Azərbaycan Respublikasının Prezidenti İlham Əliyev oktyabrın 13-də Türkiyənin “Haber Türk” televiziya kanalına müsahibə verib. Prezident müsahibə zamanı bir sıra məqamlara toxunub.
O cümlədən, qeyd edib ki, işğalçı ölkənin ordusunda başqa ölkənin vətəndaşları da döyüşürlər: “Ermənistanda nə qədər əcnəbi terrorçular var. PKK-nın düşərgələri var orada. O cümlədən, Dağlıq Qarabağda PKK-nın düşərgələri var. Biz bu bölgəni işğalçılardan təmizləyəndən sonra o düşərgələri də məhv edəcəyik. Nə qədər əcnəbi bu gün bizə qarşı bu döyüşlərdə iştirak edir. Orada öldürülən terrorçuların üzərindən Kanada pasportları, Livan pasportları çıxıb. Onlar erməni əsillidir, ya da ki, erməni əsilli deyil, bu, başqa məsələdir. Başqa ölkənin vətəndaşı gəlib bizə qarşı müharibə aparır. Bunlar muzdlulardır”.
Qeyd edək ki, bir neçə gün əvvəl Azərbaycan Respublikası Dövlət Təhlükəsizliyi Xidmətinin (DTX) İctimai əlaqələr şöbəsinin yaydığı məlumatda qeyd olunurdu ki, Ermənistan ordusu Azərbaycana qarşı xarici muzdlulardan, o cümlədən, İraq və Suriya ərazisindən gətirilmiş kürd terrorçu qruplaşma üzvlərindən istifadə edir.
“Öldürülən terrorçuların üzərindən başqa ölkələrə məxsus pasportlar çıxır”
Məsələ ilə bağlı fikir bildirən hərbçi-ekspert Rasim İsgəndərov bildirdi ki, ermənilər özləri Dağlıq Qarabağa həm Livandan erməni muzdlu döyüşçüləri, həm ASALA-nın tör-töküntülərini, həmçinin, açıq-aşkar PKK-nın və DYP kimi terror təşkilatlarının nümayəndələrini gətiriblər: “İşğal edilmiş ərazilərdə və Dağlıq Qarabağın özündə indiyə qədər, sözün həqiqi mənasında, terrorçular meydan sulayırdı. Ermənistanın gətirdiyi terror dəstələri haqqında artıq hər yerdə məlumatın yayılmasının şahidi oluruq. Ermənistan ordusunda başqa ölkə vətəndaşları olan muzdlular döyüşürlər. Onlar özləri Azərbaycanı ittiham edirdilər ki, guya Azərbaycan ərazisində Türkiyə və başqa ölkələrdən muzdlular döyüşürlər. Amma, əslində, bütün Ermənistan xəbər agentlikləri, Fransa və Misir mediası yazır ki, Ermənistan ordusuna Livandan, Suriyadan və dünyanın bir çox ölkəsindən gətirilmiş muzdlu terrorçular, PKK və ASALA terror təşkilatlarının üzvləri döyüşmək üçün cəlb ediliblər. Bunu artıq ermənilər özləri etiraf edirlər. Öldürülən terrorçuların üzərindən başqa ölkələrə məxsus pasportlar çıxır. Bu isə o deməkdir ki, Ermənistanın yerli əhalisi döyüşməkdən qaçdığı üçün onlar Kanada, Livan və digər ölkələrin vətəndaşlarını muzdlu şəkildə döyüşdə iştirak etməyə məcbur edirlər”.
Günel CƏLİLOVA
