Bu gün Rusiya məkanında, xüsusən də bu ölkənin bəzi telekanallarında Azərbaycanın haqq işinə kölgə salan, cani-dildən ermənilərin, terror dövləti Ermənistanın dəyirmanına su tökən müəyyən politoloqlar, jurnalistlər var. Əlbəttə, onların əsas məqsədi erməni lobbisinin, ermənipərəst qüvvələrin mənfur sifarişini yerinə yetirmək, Azərbaycanın ədalətli mübarizəsinə kölgə salmaqdır.
Bu insanların işi bunula bitmir. Onların işi, həmçinin, Azərbaycanın haqlı mövqeyini dəstəkləyən, Ermənistanın haqsız olduğunu, Azərbaycanın ərazi bütövlüyünü pozduğunu, torpaqlarını işğal etdiyini, mülki əhalisini terrora məruz qoyduğunu faktlarla sübut edən məşhur rus jurnalist və politoloqlarına çamur atmaqdan ibarətdir. Son günlər bəzi Rusiya telekanallarında yeni ittihamçı qüvvələr peyda olub. Ermənipərəst mövqedən çıxış edən bu nəsnələr daim Azərbaycanın yanında olan, bizim haqlı mövqeyimizi dəstəkləyən, təbliğ edən Maksim Şevçenkoya qarşı qara piar kampaniyasına başlayıblar. Onlar M.Şevçenkonu “islamçı” adlandıraraq qaralamağa çalışırlar, ona müxtəlif təzyiqlər göstərirlər. Bundan başqa, bu qara qüvvələr Azərbaycanın ədalətli mövqeyini dəstəkləyən rus əsilli mütəxəssis, tarixçi Oleq Kuznetsova, “Natsionalnaya oborona” jurnalının baş redaktoru İqor Korotçenkoya və başqalarına qarşı da eyni çirkin mövqe tuturlar.
“...onlar terrorçu Ermənistanı əvvəlki kimi müdafiə edə bilməzlər”
AVCİA-nın vitse-prezidenti, tarix elmləri doktoru, professor Məhərrəm Zülfüqarlı “Bakı-Xəbər”ə şərhində bildirdi ki, M.Şevçenkoya və Azərbaycanın tərəfini tutan, ölkəmizin ədalətli işini dəstəkləyən digər insanlara qarşı çirkin kampaniya aparılması yolverilməzdir. M.Zülfüqarlı hesab edir ki, onlara qarşı haqsız və əsassız ittihamlar irəli sürənlər, onları “islamçı” adlandıranlar satın alınmış adamlardır ki, ermənilərin sifarişini yerinə yetirirlər. “Əvvəla bunun kökünü Rusiyanın imperiya siyasətində axtarmaq lazımdır. Pyotrdan başlayaraq, indiyə qədər Rusiya rəhbərliyi, hətta Sovet rəhbərliyi də eyni siyasəti müxtəlif formalarda həyata keçiriblər. Amma bunlar anlamırlar ki, Azərbaycanla Ermənistanın Rusiyaya münasibəti eyni deyil. Onlar müstəqil Azərbaycan Respublikasının və Ermənistanın Rusiyaya münasibətinə baxsınlar. Əsl həqiqəti görməyi bacaran, obyektiv rus ziyalıları bunu görürlər və Azərbaycanın haqq işini dəstəkləyirlər. Amma şovinist mövqedə dayananlar hansısa mərkəzlərin sifarişini yerinə yetirirlər, onların sözləri ilə oturub-dururlar, onlar ermənipərəst siyasətə dəstək verirlər.
Şevçenkonun bəzi ermənipərəst rus şovinistləri tərəfindən əsassız olaraq ittiham edilməsi həmin şəxslərin ermənilərin sifarişlərini yerinə yetirdiklərini deməyə əsas verir.
Mənə elə gəlir ki, rus ziyalıları Paşinyan hakimiyyətə gəldikdən sonra onun hərəkətlərinə, Rusiya ilə bağlı mövqeyinə ciddi baxsalar görərlər ki, o, Rusiyaya da böyük xəyanətlər edib. Ermənistanı müdafiə edən şovinistlər bilmirlər ki, xəstə təfəkkürlü ermənilər təkcə Azərbaycana, Gürcüstana, başqa ölkələrə deyil, hətta Rusiyanın Krasnodar vilayətinə də ərazi iddiaları irəli sürürlər. Vaxtilə Moskvada erməni terrorçuları metronu partlatdılar. İndi başa düşməlidirlər ki, dünya başqa dünyadır və onlar terrorçu Ermənistanı əvvəlki kimi müdafiə edə bilməzlər. Bu gün raket atılırsa, həmin an kosmik peykdən qeydiyyata alınır, bilinir ki, raket haradan atılıb. Bu yalanlar daha dünyada keçmir. Şoyqu deyəndə ki, Ermənistana silah deyil, tikinti materialları gedib, əlbəttə, buna dünya gülür.
Əlbəttə ki, Şevçenko kimi ağıllı, obyektiv rus ziyalıları Rusiyanı bu cür yalanlardan çəkindirmək istəyirlər. Amma satın alınan bəzi politoloqlar, jurnalistlər Azərbaycanın ədalətli mövqeyini görməzdən gəlir və Şevçenko kimi ağıllı ziyalılara qarşı hücuma keçirlər, onu əsassız olaraq ittiham edirlər. Mənə belə gəlir bu, axırıdır. Rusiya da bilməlidir ki, dünyada bu cür mövqe tutmaqla heç nə əldə etmək olmaz”.
Rusiyanın Sovet dövründən indiyə qədər bir çox müttəfiqini itirdiyini deyən M.Zülfüqarlı hesab edir ki, Rusiya bu cür siyasəti dəyişməlidir, dünyaya inteqrasiya etməlidir.
İradə SARIYEVA
