ASALA terror təşkilatının üzvü, Fransa vətəndaşı Gilbert Minasyan və onun rəhbərlik etdiyi 15 nəfərdən ibarət dəstənin Azərbaycan Respublikasının ərazisində törətdiyi cinayət əməllərinə görə cinayət işi başlanıb. Bu barədə baki-xeber.com-a Baş Prokurorluğun Mətbuat xidmətindən məlumat verilib.
Məlumatda qeyd edilib ki, Ermənistan Respublikasının işğalçı mahiyyətinin beynəlxalq müstəvidə bir daha ifşa edilməsi, eləcə də ordumuza və dinc əhaliyə qarşı cinayətlər törətmiş təxribatçı erməni birləşmələrinin hərbi qulluqçularının beynəlxalq hüquq normaları çərçivəsində məsuliyyətə cəlb edilmələri üçün Azərbaycan Respublikasının Baş Prokurorluğu tərəfindən zəruri tədbirlərin görülməsi davam etdirilir.
Həyata keçirilən bu tədbirlərin davamı kimi, Azərbaycan Respublikasının Baş Prokurorluğunda ASALA terror təşkilatının üzvü, dəfələrlə terrorçuluq fəaliyyətinə görə məhkum edilmiş Fransa Respublikasının vətəndaşı G.Minasyan və onun rəhbərlik etdiyi 15 nəfərdən ibarət hərbi təcrübəyə malik dəstənin Azərbaycan Respublikasının ərazisində törətdiyi cinayət əməllərinə dair yerli və xarici kütləvi informasiya vasitələrində yayılmış çoxsaylı məlumat əsasında araşdırma aparılıb.
Araşdırmalarla terror təşkilatının üzvü, Fransa vətəndaşı G.Minasyan və onun rəhbərlik etdiyi 15 nəfərdən ibarət hərbi təcrübəyə malik dəstənin digər üzvləri birlikdə Ermənistanda və Azərbaycan Respublikasının işğal olunmuş ərazilərində olan şəxslərlə cinayət əlaqəsinə girib cinayətkar birlik tərkibində birləşərək, “Azərbaycan Respublikasının dövlət sərhədi haqqında” Qanunun və Miqrasiya Məcəlləsinin tələblərinə zidd olaraq, Birləşmiş Millətlər Təşkilatının Təhlükəsizlik Şurasının 30 aprel 1993-cü il tarixli, 822 saylı, 29 iyul 1993-cü il tarixli, 853 saylı, 14 oktyabr 1993-cü il tarixli, 874 saylı, 12 noyabr 1993-cü il tarixli, 884 saylı qətnamələrinə əsasən, Azərbaycan Respublikasının beynəlxalq səviyyədə tanınmış dövlət sərhədini müəyyən edilmiş sənədlər olmadan və dövlət sərhədinin nəzarət-buraxılış məntəqələrindən kənarda, yəni Ermənistan ərazisindən qanunsuz keçərək Xankəndi şəhəri və işğal altında olan digər yaşayış məntəqələrinə gəlmələrinə, “Dağlıq Qarabağ Respublikası” adı altında fəaliyyət göstərən qanunsuz rejimin dəstəklənməsi məqsədilə, Azərbaycan Respublikasının dinc vətəndaşlarına və antiterror əməliyyatlarını həyata keçirən silahlı qüvvələrinə qarşı, eləcə də Azərbaycan Respublikasının ərazilərinin işğal edilməsinə yönələn təcavüzkar müharibədə Ermənistan Respublikasının siyasi-hərbi rejimi tərəfindən hərbi münaqişədə muzdlu kimi istifadə edilmələrinə əsaslı şübhələr müəyyən edilib.
