Məlum olduğu kimi, avqustun 20-25-də Füzuli Beynəlxalq Hava Limanında müntəzəm reyslərin yerinə yetirilməsi məqsədilə radiotexniki vasitələrin hazırlığının yoxlanılması üçün xüsusi hava gəmisi ilə uçuşlar həyata keçirilməsinə başlanıb. Yoxlama ATR 42-500 biznes sinif təyyarəsinə quraşdırılmış “Aerodata AD-FIS-112” uçuş müfəttişliyinin tam avtomatlaşdırılmış kompleksinin tətbiqi ilə gündəlik olaraq həyata keçirilir.
Qeyd edək ki, AFIS (Aero Flight Inspection System) hava limanlarında enmə vasitələrinin və yerüstü radionaviqasiya sistemlərinin yoxlanılması üçün istifadə olunan müasir tam avtomatik uçuş nəzarət sistemidir. Hava limanının təməli isə yanvarın 14-də Prezident İlham Əliyevin iştirakı ilə bu il qoyulub. Bu hava limanının əsas məqsədi xarici qonaqların azad edilmiş ərazilərə, o cümlədən Şuşaya gəlişini təmin etməkdir. Hava limanı ilə bərabər, gələn ay hazır olacaq Füzuli-Şuşa yolunun uzunluğu təxminən 100 kilometrdir. Bu fonda Azərbaycanın mədəniyyət paytaxtına daha tez çatmaq üçün əvvəlcə Füzuli Beynəlxalq Hava Limanına enmək, oradan isə birinci dərəcəli yolla Şuşaya getmək mümkün olacaq. Bu amil Şuşaya, Azərbaycanla bərabər, ölkə xaricindən də gəlişi asanlaşdırmaqla həm daxili, həm də xarici turizm üçün vacibdir. Füzulidə beynəlxalq hava limanının inşası, təkcə Şuşanın deyil, ümumiyyətlə həmin bölgənin nəqliyyat infrastrukturunun şaxələndirilməsi deməkdir. Bölgənin iqtisadi potensialının bir hissəsinin turizmlə bağlı olmasını nəzərə alanda bu, sonrakı dövrdə turizm üçün əlverişli nəqliyyat növüdür. Bütün hallarda Füzuli Beynəlxalq Hava Limanı nəqliyyat infrastrukturunun şaxələndirilməsinə imkan verməklə təkcə həmin bölgənin deyil, ümumilikdə ölkənin iqtisadi inkişafına öz töhfəsini vermək iqtidarındadır. Hava limanının bu ərazidə olması, turizmdən başqa, bölgənin sənaye və kənd təsərrüfatı sektorunun inkişafına da müsbət təsir göstərəcək. Hava limanı bu ərazilərdə müasir istehsal sahələrinin qurulması üçün xaricdən avadanlıqların gətirilməsi, eyni zamanda, istehsal olunacaq malların uzaq xarici bazarlara ixracının təşkili məsələlərini də aktuallaşdırır. Elə Milli Məclisin deputatı Vüqar Bayramov da məsələyə məhz bu prizmadan yanaşır. Onun sözlərinə görə, Füzuli Beynəlxalq Hava Limanı həmin ərazilərdə istehsal olunacaq sənaye məhsullarının dünya bazarına çıxarılması və bütövlükdə regionun ixrac imkanlarının genişləndirilməsi baxımından vacibdir.
Deputat qeyd edib ki, eniş-uçuş zolağı artıq hazır olan Füzuli Beynəlxalq Hava Limanında ilk sınaq uçuşu həyata keçirilib: “Hava limanında müntəzəm reyslərin yerinə yetirilməsi məqsədilə radiotexniki vasitələrin hazırlığının yoxlanılması üçün xüsusi hava gəmisi ilə həyata keçirilən uçuşlar avqustun 20-də başlayıb. Füzuli aeroportu regionda ən qısa zamanda inşa edilən beynəlxalq hava limanlarından biridir. Bu ilin əvvəlində inşasına başlanan hava limanında artıq gələn ay ilk uçuşları həyata keçirmək mümkün olacaq. Cəmi 4 aya yaxın müddətdə hava limanının ilkin infrastrukturunu əsaslı şəkildə formalaşdırmaq mümkün olub. Hava limanının uzunluğu 3 kilometr, eni 60 metr olan uçuş enmə zolağı, 60 min kvadratmetrlik 8 hava gəmisinin dayanması üçün sahə, sərnişinlərə xidmət göstərəcək terminal, hava gəmilərinin idarəedilməsi üçün qüllə, transformator yarımstansiyası, qazanxana, su anbarı və başqa köməkçi tikililərdən ibarət olacaq. Hava limanı 1 saatda 200 sərnişinə xidmət edə biləcək. Füzuli hava limanı işğaldan azad edilmiş ərazilərimizə xarici turistlərin gəlməsi baxımından olduqca faydalıdır və yeni imkanlar yaradacaq. Qarabağın incisi hesab olunan və Azərbaycanın mədəniyyət paytaxtı Şuşa şəhərinə gəlmək istəyən xarici turistlərin sayı kifayət qədər çoxdur. Füzulidə hava limanının tikilməsi imkan verəcək ki, həmin turistlər daha sərfəli və qısa yolla, praktik olaraq birbaşa işğaldan azad olunan ərazilərimizə səfər edə bilsinlər. Eyni zamanda, hava limanı yükdaşımalar, xüsusən də beynəlxalq yükdaşımalar üçün vacib əhəmiyyət kəsb edir. İşğaldan azad edilmiş ərazilərimizin sənaye potensialını nəzərə alsaq, Füzulidə açılacaq hava limanı həm də həmin yerlərdə istehsal olunacaq sənaye məhsullarının dünya bazarına çıxarılması və bütövlükdə regionun ixrac imkanlarının genişləndirilməsi baxımından vacibdir”.
Digər ekspertlər qeyd edir ki, bu hal həm də Azərbaycanın gücünü Qarabağda qalan ermənilərə və Ermənistana açıq nümayiş etdirir. Təbii ki, bu da Azərbaycanın himayəsinə sığınmağın Qarabağ erməniləri üçün də nə dərəcədə faydalı olacağını göstərir. Onu da qeyd edək ki, bu il aprelin 26-da Prezident İlham Əliyev Zəngilan rayonunda beynəlxalq hava limanının təməlini qoyub. Zəngilan beynəlxalq hava limanı ağır yük təyyarələrini də qəbul edə biləcək. O, işğaldan azad edilmiş ərazilərdə inşa edilən ikinci beynəlxalq hava limanıdır. Zəngilanda aeroportun tikilməsi sadəcə turizmin inkişafına xidmət etməyəcək, eyni zamanda beynəlxalq əhəmiyyətli logistika mərkəzinə çevriləcək. Laçın ərazisində isə üçüncü aeroport tikiləcək və onun da təməli bu günlərdə qoyulub. Laçın aeroportu Azərbaycanın dəniz səviyyəsindən ən hündürdə yerləşən aeroportu olacaq. Bu aeroport təkcə Laçın üçün yox, həm də Kəlbəcər və Şuşa rayonu ərazisinə hava nəqliyyatı ilə gediş-gəlişi asanlaşdıracaq. Ekspertlərin fikrincə, bu aeroportlar turizm imkanlarından istifadəyə və logistik mərkəzlərin yaradılmasına hesablanıb.
Nahid SALAYEV
