Azərbaycan Ermənistan tərəfindən işğal edilmiş ərazilərinin azad olunması yolunda qətiyyətli mövqe nümayiş etdirir. Azərbaycanın öz ərazi bütövlüyünün bərpası istiqamətində atdığı addımlar prinsipial xarakter daşıyır və beynəlxalq hüquqa əsaslanır.
Azərbaycan Prezidenti İlham Əliyev Türkiyənin “HaberGlobal” telekanalına müsahibəsində ölkəmizin qətiyyətli mövqeyini bir daha beynəlxalq ictimaiyyətin diqqətinə çatdırdı. Ermənistan hökumətinin beynəlxalq səviyyədə məsuliyyətsizliyi davam edir və Paşinyanın da xalqına müraciətində hərbi döyüşdə aciz oldquqlarını, ancaq güzəştə getmək istəməyərək, ərazilərimizdən çıxmaq niyyətində olmadıqlarını bəyan edirlər. Humanitar atəşkəs o məqsədlə əldə olunur ki, həm tərəflər öz hərbçilərinin cəsədlərini döyüş meydanından çıxarsın, həm də əsirlər dəyişdirilsin. Əslində, Moskva görüşü Azərbaycanın diplomatik uğuru sayıla bilər. Çünki Paşinyan hakimiyyəti danışıqların formatını və baza prinsiplərini inkar etmək yolunu tutmuşdu. İşğalçı Ermənistan Moskvada imzalanan humanitar atəşkəs razılaşmasını kobud şəkildə pozdu. Həmin razılaşmada isə Ermənistan həm baza prinsiplərini, həm də danışıqların qüvvədə olan formatını qəbul etdi. Onlar ənənələrinə sadiq qalaraq humanitar atəşkəs razılaşmasından dərhal sonra mövqelərimizə hücum etdilər, Gəncə şəhərini isə raket atəşinə tutdular və nəticədə isə çoxsaylı insan tələfatının şahidi olduq. Bu, bəşəriyyətə və insanlığa açıq şəkildə meydan oxumaqdır, vandalizmdir. Dövlət başçısının müsahibəsində vurğuladığı kimi, Qərb dövlətləri bunu qəbul etmək istəməsələr də, Türkiyənin bölgədə artan rolunu inkar etmək mümkün deyil. Bu mənada, Dağlıq Qarabağ münaqişəsinin həlli prosesində Türkiyənin fəal iştirakı reallıqdır. Digər tərəfdən, bir çox ölkələrdən fərqli olaraq, Türkiyə bu məsələdə ədalətin tərəfindədir. Ədalətli tərəf isə Azərbaycandır. Türkiyə Qarabağ mövzusunda daim Azərbaycanın yanındadır. Azərbaycan – Türkiyə parlamentlərarası dostluq qrupunu rəhbəri kimi Türkiyədən olan deputat həmkarlarım, demək olar ki, hər gün mənimlə əlaqə saxlayır, vəziyyətlə maralanır və öz dəstəklərini bəyan edirlər. Birləşmiş Millətlər Təşkilatının 30 il müddətində icra edə bilmədiyi qətnamələrin icrası ilə Azərbaycan Prezidenti, ordusu, xalqı məşğul oldu. Bu gün dünyanı danışdırmağa sövq edən güc Azərbaycan xalqıdır. Xalqımız əmindir ki, Ali Baş Komandan cənab İlham Əliyevin məntiqli hərb və diplomatiya strategiyası, o cümlədən rəşadətli ordumuzun gücü sayəsində tezliklə Qarabağımıza qovuşacaqdır. Qarabağ Azərbaycandır!
Əhliman ƏMİRASLANOV
Milli Məclisin Səhiyyə komitəsinin sədri, akademik
