26/10/2020 03:10
728 x 90

Çavuşoğlunun bütün türkdilli ölkələrə Azərbaycan çağırışı - çağırışın aid olduğu konkret ölkələr var...

Akif Nağı: “İndiki məqamda türk ölkələrinin aydın mövqe ortaya qoymaları lazımdır”

img

Türkiyənin Xarici işlər naziri Mövlud Çavuşoğlu çıxışı zamanı bütün türkdilli ölkələri  Azərbaycanın haqq işinə dəstək verməyə çağırıb: “Güclünün yanında yox, məzlumların yanında bir Türkiyə var. Gücümüzü ata yurdumuz Mərkəzi Asiyadan bu günə qədər qoruduğumuz ədalət, mərhəmət kimi ortaq dəyərlərimizdən alırıq”.

 

Türkiyə XİN başçısı qeyd edib ki, Azərbaycan torpaqlarının 20 faizi təxminən 30 ilə yaxındır Ermənistan tərəfindən işğal edilib: “Ermənistan silahlı qüvvələri işğal altında olmayan Azərbaycan torpaqlarına da hücum edir. Ermənistanın bu hərəkətləri müharibə cinayətidir. Təəssüflər olsun ki, bəzi ölkələr Ermənistanın hücumlarına səssiz qalır. Haqlı ilə haqsızı eyni səviyyədə tuturlar. BMT Təhlükəsizlik Şurasının qətnamələri və ATƏT-in müvafiq qərarlarını heçə sayırlar. Türkiyə haqlı mübarizəsində hər zaman Azərbaycanın yanında olub və bundan sonra da Azərbaycanın yanında olmağa davam edəcəyik. Qardaş ölkələr olaraq Azərbaycanla həmrəy olmağımız böyük əhəmiyyət daşıyır. Çətin zamanlarda qardaş ölkələr olaraq bir-birimizə dəstək verməliyik”. Qeyd edək ki, M. Çavuşoğlu tədbirə videokonfrans formatında qatılıb.

 

Çavuşoğlunun bu çağırışına türkdilli ölkələr  necə reaksiya verməlidir?

Qarabağ Azadlıq Təşkilatının rəhbəri Akif Nağı qəzetimizə açıqlamasında bildirdi ki, hazırda bir sıra ölkələrin müxtəlif alyanslarda birləşməsi, inteqrasiyası gedir: “Bəzi ölkələr ehtiyat edirlər ki,   türk dövlətləri bir yerə toplaşıb Turan ideyasını həyata keçirə bilər. 100 il bundan əvvəl  pantürkizm ideyası ortadaydı və buna görə də bir çox böyük ölkələr ciddi əndişə keçirirdi.  Hazırda bir turançılıq hərakatı var. 100 il bundan qabaqkı mövqedən fərqli olaraq, vahid bir dövlətin yaranmasından söhbət getmir. Söhbət türk ölkələrinin inteqrasiyasından, əməkdaşlığından gedir.  İndiyə qədər bu modelə türkdilli ölkələr deyirdilər, bir müddət əvvəl Qazaxıstanın sabiq prezidenti Nazarbayev belə bir ifadə işlətdi ki, türkdilli yox, türk ölkələri deyilməlidir. Bu o deməkdir ki, ölkələr bütün sahələr üzrə inteqrasiyadan məmnundurlar. Artıq zaman yetişib ki, bu ölkələr həm də hərbi sahədə inteqrasiya olunsunlar. Cavuşoğlunun da müraciəti bununla bağlıdır ki, ölkələr daha ciddi platformalarda bir araya gəlsinlər. Dünyada müxtəlif alyanslar var. Məsələn, Avropa ölkələri Avropa Birliyini yaradıblar. Rusiya başqa bir  qurum yaradıb. Niyə türk ölkələrinin belə bir birliyi olmasın? Belə birlik heç kimə təhdid törətməyəcək, yalnız özünü müdafiə edəcək.  Hesab edirəm ki, bunun artıq konturları görsənir.  Belə söhbət var ki, bu ölkələrin vahid ordusu da formalaşdırılacaq. Çox güman ki, Cavuşoğlu prosesi bir az da sürətləndirmək üçün bu cür açıqlamalar verir. Ancaq indiki məqamda türk ölkələrinin aydın mövqe ortaya qoymaları lazımdır. Çünki  dost dar gündə öz dəstəyini ifadə etməlidir. Azərbaycanın işi haqdır. Bizə dəstək vermək üçün kimsə özünü risqə atmır. Mənə elə gəlir ki, türk ölkələri bu istiqamətdə fəallığı daha da artıracaqlar”.

Qeyd edək ki, Çavuşoğlunun bu müraciətindən sonra Özbəkistan Azərbaycana tam dəstək verdiyini bəyan edib.

Məhəmmədəli QƏRİBLİ

Son xəbərlər