“Moskva müzakirələrinin uzun çəkməsinin səbəbi o idi ki, bizim üçün məqbul olmayan bəzi maddələr o açıqlamaya salınmalı idi”. Bunu Prezident İlham Əliyev Türkiyənin “Haber Türk” televiziya kanalına müsahibəsində deyib.
Ölkə başçısının sözlərinə görə, görüş zamanı Ermənistanın Qarabağdan çəkilməsi üçün bir konkret təqvim verilməyib: “Biz də çox israr etmədik. Çünki Moskva anlaşmasında, açıqlamasında bizi qane edən, bizim maraqlarımıza cavab verən maddələr bizi təmin etdi. Onu da bildirməliyəm ki, Moskva müzakirələrinin uzun çəkməsinin səbəbi o idi ki, bizim üçün məqbul olmayan bəzi maddələr o açıqlamaya salınmalı idi. Bizim bundan xəbərimiz yox idi. Bizim Xarici İşlər nazirimiz Moskvaya gələndə və artıq müzakirə masasına əyləşəndə hər iki nazirə təkliflər verildi. Təbii ki, mənimlə əlaqə saxlanıldı və biz müntəzəm olaraq əlaqədə idik. Mən bizim şərtlərimizi demişdim və o şərtlərdən kənarda hər hansı bir razılaşma mümkün deyildi”.
Görünən odur ki, Azərbaycan dövlətinin gücü sayəsində ölkəmiz üçün məqbul olmayan məqamlar danışıqlardan çıxarılıb. Bu isə çox mühüm məsələdir. O baxımdan sözügedən məsələdə Azərbaycanın gücünü və rolunu ekspertlər necə dəyərləndirirlər?
“Görünür, Rusiya ilə Ermənistan tərəfi bu görüşün detallarını Azərbaycan rəsmilərindən xəbərsiz əvvəlcədən hazırlayıblar”
Məsələyə münasibət bildirən AMİP-in sədr müavini Afsəddin Nəbiyev buna bir neçə aspektdən yanaşdı: “Bir məsələni xüsusilə vurğulayım ki, Moskvada keçirilən görüş son 20 ildə Qarabağa dair ən uzunmüddətli danışıqlar olub. Ali Baş Komandan, Prezident İlham Əliyevin “Haber Türk”ə müsahibəsində də aydın başa düşmək olur ki, Moskva görüşü çox gərgin keçib. Müzakirələrin uzun çəkməsinin səbəbi o olub ki, bizim üçün məqbul olmayan maddələr açıqlamaya salınıb. Görünür, Rusiya ilə Ermənistan tərəfi bu görüşün detallarını Azərbaycan rəsmilərindən xəbərsiz əvvəlcədən hazırlayıblar. Sonradan üç tərəfin müzakirələri zamanı bizə məqbul olmayan maddələr ortaya çıxarıldıqda, təbii ki, haqlı olaraq Azərbaycan tərəfi bu maddələrdən imtina edib. Çox güman ki, Ermənistan tərəfi danışıqların formatına qondarma “DQR”i əlavə etməyə cəhd göstərib. Məhz Azərbaycan dövlətinin qətiyyəti və güclü iradəsi nəticəsində onların bu planı baş tutmayıb. Separatçı qurumun heç vaxt, heç bir masada müzakirə olunmayacağı barədə birdəfəlik razılığa gəlinib. İkinci məsələ baza prinsipləri, yəni “Madrid prinsipləri” əsasında danışıqlar formatının bərpa olunması mərhələsini özündə ehtiva edir. Baza prinsipləri Azərbaycan dövlətinin maraqlarını əks etdirir. Yəni “Madrid prinsipləri” qeyd-şərtsiz işğal altında olan torpaqlarımızın qaytarılmasını birmənalı təsbit edir. Göründüyü kimi, ordumuzun zəfər qazanması Azərbaycanın diplomatiya sahəsində də mövqeyini möhkəmləndirir. Proseslər bu şəkildə davam etdirilməlidir”.
Partiya funksioneri onu da qeyd etdi ki, bu gün dövlət, ordu, xalq birliyi son yüz ilin Azərbaycan xalqına bəxş etdiyi ən böyük nemətdir. O üzdən, qələbə mütləq bizimlə olacaq.
Vidadi ORDAHALLI
