Dövlət Miqrasiya Xidməti yanında İctimai Şuranın üzvləri Dövlət Miqrasiya Xidməti (DMX) yanında İctimai Şuranın sədri, sosial fəlsəfə üzrə fəlsəfə doktoru Allahverənov Azər Kərim oğlu, DMX yanında İctimai Şuranın sədr müavini, “Turizmə və Milli Mətbəxin İnkişafına Dəstək” İctimai Birliyinin təsisçisi Məmmədova Kəmalə Natiq qızı, DMX yanında İctimai Şuranın katibi, “Azərbaycan Uşaq və Gənclərin Sülh Şəbəkəsi” İctimai Birliyinin vitse-prezidenti Bağırov Kənan Sabir oğlu, DMX yanında İctimai Şuranın üzvü, “Regional Gender Mərkəzi” İctimai Birliyinin sədri Dadaşova Şərqiyə Ənvər qızı, DMX yanında İctimai Şuranın üzvü, Azərbaycan Qızıl Aypara Cəmiyyətinin Miqrasiya şöbəsinin müdiri Kətanov Məmməd Teymur oğlu, DMX yanında İctimai Şuranın üzvü, “Təkamül və İnteqrasiya” Beynəlxalq İctimai Birliyinin sədri Hüseyn Arzu Əfqan qızı, DMX yanında İctimai Şuranın üzvü, “Miqrasiya Sahəsinin İnkişafı” İctimai Birliyinin sədri Fətullayev Vidadi Bayram oğlu, DMX yanında İctimai Şuranın üzvü, “Psixososial Reabilitasiya və İnkişaf Mərkəzi” İctimai Birliyinin sədri Kərimova Lamiyə Ağa qızı, DMX yanında İctimai Şuranın üzvü, “Optimist” Sosial Problemlərin Həllinə Yardım İctimai Birliyinin sədri Niftalı Habil Abid oğlu Prezident İlham Əliyevə birgə müraciət ünvanmlayıblar. “Doğma Azərbaycanımızın əzəli torpaqları olan Dağlıq Qarabağın işğaldan azad olunması məqsədilə müzəffər Ordumuz tərəfindən sentyabrın 27-dən başlanan əks-hücum əməliyyatları bizi çox sevindirir. Tarix göstərdi ki, illərdir ürəyiyumşaqlığımız əslində başımıza bəla oldu. Sülhməramlı olmağımızdan istifadə edən mənfur düşmən 30 ilə yaxındır ki, torpaqlarımızı işğal altında saxlamaqla və sülh danışıqlarından yayınmaqla reallıqda onun təcavüzkar məqsədlərinə xidmət edən status-kvonu qorumağa çalışdı. İllərdir dünya birliyinin ədalətli mövqeyini gözlədik və qan tökülməsini istəmədik, torpaqlarımızın məhz danışıqlar yolu ilə azad olunmasını arzuladıq. Amma Azərbaycan xalqının səbir kasası doldu və bu səbəbdən Sizin verdiyiniz “Vur!” əmriniz hamı kimi bizi də qürurlandırdı. Dünyada yeganə millətik ki, müharibənin başlamasından deyil, bitməsindən qorxuruq, çünki bu, bizim haqq savaşımızdır. İstər şəhid ailələri, istər əsgər ailələri hər biri Qarabağın işğaldan olunması uğrunda döyüşün davam etməsini və hərb meydanında düşmənlərə bizim kim olduğumuzu göstərməyimizi istəyir”.
Dövlət Miqrasiya Xidməti yanında İctimai Şuranın üzvləri qeyd edirlər ki, qüdrətli Azərbaycan ordusu ön cəbhədə inamla irəliləyir. Öz Ali Baş Komandanına və öz xilaskar Ordusuna, vətənpərvər əsgərinə dərin inam bəsləyən xalqımızın isə coşqun milli qürur hissinə sahib olduğunu yazan müraciət müəllifləri bununla fəxr etdiklərini bildirirlər: “…Cəbrayıl şəhərinin, Ağdərə qəsəbəsinin, Suqovuşan və onlarla yaşayış məntəqələrinin və kəndlərinin 27 illik işğaldan azad edilməsi ilə bağlı xalqa tarixi müraciətiniz və son günlər xarici televiziya kanallarına verdiyiniz müsahibədə bir daha gördük ki, xalqın istəklərinin ən parlaq ifadəçisi və dünyada səsimizsiniz.
Biz, Dövlət Miqrasiya Xidməti yanında İctimai Şuranın bütün üzvləri dövlətimizin əsgəriyik. Əsgər səngərdə silahına yapışdığı kimi, biz də vətəndaş cəmiyyətinin fəalları olaraq imkanlarımız daxilində bu dövlətə xidmət edirik və bundan şərəf duyuruq. Biz Sizə güvənirik, ətrafınızda sıx birləşib bütün əmrlərinizi və qərarlarınızı alqışlayırıq. Ölkəmizin günü-gündən inkişaf etməsi, iqtisadiyyatımızın güclənməsi, həm də şanlı ordumuzun daha da qüdrətli olmasına, dünyanın inkişaf etmiş bir sıra dövlətlərinin orduları ilə bir cərgədə qərarlaşmasına səbəb oldu. Məhz bu uğurun sayəsində bu gün öz sözümüzü deyə bilir, qələbə sevincini yaşaya bilirik. Bütün bunlar əlbəttə Sizin güclü siyasətiniz, Vətənə və dövlətə olan sevginizdən irəli gəlir.
… Azərbaycanın Qələbə tarixini yazdınız! İllərdir gözlədiyimiz günləri, Zəfəri, bizlərə yaşatdınız. Allah Sizi və Ordumuzu, dövlətimizi və millətimizi qorusun. Hər zaman söylədiyiniz kimi, Zəfər, Qələbə bizimdir, Qarabağ Azərbaycandır!”
Baki-xeber.com
