Son günlər Ermənistan tərəfi bir növ Qarabağda hücum cəbhəsini genişləndirir. Məsələ ondadır ki, əvvəl Şuşa şəhəri ətrafında atəşkəsi pozurdularsa, indi bunun miqyasını bir az da genişləndiriblər. Söhbət ondan gedir ki, son günlər artıq Ağdam, Xocalı və Xocavənd istiqamətində təxribatlar törədilir. Yəni adıçəkilən rayonlar istiqamətində atəşkəs pozulur. Halbuki, orada Rusiya sülhməramlıları yerləşir.
Atəşkəsin sözügedən rayonlarda pozulmasının məhz Rusiya prezidenti Vladimir Putinin fransalı həmkarı Emmanuel Makronla telefon danışığından sonra baş verməsi də maraqlı məqamdır. Yeri gəlmişkən qeyd edək ki, avqustun 19-da Rusiya və Fransa prezidentlərinin telefon danışığı olub. Tərəflər bir sıra məsələləri müzakirə ediblər. Makronun xahişilə Vladimir Putin Dağlıq Qarabağla bağlı 10 noyabr 2020-ci il və 11 yanvar 2021-ci il üçtərəfli bəyanatların həyata keçirilməsinin gedişi barədə məlumat verib. Regionda vəziyyətin bütövlükdə sabit olduğu vurğulanıb, Cənubi Qafqazda iqtisadi və nəqliyyat əlaqələrinin bərpası və əhalinin humanitar ehtiyaclarının təmin edilməsi istiqamətində addımlar atıldığı bildirilib. Dağlıq Qarabağ nizamlanmasının müxtəlif aspektləri üzrə, ilk növbədə ATƏT-in Minsk Qrupunda gələcək birgə işlə bağlı qarşılıqlı əhval-ruhiyyə ifadə olunub. Həmçinin, Makron Putindən sonra Paşinyanla danışıb. Məhz bütün bunlardan sonra təxribatların miqyası genişləndi. O baxımdan bütün bunlar təsadüfdürmü?
“Rusiya və Fransa prezidentlərinin telefon danışıqlarında məhz status məsələsini gündəmə gətirməsi...”
Sözügedən məsələni “Bakı-Xəbər”ə şərh edən politoloq Məhəmməd Əsədullazadə bütün bunların təsadüf olmadığını bildirdi: “Ermənistanın sərhəddə atəşkəsi mütəmadi pozması, həmçinin Qarabağda Rusiya sülhməramlı qüvvələrinin yerləşdiyi ərazidə erməni silahlılarının bütün istiqamətlərdə bölmələrimizi atəşə tutması təsadüf deyil. Bütün bunların arxasında duran əsas məqsəd münaqişənin bitmədiyini göstərməkdir. Rusiya və Fransa prezidentlərinin telefon danışıqlarında məhz status məsələsini gündəmə gətirməsi situasiyanı gərginləşdirmək məqsədi güdür. Ona görə də Kremldən verilən təlimatlar fonunda Ermənistan silahlı qüvvələrinin bölmələri Qarabağda bu kimi təxribatlara gedir. Təbii ki, Azərbaycan çevik şəkildə bu kimi təxribatlarin qarşısını alır. Əsas istəkləri odur ki, gərginlik qalsın. Rusiya və Fransa çalışır ki, vəziyyət mürəkkəbləşsin. 10 noyabr razılaşmasından irəli gələn öhdəliklərin yerinə yetirilməməsi onu göstərir ki, Rusiyanın vasitəci və qarant ölkə kimi missiyası fiaskoya ugrayib. Ona görə də artıq sülhməramlı kimi də fəaliyyətləri sülhə təhdid olaraq görünür. Hesab edirəm ki, Rusiya və Fransanin bu təşəbbüsləri müsbət nəticə verməyəcək. Azərbaycan əldə olunan razılaşmaların həyata keçirilməsi üçün kifayət qədər təzyiq ricaqlarina malikdir. Düşünürəm ki, proseslər Azərbaycanın maraqlarına uyğun olaraq həyata keçəcək”.
Politoloq bunu Azərbaycanın güclü tərəf olması ilə əlaqələndirdi.
Vidadi ORDAHALLI
