Ermənistan Təhlükəsizlik Şurasının katibi Armen Qriqoryan Qarabağ münaqişəsinin hələ də həll edilmədiyini zənn edir. Hətta bu xüsusda o, köhnə ab-havadan əl çəkmədiklərini büruzə verərək, yenə ATƏT-in Minsk Qrupu həmsədrlərinin himayəsi altında danışıqlar formatına qayıtmağın vacibliyini bildirir:
“Ermənistana Azərbaycandan sülh müqaviləsi imzalamaq üçün heç bir təklif gəlməyib. İlham Əliyev dəfələrlə İrəvanın müqavilənin imzalanması ilə bağlı təkliflərə məhəl qoymadığını bildirib. Amma bizim dəqiq mövqeyimiz var – sülh müqaviləsi yalnız Dağlıq Qarabağ münaqişəsinin hərtərəfli həllindən sonra imzalana bilər. Bu isə yalnız ATƏT-in Minsk Qrupunun həmsədrləri formatında mümkündür”.
Sülh müqaviləsi ilə bağlı Ermənistan rəsmisinin ifadə etdiyi fikirləri nə dərəcə əsaslı saymaq olar?
Politoloq Elşən Mustafayev “Bakı-Xəbər”ə bildirdi ki, Ermənistan rəsmiləri yenə öz adətlərinə uyğun mövqe nümayiş etdirirlər: “ Erməni xislətində yalan, şantaj hər zaman öndə olub. Armen Qriqoryanın danışıqlarında bunun bir daha şahidi oluruq. Deyir ki, sülh sazişini onlar istəyir, biz məhəl qoymuruq. Ağ yalandır. Prezident İlham Əliyev dəfələrlə deyib ki, Azərbaycan Ermənistanla sülh müqaviləsi imzalamağa hazırdır. Hətta Prezident bildirdi ki, Ermənistandan buna rəsmi reaksiya verilməyib. Ölkə başçısı onu da bildirdi ki, qeyri-rəsmi kanallarla əldə etdiyi məlumata əsasən, Ermənistan müqavilə imzalamağa hazır deyil. Ermənistan rəsmisinin mövqeyindən bir daha göründü ki, onlar sülh müqavilıəsini şərtlər altında imzalamağa hazır olduqlarını bəyan edirlər. Həmin şərtlər də budur ki, Azərbaycan əvvəlki danışıqlar formatına qayıtsın. Minsk Qrupunun patronajlığı ilə ermənilərə Qarabağda statusun verilməsi ətrafında müzakirələrə start verilsin. Təbiidir ki, Azərbaycan belə təklifi heç yaxına buraxmır. Çünki biz hesab edirik ki, məsələ həll olunduğu səbəbindən Ermənistan və Azərbaycan arasında sülh müqaviləsi olmalıdır. Bir-birinin ərazi bütövlüyünün tanınması, sərhədlərin müəyyənləşməsi olmalıdır, delimitasiya işlərinə start verilməlidir. Azərbaycanın rəsmi mövqeyi budur ki, Ermənistan-Azərbaycan Dağlıq Qarabağ münaqişəsi öz həllini tapıb. Dırnaqarası “Dağlıq Qarabağ”ın statusundan söhbət gedirsə, dəfələrlə bildirilib ki, Azərbaycan ərazisində “Dağlıq Qarabağ” adlı ərazi vahidi yoxdur. Prezidentin imzaladığı fərmanla Qarabağ iqtisadi zonası yaradıldı. Bütün Qarabağa aid olan rayonlar orada birləşib. Vəziyyət bundan ibarətdir ki, Azərbaycanın sülh çağırışlarına Ermənistanda hələ ki, rəsmi cavab yoxdur. Ermənistanın isə mövqeyi bir daha ifadə edildi ki, rəsmi Bakı Dağlıq Qarabağın statusunu tanıdığı təqdirdə belə bir sülh razılaşması imzalana bilər. Bir daha təsdiqlənir ki, sülh müqaviləsinin imzalanmasını sabotaj edən tərəf məhz Ermənistandır”.
Politoloqun sözlərinə görə, Ermənistan bununla yalnız özünə problem yaratmış olur: “Çünki bu sazişi yubatmaqla yenə də regionda təcrid olunmuş vəziyyətdə qalacaq. İqtisadiyyatının inkişafı üçün əlinə düşən fürsətdən istifadə edə bilməyəcək. Onlar bilməlidirlər ki, irəli sürdükləri şərti Azərbaycan çoxdan kənara tullayıb”.
Məhəmmədəli QƏRİBLİ
