Azərbayacanın hərbi sahədə qazandığı uğurlar bəzi ölkələri və təsisatları fəallaşdırıb. Xüsusilə də Rusiya rəsmiləri çıxışlarında münaqişəni yalnız dinc yolla nizama salmağın mümkünlüyünü dilə gətirirlər.
Onlar açıqlamalarında hərbi yolu tam istisna edirlər. Rusiyanın Xarici işlər naziri Sergey Lavrov müsahibəsində deyib ki, Dağlıq Qarabağ münaqişəsinin həlli yalnız siyasi yolla mümkündür. Onun sözlərinə görə, həmsədrlərin işləyib hazırladıqları təkliflər masa üzərində qalır və təkliflərin tərkibi məlumdur. Rusiya XİN başçısı qeyd edib ki, hazırkı vəziyyət siyasi prosesi aktivləşdirməyə kömək etməlidir. Maraqlıdır ki, Ermənistan təbliğatı Azərbaycanın müharibə ritorikası seçməsində Türkiyəni günahlandırır. Hətta bəzi rus telekanallarında belə fikirlər səslənir ki, yalnız Türkiyə sülh yolunu məqbul saymır. Qeyd edək ki, qardaş Türkiyə münaqişə başlayandan bizim haqq işimizi dəstəkləyib. Ankara hesab edir ki, 30 illik nizamlama prosesində Minsk Qrupu üzərinə düşəni etməyib, indi də Azərbaycanın öz torpaqlarını hərbi yolla azad etmək kimi haqqı var. Azərbaycan Prezidenti də çıxışında hərb yolunu seçməyimizin tamamilə doğruluğunu əsaslandırıb: “Biz nəyi nə vaxt edəcəyimizi yaxşı bilirik. Ona görə də bu gün bizim uğurlu əməliyyatımız böyük nəticələrə gətirib çıxardı. Nəyi necə, nə vaxt etmək lazımdır, bunu mən bilirəm. Azərbaycan xalqı mənə inanır. Mən də bu inama arxalanaraq bütün lazımi tədbirləri görürəm, ölkəmizi inamla idarə edirəm, bütün sahələrdə, o cümlədən hərbi quruculuq sahəsində. Bir məsələyə də toxunmaq istəyirəm. Azərbaycan xalqı da bunu vasitəçilərdən, bəzi beynəlxalq təşkilatların rəhbərlərindən dəfələrlə eşidib ki, bu münaqişənin hərbi həlli yoxdur. Mən isə demişdim ki, bu tezislə razı deyiləm və mən haqlı çıxdım, mən! Otuz ilə yaxındır danışıqlar aparılır. Bir məsələ yerindən tərpəndi? Bir santimetr torpaq bizə danışıqlar yolu ilə verildi? Təcavüzkarı məcbur etdilərmi ki, bizim torpağımızdan çıxsın, BMT Təhlükəsizik Şurasının qətnamələrini yerinə yetirsin? Yox. Bəs bu məsələ indi necə həll olunur? Bu, hərbi yol deyilmi? Məhz hərbi yolla bu məsələ həll olunur. Hərbi, ondan sonra siyasi. Bu əməliyyat olmasaydı, biz təcavüzkara lazımi zərbələr endirməsəydik, onların dərsini verməsəydik, indi o qaçardımı Moskvaya danışıqlar aparmaq üçün?! Oturacaqdı özündən razı, deyəcəkdi ki, torpaqları vermirik. Biz məcbur etdik onları…”
Azərbaycan və Türkiyənin hərbi həll yolunun mümkünsüzlüyü ilə bağlı Lavrovun arqumentlərini əsassız edən yanaşmasını necə dəyərləndirmək olar?
Politoloq Elşən Mustafayev “Bakı-Xəbər”ə açıqlamasında bildirdi ki, Lavrovun yanaşması tamamilə yanlışdır: “Azərbaycanın hərb yolunu seçməsi və qardaş Türkiyənin bu məsələdə bizi birmənalı olaraq dəstəkləməsi heç də o anlama gəlmir ki, biz yalnız müharibə tərəfdarıyıq. Sülhə bizdən çox sadiq qalan ölkə olmadı. Biz haqlı ola-ola səbr etdik. Ancaq vasitəçilər prosesin dondurulmuş vəziyyətdə qalmasında maraqlı oldular. Dəfələrlə bəyan edirdik ki, lazım gəlsə biz torpaqlarımızı hərbi yolla azad edəcəyik. Sanki buna inanmırdılar. Bizə başqa çıxış yolu qoymadılar. Hətta bir neçə gündür davam edən əməliyyatlar belə əks-hücumla başlayıb. Ermənistan işğal etdiyi ilə də qane olmurdu. Bizə yeni-yeni ərazi iddiaları irəli sürürdü. İndi bütün bunların cavabını hərb meydanında verir. Azərbaycan tam qanuni əsaslarla öz ərazisini terrorçulardan və başqa ölkənin qoşunlarından təmizləyir. Rusiya münaqişənin belə alovlanmasını istəmirdisə, niyə öz imkanlarından istifadə edib Ermənistana təzyiq göstərmirdi? Gördünüz ki, biz Rusiyanın son atəşkəs təşəbbüsünə də müsbət cavab verdik. Amma əldə olunan humanitar atəşkəsi Ermənistan çox vəhşicəsinə pozdu. Gəncəyə raket atıb dinc sakinlərimizi qətlə yetirdi. Niyə Lavrov ünvanlı olaraq Ermənistanın sülhə təhdid yaratdığını bəyan etmədi? Bütün bunlar onu deməyə əsas verir ki, Lavrovun münaqişənin yalnız sülh yolu ilə nizama salınması ilə bağlı iddiaları yersizdir. Ermənistanın sülhün əldə olunması üçün yenə də şansı var. Buyursun, işğal altında olan rayonlarımızı azad etsin, onda sülh olacaq. Bunu etmirsə, deməli, yeganə həll yolu hərbdir”.
Türkiyə və Azərbaycan Ermənistanın arzulamadığı variantı məqbul sayırsa, burada heç bir qəbahət görülə bilməz.
Məhəmmədəli QƏRİBLİ
