım olan şərtləri yerinə yetirmir. Sərhəddə gərginlik yaradaraq demarkasiya və delimitasiya işlərinin gedişatına mane olur. Ümumiyyətlə, son zamanlar Ermənistan sərhəddə ciddi insidentlər yaradır. Bunun tək bir səbəbi var - bölgədə yeni bir münaqişə ocağı yaratmaq və sülhün təmin olunmasının qarşısını almaq. Azərbaycan dövləti sülh danışıqları üçün çalışır, ancaq Ermənistan hakimiyyəti müxtəlif təxribatlar törədərək buna mane olur”. Q.Hüseynli vurğulayıb ki, Ermənistan tərəfi Qarabağla bağlı xülyalarından əl çəkməlidir: “Ermənistanın Qarabağla bağlı qaldırdığı iddialar əsassızdır. Həmin iddialara Fransa və Rusiya kimi dövlətlərdən də dəstək verilir. Azərbaycan tərəfi müharibədən qalib çıxmış bir ölkə kimi öz mövqeyini bildirib. Ermənistan tərəfi bəzi mənasız təkliflər irəli sürərək danışıqlar prosesini pozmağa çalışır. Azərbaycan ordusu 44 günlük Vətən müharibəsində öz ərazi bütövlüyünü bərpa edib. Ermənilər nə qədər təxribatlar törətsə də, ordumuz onların layiqli cavabını verir. Ermənistan hakimiyyəti işğalçı siyasətinə son qoyarsa, mehriban qonşuluq münasibətlərinin perspektivlərini müzakirə etmək olar”.
Samirə SƏFƏROVA
