20/10/2020 12:33
728 x 90

Ermənistanın dinc şəhərlərimizə qarşı kütləvi qırğın silahları tətbiqi Rusiya mediasında – “Rusiyanı da pis vəziyyətdə qoymusunuz”…

Vüqar Rəhimzadə: “Belə bir dövlətin Rusiya ilə müttəfiqlik münasibətlərinə malik olması bu ölkəyə utanc gətirir”

img

Ermənistandakı elita dərin böhran içərisindədir, keçmiş hakimiyyətin bəzi nümayəndələri Paşinyan hökumətini devirmək üzrə planlar hazırlayırlar. Bu barədə Rusiya KİV-i yazır.

 

Sözügedən məsələ ilə bağlı Rusiya mətbuatı yazır ki, bu günlərdə erməni millətçiliyi son 100 ilin ən böyük zərbəsini alır: “Ermənistan rəhbərliyi reallıq hissini o qədər itirib ki, artıq kütləvi terrora əl atmağa başlayıb. Oktyabrın 10-da Gəncədə dinc sakinlərin gecə raket atəşinə tutulması bəşəriyyətə qarşı əsl cinayətdir. İnsanlar üçün bu aqressiya gözlənilməz oldu, çünki bu şəhər Qarabağdan uzaqda yerləşir və burada heç vaxt atışma olmayıb”.

 

Bundan başqa, qeyd olunur ki, İrəvan məsuliyyətdən yayına bilməyəcəyini başa düşdüyü üçün çaşqınlıq içindədir: “Artıq Moskvada başa düşməyə başlayırlar ki, müttəfiq seçimində düzgün addım atmayıblar. Şəhərlərin kütləvi qırğın silahları ilə vurulması Kremli pis vəziyyətdə qoyur. Moskva da bu cür silahların nəinki ağlını, hətta vicdanını və ləyaqətini itirmiş siyasətçilərin idarə etdiyi ölkəyə gəlməsindən narahatdır”.

Görünən odur ki, Ermənistanın ballistik raketlərdən dinc insanlara qarşı kütləvi qırğın məqsədilə istifadə etməsi Rusiya mətbuatında da hiddətlə qarşılanır. Eyni zamanda, Paşinyan hakimiyyəti bu cinayəti ilə Kreml rəhbərliyini pis vəziyyətdə qoyur. Məsələ ondadır ki, Ermənistan Rusiya ilə müttəfiqlik əlaqələrinə malikdir. Rusiyanın əsas rol oynadığı Avrasiya İqtisadi İttifaqında və Kollektiv Təhlükəsizlik Müqaviləsi Təşkilatında təmsil olunur. Rusiya məlum raket sistemlərini ona görə Ermənistana verib ki, onlar bundan hərbi məqsədlər üçün istifadə etsinlər. Ermənistan isə sözügedən raketlərlə dinc sakinləri qətlə yetirir.

  • “Paşinyan rejimi elə cinayətlərə əl atır ki, bu zaman Moskva da onları müdafiə etməkdə aciz qalır”

Məsələyə münasibət bildirən “İki Sahil” qəzetinin baş redaktoru Vüqar Rəhimzadənin sözlərinə görə, Rusiya mətbuatında Ermənistanın bu baxımdan pislənməsi müsbət haldır: “Bu həm də Ermənistan hakimiyyətinin terrorçu xislətini ortaya qoyur. Nəzərə almaq lazımdır ki, Ermənistan hər zaman terrora dəstək verən ölkə rolunda çıxış edib. Törədilən bir sıra terror aktlarında Ermənistan yaxından iştirak edib. Gəncənin hədəf seçilməsi və endirilən raket zərbəsi nəticəsində bir neçə şəhər sakininin qətlə yetirilməsi bir daha onların terrorçu mahiyyətini ortaya qoydu. Belə bir dövlətin Rusiya ilə müttəfiqlik münasibətlərinə malik olması bu ölkəyə utanc gətirir. Həqiqətən də onların bu vəhşi addımı Kremli çıxılmaz vəziyyətdə qoyur. Hamıya bəllidir ki, Ermənistanın mövcudluğunda Rusiyanın rolu böyükdür. Ancaq terrorçu mahiyyətə malik Paşinyan rejimi elə cinayətlərə əl atır ki, bu zaman Moskva da onları müdafiə etməkdə aciz qalır. Müsbət haldır ki, Rusiyanın müəyyən mətbuat orqanları Ermənistanın bu məkrli fəaliyyətini ifşa edir. Çox yaxşı olardı ki, Rusiyanın digər KİV-i də erməni vandalizmi barədə yazsın. Çünki belə cinayətkar müttəfiq dövlət Moskva üçün də problem yaradır”.

V.Rəhimzadə onu da qeyd etdi ki, Ermənistanın cinayətkar əməlləri barədə materiallar Rusiya KİV-ində nə qədər çox dərc olunsa, bu bir o qədər onların ifşasına müsbət təkan verəcək.

Vidadi ORDAHALLI

Son xəbərlər