Ermənistan mənşəli Gürcüstan vətəndaşları Azərbaycana qarşı növbəti təxribat törədiblər. Borjomi Bələdiyyəsinin Tabatskuri kəndində İkinci Qarabağ müharibəsi zamanı öldürülmüş erməni işğalçılarının xatirəsinə həsr olunmuş bir xaçkarın açılışı olub.
Bu barədə Azərbaycan mətbuatı erməni KİV-nə istinadən məlumat yayıb. Məlumatlara görə, xaçkar hazırda Ermənistanda yaşayan Tabatskuri kəndinin vətəndaşı Edqar Papikyanın vəsaiti hesabına quraşdırılıb. Papikyan özü deyib ki, xaçkar “Qarabağdakı son müharibə qurbanlarına həsr edilib”.
“Orada ölən igid gənclərin xatirəsinə həsr edilir. Müharibə zamanı Tabatskuridən kömək gedirdi. Müharibədə yaralanan bir kəndçimizə isə hər ay maddi cəhətdən kömək edirik. Bu günü kəndimizin günü kimi qeyd edəcəyik və hər il bu gün kəndimizə toplanacağıq” - deyə o bildirib.
Qeyd edək ki, bundan əvvəl 2019-cu ilin yanvarında Axalkalaki bölgəsinin Buxaşeni kəndində Qarabağ müharibəsi iştirakçısı, Xocalı faciəsi qurbanlarının cəlladlarından biri olan Mixail Avaqyanın bərpa edilmiş büstünün açılışı olmuşdu. Mətbuatın yazdığına görə, bu abidə 1997-ci ildən bəri köhnə, qəzalı məktəbin həyətində açılmışdı.
Heç şübhəsiz, bu məsələyə həmin dövrdə Azərbaycan tərəfindən sərt reaksiya verildi, mətbuatımızda bunu pisləyən, tənqid edən məqalələr dərc edildi. Özü də həmin bədnam büstün açılışı Azərbaycanda milli matəm gününə - 20 yanvar tarixinə təsadüf edirdi... Həmin dövrdə də Gürcüstan höküməti səssiz qaldı, indi də sükutu davam etdirir.
Gürcüstan hökümətinin ermənilərə əl-qol açmaq üçün geniş meydan verməsi təəssüf doğurur, hər halda, bu ölkənin Azərbaycandakı səfiri nəhayət ki, bu məsələyə aydınlıq gətirməlidir. Bu gün Gürcüstanda bir nəfər də olsun azərbaycanlı qəhrəmanın heykəlinin, büstünün olmadığı bir dövrdə dalbadal erməni separatçılarına xatirə abidəsi qoyulması heç cür müsbət qarşılana bilməz. Tarixə baxsaq, azərbaycanlılar Gürcüstan dövlətçiliyi üçün can verib, öz tarixi vətənləri uğrunda son damla qanlarına qədər vuruşublar, ermənilər isə xəyanət yolu tutublar. Amma bu xəyanətkarlara, separatçılara “dayan, dur” deyən yoxdur.
Gürcüstan höküməti ermənilərin özbaşnalığına, Azərbaycana qarşı təxribatlarına niyə səssiz qalır?
“...Bu da cəzasızlığı görən erməni təxribatçılarının mütəmadi şəkildə daxili sabitliyi pozmasına şərait yaradır”
“Borçalı” İctimai Birliyinin sədr müavini Dəyanət Osmanlı “Bakı-Xəbər”ə bildirdi ki, ermənilər hər zaman təxribatlarını davam etdirir. Təşkilatın sədr müavininin sözlərinə görə, ermənilər Gürcüstanın daxilində Azərbaycana qarşı təxribat törətməklə iki ölkə arasında mövcud olan əməkdaşlıq, tərəfdaşlıq, dostluq münasibətlərini hədəfə alıb. “İkinci Qarabağ müharibəsində biabırcasına məğlub olan Ermənistan dövləti və erməni millətçiləri bütün dünyada təxribatları, aqressiyaları daha da gücləndirib. Azərbaycana qarşı təxribat və işğalçılıq niyyətləri dövlət siyasətinin tərkib hissəsi olan ermənilər bu kampaniyanı hər yerdə açıq surətdə aparırlar. O cümlədən Gürcüstanda da bu cür təxribat əməlləri baş verib və bu gün də davam edir. Nəzərə alsaq ki, Gürcüstanda da erməni lobbisinin və diversant qruplarının təsirləri həmişə olub, o zaman bu cür hadisələrin törədilməsi gözləniləndir. Onların qonşu ölkədə belə bir xaçkarın açılışını etməsi özlərinin əzabkeş, əzilmiş obrazına yeni rəng verməklə yanaşı, Gürcüstan hökumətinin də onlarla həmfikir olduğunu bəyan etmək deməkdir. Ermənistan Qarabağı işğal etmişdi, insanlarımızı vəhşicəsinə qırmış, ərazilərimizi söküb talamışdı, haqlı cəzasını da aldı. Gürcüstan hökumətinin belə bir təxribatçı açılışa izn verməsi, əlbəttə ki, başadüşülən deyil və ölkələrimiz arasındakı dostluq və starateji əməkdaşlıq prinsiplərinə ziddir. O da məlumdur ki, Gürcüstanda yuxarı rəsmi dairələrdə, regional icra orqanlarında millətçi ermənilər çoxdur. Onların bu cür təxribatları törətməkdə məqsədi, şübhəsiz, yerli azərbaycanlılarla gürcülər arasında nifaq salmaq, münasibətləri gərginlikdə saxlamaqdır. Bundan əvvəl də erməni əli ilə bu ölkənin soydaşlarımız yaşayan bölgələrində iğtişaşlar törədilib. Təəssüflər olsun ki, Gürcüstan hökuməti də bunları bilə-bilə vəziyyəti tam nəzarətə almır və bu da cəzasızlığı görən erməni təxribatçılarının mütəmadi şəkildə daxili sabitliyi pozmasına şərait yaradır”-deyə D.Osmanlı vurğuladı.
D.Osmanlı onu da qeyd etdi ki, Gürcüstan höküməti bu təxribatların qarşısını almaq istiqamətində hərəkətə keçməlidir, əks halda erməni separatçıları vəziyyəti gərginlşdirmək üçün əllərindən gələni edəcəklər.
İradə SARIYEVA
