“…O ki qaldı sülhdən sonrakı dönəmə, bizim mövqeyimizdə hər hansi bir dəyişiklik yoxdur. Bizim mövqeyimiz həm tarixi ədalətə, beynəlxalq hüquqa və dünyada mövcud olan müsbət təcrübəyə əsaslanır. Yəni birinci mərhələdə işğal olunmuş rayonlardan erməni silahlı qüvvələri çıxarılır.
Prinsip etibarilə, bu məsələ artıq Minsk Qrupu çərçivəsində təsbit edilib, - beş rayon, ondan sonra iki rayon, ondan sonra Dağlıq Qarabağın özündən, Şuşadan, Xankəndidən, - orada bir çox kəndlərdə azərbaycanlılar yaşayıb, - Azərbaycan vətəndaşları oraya qayıdır və Dağlıq Qarabağın gələcəyi ilə əlaqədar müzakirələr davam edir. Ancaq yeni bir şəraitdə, yeni bir iqlim çərçivəsində. Artıq biz sülhə daha da yaxınlaşacağıq. Ona görə orada yaşayan ermənilərlə əlaqədar bizim mövqeyimizdə dəyişiklik yoxdur. Azərbaycan çoxmillətli dövlətdir. Azərbaycanın müxtəlif yerlərində, ilk növbədə, Bakı şəhərində minlərlə erməni yaşayır və onlar bizim vətəndaşımızdır. Bizim ölkəmizdə bir çox millət yaşayır və bu, ölkəmizin gücünü artırır. Ona görə Dağlıq Qarabağda yaşayan ermənilər narahat olmasınlar. Biz onların canını o kriminal xunta rejimindən qurtarandan sonra onlar daha yaxşı yaşayacaq, daha güvənli, daha təhlükəsiz şəraitdə yaşayacaq və onların rifahı daha da artacaq. Çünki orada indi səfalət hökm sürür. Biz oraya sərmayə də yatırarıq, biz orada sosial proqramlar da icra edərik, iş yerlərinin yaradılması ilə əlaqədar proqramlarımız olacaqdır. Bütün bunlar orada yaşayan ermənilər və oraya qayıdacaq azərbaycanlılar üçün yeni bir mərhələ olacaq. Bizim mövqeyimiz bundan ibarətdir. Ermənistanın mövqeyi isə azərbaycanlıları oradan qovmaq, etnik təmizləmə aparmaq, Azərbaycanın tarixi-dini abidələrini yerlə-yeksan etmək və ondan sonra elan etmək ki, bu, qədim Ermənistan torpağıdır. Halbuki, ermənilər oraya Çar Rusiyası tərəfindən XIX əsrin əvvəlində köçürülüb. Bu, tarixdir. Bu tarixi biz bilirik. Ona görə bizim mövqeyimiz bundan ibarətdir. Azərbaycan xalqı bu mövqeyi bilir və bunu dəstəkləyir”.
Bu fikirləri Prezident İlham Əliyev oktyabrın 13-də Türkiyənin “Haber Türk” televiziya kanalına müsahibəsində bildirib.
“Bu gün onlar açıq şəkildə sosial şəbəkələrdə yazırlar ki, biz Sovet dövründəki kimi, Dağlıq Qarabağda azərbaycanlılarla birgə yaşamaq...”
Bakı Dövlət Universitetinin (BDU) Tarix fakültəsinin Erməni araşdırmaları ETL-nin böyük elmi işçisi İsmayıl Tanrıverdi “Bakı-Xəbər”ə bildirdi ki, Prezidentin bu çağırışının böyük taktiki-strateji önəmi var. O vurğuladı ki, Azərbaycan çoxmillətli ölkədir və ölkəmizdə müxtəlif millətlərin nümayəndələri əmin-amanlıq, rifah içində yaşayırlar. Prezident İlham Əliyevin Dağlıq Qarabağda yaşayan ermənilərə çağırışını çox yüksək qiymətləndirən İ.Tanrıverdinin sözlərinə görə, ermənilər arasında da Prezidentin çağırışlarına böyük dəyər verənlər var. “Prezident İlham Əliyevin Dağlıq Qarabağda yaşayan ermənilərə çağırış edərək onların tamhüquqlu Azərbaycan vətəndaşları kimi yaşayacaqlarını bildirməsi təqdirəlayiq haldır. Prezident haqlı olaraq vurğulayıb ki, Azərbaycanda, Bakıda minlərlə erməni yaşayır və onlar bizim vətəndaşlarımızdır. Prezidentin çağırışı Dağlıq Qarabağda yaşayan ermənilər tərəfindən çox ciddi şəkildə müzakirə edilir. Hətta bu məsələ ilə bağlı sosial şəbəkələrdə çox qızğın disskusiyalar gedir. Dağlıq Qarabağda yaşayan ermənilər arasında Azərbaycan Prezidentinin çağırışlarına kifayət qədər dəstək verən insanlar var. Onlar sosial şəbəkələrdə bununla bağlı öz fikirlərini bildirirlər. Çünki onlar özləri artıq etiraf edirlər ki, İrəvan onları qəbul etməyəcək. Həmişə onlar arasında problemlər olub. Təbii, buna narazı yanaşanlar da yox deyil. Narazılar hələ də Dağlıq Qarabağdakı separatçı rejimin qondarma rəhbəri Araik Harutunyanın təsiri altında olanlardır. Amma Prezidentin çağırışına dəstək verənlər isə xunta rejimindən bezən insanlardır. Bu gün onlar açıq şəkildə sosial şəbəkələrdə yazırlar ki, biz Sovet dövründəki kimi, Dağlıq Qarabağda azərbaycanlılarla birgə yaşamaq, aclıqdan, səfalətdən, xunta rejiminin əsarətindən xilas olmaq istəyirik. Fəaliyyət sahəmlə əlaqədar olaraq sosial şəbəkələrdə erməni istifadəçilərini izləyirəm və onların fikirlərini öyrənirəm” - deyə bildirən İ.Tanrıverdinin sözlərinə görə, Dağlıq Qarabağda yaşayan ermənilərin böyük əksəriyyəti qondarma rejimdə yaradılan xuntadan narazıdır, onlar özlərinin bu rejimdən xilasını Azərbaycan dövlətində görürlər. İ.Tanrıverdi hesab edir ki, Dağlıq Qarabağda yaşayan ermənilərin böyük əksəriyyəti tezliklə cinayətkar rejimin əsarətindən xilas olmaq istəyir.
İradə SARIYEVA