“…faktları BMT Təhlükəsizlik Şurasına təqdim etməklə müvafiq tribunalın yaradılmasına nail olmağa çalışmalıdır”
Konstitusiya Araşdırmalar Fondunun rəhbəri, hüquqşünas Əliməmməd Nuriyev “Bakı-Xəbər”ə bildirdi ki, ASALA “zəngin” terror təcrübəsinə malik, uzun illərdir fəaliyyətdə olan erməni terror təşkilatlarından biridir. “Doğrudur, Livanın İsrailə olan hücumları nəticəsində İsrailin Livana daxil olmasından sonra ASALA-nın oradakı əsas mərkəzi darmadağın edilib. Amma buna baxmayaraq, ASALA hər zaman terror əməllərini davam etdirir. Çünki dünyanın müxtəlif yerlərində onun təşkilatları, qrupları, özəkləri var. ASALA-nın hər zaman törətdiyi terror aktlarının hədəfi əsas etibarilə türklər, türk diplomatlarıdır, Türkiyənin yüksək vəzifəli şəxsləri, siyasi xadimləridir. Bilirsiniz ki, ASALA üzvləri Fransada və digər yerlərdə türk diplomatlarına qarşı terror aktları törədiblər.
Eyni zamanda, ASALA Azərbaycana qarşı terror hərəkətləri törədib. Bilirsiniz ki, keçən əsrin əvvəllərində, xüsusən də 20-ci illərdə AXC-nin nümayəndələrinə qarşı erməni terror təşkilatları tərəfindən, ASALA qurucularının təhriki ilə sui-qəsdlər, terror aktları həyata keçirilib.
Sonrakı dövrlərdə, xüsusən də Ermənistanın Azərbaycan ərazilərinə təcavüzü başlandıqdan sonra ölkəmizin ərazisində, o cümlədən də metroda ASALA təşkilatı tərəfindən terror aktları törədilib. Ermənilərin azərbaycanlılara qarşı həyata keçirdikləri Xocalı soyqırımında da ASALA-nın iştirakı olub. Eyni zamanda, Ermənistanın Azərbaycana qarşı son təxribatı zamanı, bu günlərdə ASALA-nın üzvləri Azərbaycan ərazisində - Dağlıq Qarabağda öz terrorçuluq fəaliyyətlərini davam etdirirlər. Ona görə də Baş Prokurorluq tərəfindən ASALA terror təşkilatının 15 üzvünə qarşı Azərbaycan Respublikasının ərazisində törətdikləri cinayət əməllərinə görə cinayət işinin başlaması çox mühüm məsələdir. Hesab edirəm ki, ASALA üzvü olan 15 nəfər terrorçu barəsində Baş Prokurorluq tərəfindən kifayət qədər məlumat toplanıb və toplanmaqda davam edir. Çünki ASALA terror təşkilatına daxil olan şəxslərin hələ də Azərbaycan ərazilərində terror hərəkətləri davam etməkdədir. Bu gün Azərbaycan ərazilərində ASALA terror təşkilatının üzvləri ilə yanaşı, digər erməni terror təşkilatlarının üzvləri də var, onlar terror aktları həyata keçirirlər. Bütövlükdə götürdükdə, Ermənistan özü terror dövlətidir. Bu ölkənin elə Gəncədə mülki əhalini uzaqmənzilli raketlərlə atəşə tutmasının özü onun terrorçu dövlət olduğunu bir daha ortaya qoyur. Tərtərin, Ağdamın, Mingəçevirin, Goranboyun, Füzulinin, Beyləqanın, Şəmkirin və digər şəhərlərimizin mülki əhalisini və mülki obyektlərini atəşə tutması Ermənistanın həyata keçirdiyi terror aktlarıdır”.
