“Azərbaycanda hazırda kifayət qədər vaksin dozası var”. Bu barədə səhiyyə nazirinin birinci müavini Teymur Musayev mətbuata açıqlamasında deyib.
T.Musayev qeyd edib ki, ölkə başçısının təşəbbüsü ilə bir neçə dövlətə yüz minlərlə peyvənd pay verilib: “Bu da bizim humanist dövlət olmağımızı bir daha sübut edir. Bəzi ölkələrdə peyvəndlər ancaq öz vətəndaşlarına vurulur. Lakin bizim ölkədə bir çox diplomatik nümayəndələr, Azərbaycanda yaşamaq icazəsi olan xarici vətəndaşlar, təhsil almağa gələnlər peyvənd edilir”.
Qeyd etdiyimiz kimi, ölkə başçısının göstərişi ilə bir neçə dövlətə yüz minlərlə peyvənd pay verilib. Məlumat üçün bildirək ki, dünyada bütün vaksinlərin 75 faizini cəmi 10 dövlət alıb. Bu 10 dövlət digər ölkələrin vəziyyətini düşünmədən vaksinlərin 75 faizinə sahib olub. Ancaq Azərbaycan dövləti əhalinin tələbatı qədər vaksin alıb, üstəlik, başqa ölkələrə də yardım edir. Azərbaycan vaksin sarıdan da humanistlik göstərir.
“Zəngin ölkələr kasıb ölkələrə vaksin almaqda yardım etmək istəmirlər, belə çıxır ki…”
Həkim ekspert Pərvanə Mustafayeva bildirdi ki, pandemiyanın ilk günlərindən Azərbaycanda COVID-19-un əhaliyə mənfi təsirinin minimuma endirilməsi və vəziyyətin nəzarətdə saxlanılması ilə bağlı praktiki tədbirlər həyata keçirilib: “Qısa zaman ərzində 13 modul tipli və 1 daimi xəstəxana inşa edilib. Ölkədə COVID-19 xəstələrinin müalicəsi üçün müəyyən edilmiş xəstəxana çarpayılarının sayı yetərincədir. Azərbaycan həm də pandemiya dövründə də ümumbəşəri dəyərlərə sadiq qalan və humanitar təşəbbüslərlə çıxış edən ölkədir. Azərbaycan bəzi ölkələr tərəfindən ehtiyaclarından bir neçə dəfə artıq peyvənd əldə edilməsini və inkişaf etməkdə olan ölkələri öz əhalisini qorumaq imkanından məhrum etmələrini ictimai şəkildə pisləyib. Prezident İlham Əliyev Ümumdünya Səhiyyə Assambleyasının 2021-ci il 31 may tarixində keçirilmiş 74-cü sessiyasında çıxışında “peyvənd millətçiliyi”, inkişaf etmiş və inkişaf etməkdə olan ölkələr arasında peyvəndlərə çıxışla bağlı getdikcə dərinləşən qeyri-bərabərliklə bağlı narahatlığını dilə gətirmişdi. Beynəlxalq hesabatlara əsasən, bugünə qədər dünyada mövcud olan peyvənd dozalarının 70 faizdən çoxu zəngin ölkələr tərəfindən alınıb, peyvəndlərin yalnız 0,3 faizi azgəlirli ölkələrin payına düşüb. Ancaq pandemiyaya qalib gəlmək üçün qlobal həmrəylik strateji əhəmiyyət kəsb edir. Azərbaycan pandemiyanın öhdəsindən gəlmək üçün həmişə güclü qlobal həmrəyliyin nümayiş etdirilməsinin əhəmiyyətini təbliğ edib. Elə bunun göstəricisidir ki, Azərbaycan dövləti bir neçə ölkəyə yüz minlərlə vaksin pay edib”.
Həmsöhbətimiz onu da əlavə etdi ki, koronavirusla mübarizə məqsədilə bir neçə fərqli vaksin hazırlanıb. Bu vaksinlər koronavirusla mübarizəfə effektiv sayılır: “Son zamanlar dünyada maraqlı proses yaşanır. Belə ki, Avropadan gətirilən peyvəndlər imkanlı ölkələr üçün nəzərdə tutulur. Zəngin ölkələr kasıb ölkələrə vaksin almaqda yardım etmək istəmirlər. Belə çıxır ki, pulu olmayan ölkə vaksin ala bilməyəcək və o ölkələrin əhalisinin taleyi sual altında qalacaq. Halbuki, Prezident İlham Əliyev təklif etmişdi ki, zəngin ölkələr bu məsələ ilə bağlı kasıb ölkələrə yardım etsinlər. Belə olardısa, koronavirus infeksiyası qısa zamanda yox olacaqdı”.
Günel CƏLİLOVA
