Azərbaycan bir neçə gündür ki, öz ərazisində aktiv antiterror əməliyyatlarına başlayıb. Son proseslər göstərdi ki, Dağlıq Qarabağ problemi dünyada yaşayan bütün azərbaycanlıları dərindən narahat edir. Onlar bu problem ətrafında bir yumruq kimi birləşib, düşmən təbliğatına qarşı aktiv mübarizə aparırlar. Ötən yazılarımızda biz Diasporla İş Üzrə Dövlət Komitəsi ilə koordinasiyalı fəaliyyət göstərən təşkilatlarımızın Vətən müharibəsi çərçivəsində ölkəmizə, ordumuza verdikləri dəstəkdən danışmışdıq.
Hazırda Qarabağ uğrunda informasiya və diplomatiya savaşı bütün dünya boyu gedir. Bizim dünyada ermənilər qədər havadarlarımız olmasa da, biz haqlı tərəf sayıldığımız üçün arqumetlərimiz daha tutarlıdır. Bu səbəbdən də dünyanın hər yerində yaşayan azərbaycanlıların informasiya savaşında aktiv olmaları zəruridir. Qarabağ və ətrafında baş verənləri dünyaya olduğu kimi çatdırmaq üçün hər birimiz hər gün çalışmalıyıq. Əsgərimizin səngərdə canı bahasına əldə etdiyi qələbəni diplomatiya və informasiya savaşında uduzmamalıyıq. Bu istiqamətdə bütün dünyadakı diaspor təşkilatlarımızın və ayrı-ayrı diaspor fəallarının aktivliyi nəzərə çarpır. Vətən müharibəsinin getdiyi dönəmdə biz müxtəlif ölkələrdə yaşayan soydaşlarımızın Prezident İlham Əliyevə ünvanladıqları məktublardan da bu ruhu hiss edirik. Gəlin, həmin məktublardan bəzilərinə diqqət edək.
“Bütün bu faktlar məndə Azərbaycan və onun vətəndaşları haqqında yalnız müsbət fikirlər yaradıb”
İsrail dövlətinin Təl-Əviv şəhərindən Rafaeli David Merxaeviç Prezident İlham Əliyevə müraciətində qeyd edir ki, 2019-cu ildə ölkəmizə səfəri zamanı Azərbaycanın güclü və qüdrətli ölkəyə çevrilməsini gözləri ilə görüb: “Hər yerdə mərhum atanızın əməyini və hazırda Sizin səylərinizi gördüm ki, bunu da çox yüksək qiymətləndirirəm. Səfərim zamanı çox zəngin tarixə və mədəniyyətə sahib bir ölkə gördüyüm üçün xoşbəxt idim. Azərbaycanda İsrail Dövlətinə və yəhudi icmasına qarşı gördüyüm xoş münasibətə görə, cənab Prezident, Sizə xüsusi təşəkkür edirəm. Bütün bu faktlar məndə Azərbaycan və onun vətəndaşları haqqında yalnız müsbət fikirlər yaradıb. Sizə və ailənizə cansağlığı və xoşbəxtlik arzulayır, Tanrıdan torpaqlarınızın müharibələr olmadan tam sülh şəraitində Azərbaycan ərazisinə qayıtmasını diləyirəm”.
“Sizin uğurlu siyasətiniz sayəsində bu gün bütün dünya azərbaycanlıları birlik və həmrəylik nümayiş etdirir!”
Prezident İlham Əliyevə müraciətində Rusiya Federasiyasının Moskva şəhərindən Məmmədov Sahib Hüseyn oğlu bildirib ki, 30 ildən coxdur Vətəndən kənarda yaşasa da, ürəyi həmisə Vətənlə döyünüb və bu gün də döyünməkdədir: “Qoy Tanrı torpaglarımızı düsməndən azad etməkdə bizə, Azərbaycan xalqına, ölümün gözünə dik baxan Ordumuza komək olsun! Ulu öndərimizin və Sizin uğurlu siyasətiniz sayəsində bu gün bütün dünya azərbaycanlıları birlik və həmrəylik nümayiş etdirir! Sizə inanırıq, Sizi sevirik, Sizə arxayınıq! Yaşasın Azərbaycan! Qarabağ Azərbaycandır!”
