Ermənistanın Dilican (Tavuş) vilayətinin qubernatoru Hayk Qalumyan Azərbaycanla həmsərhəd rayonlardan əhalinin təxliyəsi ilə bağlı planın yeni redaksiyasının hazırlanması barədə sərəncam imzalayıb.
Erməni mediasının yaydığı məlumata görə, sənəddə bu rayonlar “yaşayış üçün təhlükəli” adlandırılıb. Sənədə görə, əhalinin həmsərhəd zonadan 10 kilometr aralıya, ölkənin iç bölgəsinə təxliyəsi nəzərdə tutulur. Bəhs edilən sənəd avqustun 19-da imzalanıb.
Bununla yanaşı, sənədə edilən əlavə və dəyişikliklərdə Dilican rayonunun Azərbaycanla həmsərhəd kəndlərindən təxliyə edilərək köçürüləcək erməni sakinlərin sayı, onların yaş bölgüsü, tibbi dəstək qüvvələrinin hesablanması, yenidən yerləşdirilmə məkanları, müvəqqəti ərzaq təminatı, geyim, alt paltarı və ayaqqabılar verilməsi, Dilican bölgəsinin əhalisinin hesablanması, habelə bu şəxslərin qəbul məntəqələrinin yaradılması, sonradan Dilicanda müvəqqəti və ya daimi yaşayış yerlərinin müəyyənləşdirilməsi kimi məqamlar qeyd olunub.
Maraqlıdır, indiki dövrdə Ermənistan bununla dünyaya nə mesaj vermək istəyir? Bu, yeni müharibəyə hazırlıq məqsədi güdür, yoxsa dünyada “ay aman, qoymayın, Azərbaycan bizi öldürəcək” görüntüsü yaratmaq?
“Sanki elə bir ab-hava yaradırlar ki, Azərbaycan həmin istiqamətdə hücum əməliyyatlarına başlayacaq”
Sözügedən məsələyə aydınlıq gətirən hərbi ekspert Ramil Məmmədli hesab edir ki, Ermənistan bununla çalışır Azərbaycan barədə aqressor rəyi formalaşdırsın: “Əvvəla, Ermənistan ordusunu ordumuz elə məhv edib ki, onların yenidən müharibə aparmaq imkanı yoxdur. Buna böyük zaman və resurs lazımdır. Bu da qarşı tərəfdə yoxdur. Ermənilərin bu cür görüntü yaratmalarının əsas səbəbi Azərbaycanın aqressor olmasını dünyaya göstərməkdir. Hər vasitə ilə çalışırlar ki, beynəlxalq ictimaiyyətdə bununla bağlı saxta rəy yaratsınlar. Məsələ ondadır ki, 10 noyabrdan sonra Ermənistan bütün vasitələrdən istifadə edərək çalışır münaqişənin bitmədiyi görüntüsünü yaratsın. Gərginliyin qaldığını sübüt etmək üçün bir sıra təxribatçı fəaliyyətlərlə məşğuldular. Bütün bunlarda məqsəd regionda gərginliyi saxlamaqla bağlıdır. Tavuşla bağlı yayılan informasiyanın məqsədi də buna xidmət edir. Sanki elə bir ab-hava yaradırlar ki, Azərbaycan həmin istiqamətdə hücum əməliyyatlarına başlayacaq. Məqsəd ancaq bundan ibarətdir. Ümumiyyətlə, Ermənistan tərəfinin bu gün regionda həyata keçirdiyi siyasət münaqişənin bitmədiyini nümayiş etdirmək və bununla da Azərbaycanı təcəvüzkar tərəf kimi təqdim etməkdir”.
Hərbi ekspert onu da qeyd etdi ki, Azərbaycan Ermənistanın bu kimi informasiya təxribatına adekvat cavab verməlidir.
Vidadi ORDAHALLI
