“Gələn il TANAP-dan qaz alacaq Avropa ölkələri də onları xəbərdar etməlidir”. Bunu Türkiyənin “Haber Türk” televiziya kanalına müsahibəsində Prezident İlham Əliyev deyib.
Ölkə başçısı qeyd edib ki, Ermənistandan hər şey gözləmək olar: “Elə Tovuz bölgəsində iyul ayında baş vermiş toqquşmaların səbəblərindən biri də o idi. O boru xəttinə yaxınlaşmaq, ya da ki, onu nəzarət altına almaq. Məhz elə ona görə onlar bizim ərazimizə girib yeni torpaqlar işğal etmək istəyirdilər. Ancaq bunun acı nəticəsini yaşadılar. 2006-cı ildə Bakı-Tbilisi-Ceyhan istismara veriləndən bu günə qədər boru xətlərinin təhlükəsizliyi ilə bağlı Azərbaycan ərazisində bir dənə də problem olmamışdır, bir dənə də, nə texniki problem, nə də ki, hansısa bir təxribat. Çünki Azərbaycan ərazisində bizim kifayət qədər inkişaf etmiş müdafiə sistemimiz var. Monitorinq aparılır, fiziki müdafiə və elektron vasitələrlə. Boru xəttinin yerin altında, dərində yerləşməsi, təbii ki, bunu havadan da müəyyən dərəcədə mühafizə edir. Ancaq əgər Ermənistan bu çirkin planları, yəni boru xətlərinin sıradan çıxarılması planlarını həyata keçirərsə, onlar üçün cavab çox ağır olacaq. Biz bu barədə artıq xəbərdarlıq etmişik. Hesab edirəm ki, gələn il TANAP-dan qaz alacaq Avropa ölkələri də onları xəbərdar etməlidirlər. Çünki TANAP təkcə bizim layihəmiz deyil. TANAP-ın başqa səhmdarları var, TAP-ın Avropa səhmdarları var. Bu, Avropanın enerji təhlükəsizliyi üçün müstəsna əhəmiyyət daşıyan bir layihədir. Ona görə hamımız maraqlı olmalıyıq ki, bu layihəyə hər hansı bir ziyan dəyməsin”.
Prezident çox doğru olaraq enerji layihəsindən faydalanan ölkələrə səsləndi ki, bununla bağlı Ermənistanı xəbərdar etsinlər. Çünki boru xətti hədəf alınarsa, bundan təkcə Azərbaycan ziyan çəkməyəcək. Eyni zamanda, TANAP-dan qaz alan ölkələr ziyan görəcək.
“...enerji idxalından asılı olan həmin ölkələrin mənafeyinə də təhlükə törədir”
Məsələyə münasibət bildirən siyasi ekspert Ramil Hüseynovun fikrincə, Prezident bununla Avropa ölkələrinə çox vacib mesaj verdi: “Məsələ ondadır ki, nədənsə, Avropa ölkələri işğalçı Ermənistanın enerji xətlərini hədəfə almaq cəhdlərini susqunluqla izləyirlər. Halbuki, bu, enerji idxalından asılı olan Avropa ölkələrinin mənafeyinə də təhlükə törədir. Özü də Ermənistan bilərəkdən belə təxribatlara əl atır. O baxımdan, TANAP çərçivəsində qaz alacaq Avropa ölkələri Ermənistanı xəbərdar etməyə borcludurlar. Nəzərə alsaq ki, Avropa ölkələrinin Ermənistanla sıx əlaqələri var, o zaman bu onlar üçün elə də çətin bir iş deyil. Avropa ölkələri bununla bağlı Ermənistanı ciddi şəkildə xəbardar etsələr, işğalçı tərəf bundan çəkinəcək. Çünki indiki gərgin vəziyyətdə Ermənistan istəməz ki, Avropa ölkələri ilə münasibətləri bu üzdən pisləşsin. Belə hal Ermənistana növbəti zərbə olacaq. Ona görə də Avropa ölkələri enerji xətləri ilə bağlı Ermənistanı xəbərdar etməkdə tələsməlidirlər. Bununla bağlı səy göstərməlidirlər. Əfsuslar olsun ki, biz hələlik bunu görmürük. O da məlumdur ki, Avropa qaz mənbələrini şaxələndirmək istəyir. Bu da qaz ixracı ilə məşğul olan bəzi ölkələrin maraqlarına uyğun deyil. Ola bilsin ki, Ermənistanın bu təxribatının arxasında həmin dairələr var. Fikrimcə, bu amili də nəzərdən qaçırmaq olmaz”.
Siyasi ekspert hesab edir ki, TANAP çərçivəsində qaz idxal edəcək ölkələr bu məsələyə son dərəcə ciddi yanaşmalıdırlar. Çünki təxribat baş versə, bundan təkcə Azərbaycan ziyan görməyəcək.
Vidadi ORDAHALLI