“Cəbhə bölgəsindən gələn şad xəbərlər bizi - Ukraynada yaşayan bütün azərbaycanlıları sevindirir və qürurlandırır”
Bu fikirlər Ukraynanın Kiyev şəhərində yaşayan soydaşlarımız Qasımov Əbülfəz, Bağırov Ağasəlim, Turanlı Fərhad, Ələsgərov İlham, Mirzəyev Nicat, Tağıyev Rövşən, Abbasov İlqar və başqaları (Ukraynada yaşayan azərbaycanlı ziyalılar – 16 nəfər) tərəfindən Prezident İlham Əliyevə ünvanlanan müraciətdə yer alır. Məktub müəllifləri bildirir ki, həmin ölkədə yaşayan çoxsaylı həmvətənlərimizin adından Prezidentə və rəşadətli Azərbaycan Ordusuna səmimi minnətdarlıqlarını bildirmək istəyirlər: “30 ildir erməni işğalçıları tərəfindən zəbt edilmiş Azərbaycan ərazilərini - Dağlıq Qarabağ və 7 ətraf rayonunu işğaldan azad etmək və 1 milyon qaçqını öz yurd-yuvalarına qaytarmaq üçün çıxdığınız bu müqəddəs yolda Sizi dəstəkləyirik. Son günlər cəbhə bölgəsindən gələn şad xəbərlər bizi - Ukraynada yaşayan bütün azərbaycanlıları sevindirir və qürurlandırır. Qüdrətli Ordumuz Sizin əmrinizlə gücünü düşmən üzərində göstərir, onlara layiq olduqları cavabı verir.
Bu gün Sizin rəhbərliyiniz altında Milli Ordumuzun əsgərləri düşməni işğal olunmuş Azərbaycan torpaqlarından qovur. Dövlətimizin erməni təcavüzkarlarına qarşı informasiya müharibəsinin uğurla aparılmasında, erməni saxtakarlığını ifşa edən, təkzibedilməz dəlillərə əsaslanan publisistik və elmi əsərlərdən ibarət materialların Ukraynada davamlı şəkildə yayılmasında rol oynayan Ukraynadakı Azərbaycan ziyalıları müqəddəs Vətənimizin ərazi bütövlüyü uğrunda gedən haqq savaşında Azərbaycan dövlətinin və Milli Ordumuzun daim yanında olduğunu bəyan edir.
Siz və Sizin əmrinizdə olan qəhrəman Azərbaycan Ordusu düşmənlərimizə və bütün dünyaya göstərdi ki, biz əzəli-əbədi torpağımız olan Qarabağ uğrunda sona qədər döyüşməyə hazırıq. Tarixi ədalət bizim tərəfimizdədir.
Sizə dərin hörmətimizi və dəstəyimizi bildiririk. Hər an əmrinizdə olduğumuzu ifadə etmək istəyirik. Biz həmişə Vətənimiz Azərbaycanın yanındayıq və Sizin yürütdüyünüz siyasəti dəstəkləyirik.
Sizin rəhbərliyiniz altında torpaqlarımızın son qarışına qədər geri alınacağına inanırıq. Hər birimizin ürəyinə sevinc gətirən fərəhli Qələbə gününü səbrsizliklə gözləyirik.
Yolumuz haqq yoludur!
Qarabağ Azərbaycandır!”
“Düşməniniz düşmənimizdir, Sizə xainlik edən bizə xainlik etmişdir”
Türkiyə Respublikasının Kayseri şəhərindən Cem Küçüktürk də Prezident İlham Əliyevə müraciət edib: “Sizə böyük hörmətlərimi çatdıraraq, Türkiyədə hər bir kəsin ürəyinin, canının bir hissəsinin Azərbaycandakı qardaşlarımızın yanında olduğunu bildirirəm. Şəhidlərinizə görə, başda Siz olmaqla, Azərbaycan xalqına başsağlığı verir, yaralılara şəfa diləyirəm. Allahım hamınızın yar və yardımçısı olsun. Yaşamış olduğunuz xain hücum haqqında eşidəndə mütəəssir oldum. Amma əmin idim ki, Azərbaycan xalqın köməyi ilə bu təcavüzün də öhdəsindən gələcək. Düşməniniz düşmənimizdir, Sizə xainlik edən bizə xainlik etmişdir. Qələbənizə mübarək olsun deyir, bütün türk milləti adından yanınızda olduğumuzu bildirirəm”.
“Azərbaycan var olduqca, Siz də yaşayacaqsınız”
Birləşmiş Ərəb Əmirliklərinin Dubay şəhərindən Prezident İlham Əliyevə müraciət edən Ağayev Ələsgər Tofiq oğlu bildirir ki, sadə cümlələrlə ürək sözlərini ifadə edib təşəkkür etmək istəyir:
“Harada yaşamağımızdan asılı olmayaraq, hamımız Sizin arxanızda dağ kimi dayanmışıq. Sizin dediyiniz hər bir sözün, hər bir bəyanatın arxasında xalq dayanıb. Sizin hər çıxışınız dünyaya səs salır, düşmənlərə, hətta güclü dövlətlərdən olan havadarlara meydan oxuyur, Azərbaycanın qəti mövqeyini ortaya qoyur. Var olun, yüz yaşayın. Azərbaycan var olduqca Sizdə yaşayacaqsınız. Azərbaycan isə hər zaman var olacaq, deməli, Siz də yaşayacaqsınız”.
