Ermənistanda daha bir qalmaqallı vəziyyət yaranıb. Yayılan məlumatlara görə, ölkənin Milli Təhlükəsizlik Xidmətinin xüsusi təyinatlı qüvvələri Dağlıq Qarabağa - cəbhə bölgəsinə yollanmaqdan imtina edib. Nəticədə yüzlərlə şəxsə cinayət işi açılıb, həbs olunanlar, işgəncəyə məruz qalanlar olub.
Qeyd edək ki, bir neçə gün əvvəl Ermənistanın Baş naziri Nikol Paşinyan Dövlət Təhlükəsizliyi Xidmətinin rəhbəri vəzifəsində 4 ay işləmiş 29 yaşlı Argişti Kərəmyanı vəzifədən azad edib.
Döyüş əməliyyatları başlayandan Ermənistanın ordu sıralarında 3 minədək fərari aşkar edilib. Cəbhə bölgəsində ard-arda itkilər verən Ermənistan artıq döyüşlərə birinci Qarabağ müharibəsinin iştirakçıları olan “qocalar”ı cəlb edir. Elit qüvvələrin imtina etdiyi döyüşlərdə sabiq əsgərlərin nə cür xeyir verə biləcəyi isə sual altındadır. Bu arada Dağlıq Qarabağdan həm döyüş mövqelərini özbaşına tərk edib fərarilik edən və Ermənistana qaçan hərbçilərin, həm kişi cinsindən olan və müharibədə iştirak etmək istəməyərək bölgəni tərk edənlərin kütləvi hal alması qondarma rejimi yeni əmr imzalamağa məcbur edib. Sözügedən əmrə əsasən, işğal altındakı ərazilərdən Ermənistana gediş məhdudlaşdırılır. Qarabağı ancaq qadınlar və uşaqlar, habelə ciddi xəstəliyi olub təxirəsalınmaz tibbi yardıma ehtiyacı olan kişilər tərk edə bilər. Qalanların isə bölgəni tərk etməsi qadağandır. Habelə səfərbərlikdən yayınanların aşkarlanması, mənzillərin, avtomobillərin, sənədlərin yoxlanılması üçün komendatura yaradılır. Bütün bunlara baxmayaraq, Ermənistanda fərariliyin qarşısını almaq olmur. Ermənistan MTX xüsusi təyinatlılarının hərəkəti həm də işğalçı müharibəyə qarşı qiyam anlamına gəlir. Zatən, Ermənistanda bir çox valideyn övladlarını Qarabağa göndərmək istəmir. Gör, vəziyyət nə yerə gəlib çatıb ki, Ermənistanın elit xüsusi təyinatlıları belə, döyüşməkdən imtina edirlər.
“Elit xüsusi təyinatlılar döyüşdən imtina edirlərsə, gör, onların sıravi əsgərləri nə gündədir”
Məsələyə münasibət bildirən hərbi ekspert Ramil Məmmədlinin sözlərinə görə, Ermənistan MTX xüsusi təyinatlılarının düyüşdən imtina etməsi Ermənistan ordusunda vəziyyətin acınacaqlı olmasından xəbər verir: “Bu onu göstərir ki, işğalçı ordu böhran içindədir. Onlar bununla cəbhədə hədəf olmaq istəmirlər. Məsələ ondadır ki, Azərbaycan ənənəvi nəzəri döyüş taktikasından fərqli olaraq, müasir döyüşün üslubuna uyğun hərbi əməliyyatlar aparır. Bu əməliyyatlar hərbi hava qüvvələri, yəni müasir pilotsuz uçuş aparatları (PUA), həmçinin, müasir reaktiv yaylım atəş sistemi, artilleriya qurğuları vasitəsilə həyata keçirilir. Bundan başqa, Azərbaycan Ordusu quru qoşunları səviyyəsində peşəkar döyüş hazırlığına malik əməliyyatı tez bir zamanda həyata keçirməyi bacaran mobil döyüş qruplarından istifadə edir ki, bu da həm qurudan, həm də havadan düşmənin hərbi qüvvələrini sürətlə və tez bir zamanda məhv etmək imkanı verir. Bütün bunlar işğalçı orduda ciddi vahimə yaradır. Bunun nəticəsidir ki, Ermənistan ordusunda fərarilik kütləvi hal alıb. Çoxsaylı cinayət işi açsalar da, bu böhranı önləyə bilməyəcəklər. Çünki vəziyyət kritik səviyyədədir. Artıq erməni əsgərləri də anlayırlar ki, işğalçı bir orduda xidmət etməyin sonu yoxdur. Elit xüsusi təyinatlılar döyüşdən imtina edirlərsə, gör, onların sıravi əsgərləri nə gündədir”.
Hərbi ekspertin fikrincə, bir müddət sonra Ermənistan ordusunda fərariliyin daha da kütləviləşəcəyi gözlənir.
Vidadi ORDAHALLI