Ə.Nuriyevin fikrincə, ASALA-nın 15 üzvü ilə bağlı Baş Prokurorluqda cinayət işinin başlanması bizə əsas verir ki, sonrakı mərhələdə aidiyyəti orqanlarımız tərəfindən bütün toplanan, sənədləşdirilən sənədlərin, faktların hamısı BMT Təhlükəsizlik Şurasına təqdim edilsin. “Hesab edirəm ki, Azərbaycan həm də bu sənədləri, faktları BMT Təhlükəsizlik Şurasına təqdim etməklə müvafiq tribunalın yaradılmasına nail olmağa çalışmalıdır. Biz hər birimiz bu prosesdə iştirak etməliyik. Eyni zamanda da Azərbaycan özü bəşəriyyət əleyhinə müharibə cinayətində iştirak etmiş insanların müddətindən asılı olmayaraq, məsuliyyətə cəlb olunmasına nail ola bilər. Qanunvericilik həm də onu müəyyənləşdirir ki, bu şəxslərə münasibətdə hər hansı bir müddət ola bilməz, onlar müddətsiz olaraq, harada, nə zaman ələ keçirildilərsə, məsuliyyətə cəlb ediləcəklər. Yəni bəşəriyyət əleyhinə terror cinayətlərinə, həmçinin də müharibə cinayətlərinə görə məsuliyyətin ötürülmə müddəti qanunvericilikdə yoxdur. Düşünürəm ki, həm də bizim aidiyyəti qurumlar İnterpola da həmin şəxslər barədə məlumatlar veriblər. Onların nəinki Azərbaycan ərazisində, hətta başqa ölkələrdə də tutulub Azərbaycana təhvil verilməsi baş verəcək. Çünki terrorçunun vətəndaşlığı bu məsələdə əhəmiyyətli deyil. O, terror aktı törədibsə, hansı ölkənin ərazisində olmasından asılı olmayaraq, ya həmin şəxs terror törətdiyinə görə həmin ölkədə həbs olunmalı, ya da həbs edilib Azərbaycana verilməlidir ki, məsuliyyətə cəlb olunsun”.
Bu məsələdə müxtəlif istiqamətlər üzrə fəaliyyətimizi genişləndirməli olduğumuzu deyən Ə.Nuriyevin fikrincə, Azərbaycanın xüsusi xidmət orqanları tərəfindən o insanların Azərbaycan ərazisində tutulub cinayət məsuliyyətinə cəlb edilməsi, həm də ölkədən kənarda digər ölkələrin hüquq-mühafizə orqanları tərəfindən onların həbs edilərək ölkəmizə təhvil verilməsi üçün çalışmalıyıq.
Ə.Nuriyevin qeyd etdiyinə görə, bu terrorçular ayrı-ayrı ölkələr tərəfindən gizlədilirsə, müxtəlif ölkələrin ərazisində onlar “qəhrəman” kimi göstərilirsə, məsuliyyətə cəlb edilmirsə, Azərbaycanın hüququ çatır ki, onun ərazisində terror hərəkətlərinə yol verən terrorçuları harada olmasından asılı olmayaraq, məhv etsin. “Azərbaycan terror aktları törətmiş, bəşəriyyət əleyhinə müharibə cinayətlərində iştirak etmiş şəxslər, o cümlədən də ASALA terror təşkilatının üzvləri barədə bütün məlumatları BMT Təhlükəsizlik Şurasına təqdim etməklə müvafiq tribunalın yaradılmasına səy göstərməlidir. Amma bu çox çətin prosesdir. Bilirsiniz ki, BMT Təhlükəsizlik Şurasında Ermənistanın havadarları da var. Rusiya, Fransa açıq şəkildə Ermənistanı müdafiə edir, bir sıra hallarda onlar özləri terrorçulara dəstək göstərirlər. Terrorçuların toplanması məsələsində birbaşa iştirak edən ayrı-ayrı dövlətlərin rəsmi nümayəndələri var. Həm də bu sahədə ciddi təbliğat gedir. Hətta onlar banklarda hesablar açaraq, terrorçuları və Ermənistanın silah almasını maliyyələşdirirlər. Bunlar hamısı müharibənin təşviq edilməsi, bəşəriyyət əleyhinə müharibə cinayətlərinə yol verilməsi və orada iştirakla bağlı məsələdir” - deyə Ə.Nuriyev vurğuladı.
İradə SARIYEVA