“Durmaq yox, ancaq irəli getmək lazımdır”
Almaniyanın Köln şəhərindən Rəşad Quliyev isə bunları yazır: “Hörmətli cənab Prezident. Sizin komandanlığınızla rəşadətli Azərbaycan Ordusunun əldə etdiyi üstünlüklər və qələbə xəbərləri Dünya Azərbaycanlıları Assambleyası üzvlərini də son dərəcə sevindirir. İllərdir həyata keçirdiyiniz uğurlu xarici siyasətiniz bu gün də öz bəhrəsini verir. Biz də dünya azərbaycanlıları olaraq bu siyasətinizi dəstəkləyirik və bu yolda üzərimizə düşən öhdəlikləri layiqincə yerinə yetirməyə çalışırıq. Qeyd etmək istərdim ki, biz də öz növbəmizdə Ermənistanın işğalçılıq siyasətini, vandal rəftarını, terrorçu və antihumanist addımlarını dünya ictimaiyyətinə çatdırırıq. Son günlərdə informasiya müharibəsi zəminində bu təşəbbüslərimizi intensivləşdirmişik. Nəzərinizə çatdırmaq istərdim ki, Sizin “Qarabağ Azərbaycandır!” şüarınız beynəlxalq aləmdə devizimizə çevrilib. Dünya azərbaycanlıları yekdilliklə Sizin arxanızdadır. Hörmətli cənab Prezident, dünya azərbaycanlıları birmənalı şəkildə Sizin mövqeyinizi dəstəkləyir və erməni işğalçılar işğal olunmuş əraziləri tərk etməyənədək durmaq yox, ancaq irəli getmək lazımdır”.
“Torpaqlarımızı düşmənlərdən azad etməyə son damla qanımıza qədər hazırıq”
Qazaxıstanın Almatı şəhərindən Qəhrəman Sadiyev yazır: “Möhtərəm Prezident, cənab Ali Baş Komandan. Biz xaricdə yaşayan azərbaycanlılar son günlərdə Azərbaycanın işğal altında olan Dağlıq Qarabağ və ətraf rayonlarında Sizin rəhbərliyinizlə ordumuzun terrorçulara qarşı apardığı mübarizədə Sizi dəstəkləyirik. Uzun illər düşmən tapdağı altında inləyən torpaqlarımızın azad olunması naminə apardığınız ədalətli mübarizədə Sizinləyik və hər zaman Sizin yanınızda olduğumuzu bəyan edirik. Qürurla, mətanətlə döyüşməyə, torpaqlarımızı düşmənlərdən azad etməyə son damla qanımıza qədər hazırıq”.
Diasporumuzun təmsilçiləri olan ayr-ayrı fərdlərin ölkə başçısına ünvanladıqları məktublardakı məzmunları necə qiymətləndirmək olar?
“Soydaşlarımız kütləvi şəkildə səfirliklərə müraciət edib, ərazi bütövlüyümüz uğrunda döyüşlərdə iştirak etmək istədiklərini bildirirlər”
Beynəlxalq Diaspor Mərkəzinin rəhbəri İsmayıl Ağayev “Bakı-Xəbər”ə açıqlamasında bildirdi ki, doğrudan da biz xalqımızın və dünyada yaşayan soydaşlarımızın sıx birliyini görürürk:
“ Ölkənin daxilindəki birlik və həmrəyliyin şahidiyik. İnsanlar həvəslə orduya yardım edir. Gənclərimiz böyük əzmlə ordu sıralarına qoşulurlar. Hətta növbələr müşühidə edilir. Ön xəttə könüllü yardımlar aparılır. Eyni mütəşəkkilliyi biz diaspor təşkilatlarımızdan da görürük. Onların nümayəndələri belə vəziyyətdə ordumuza həm maddi, həm mənəvi, həm də böyük informasiya dəstəyi verir. Çoxlu sayda diaspor nümayəndələrimiz vəsait göndərib, Orduya yardımlar edirlər. Dövlət Miqrasiya Xidmətinin hazırladığı bir videoçarxı gördüm. Görünür ki, ölkəmizdə yaşayan bir qrup əcnəbi vətəndaş şanlı ordumuza dəstək nümayiş etdirib. Eyni hal xarici ölkələrdə də yaşanır. Qeyri millətlərin üzvləri baş verənləri görüb, bizə yardım göstərirlər. Mən bir neçə ölkə ilə əlaqə saxlamışam. Soydaşlarımız kütləvi şəkildə səfirliklərə müraciət edib, ərazi bütövlüyümüz uğrunda döyüşlərdə iştirak etmək istədiklərini bildirirlər. Bu milli birliyi şərtləndirən bir çox amillər var. Onlardan ən başlıcası Ali Baş Komandanın apardığı qətiyyətli və düzgün siyasətidir. Bunun arxasında duran amillər Ordunu qələbəyə daha da ruhlandırır. Biz bütün bunların şahidi oluruq. Ölkə başçıısına ünvanlanan məktublarda biz onun işinə, səriştəsinə verilən yüksək qiyməti aydın hiss edirik”.
Bütün bunlar bir daha sübut edir ki, bu mübarizədə bütün dünya azərbaycanlıları vahid mövqedən çıxış edir.
Məhəmmədəli QƏRİBLİ
Yazı Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun maliyyə dəstəyilə çap olunur.
