BBC Ermənistanın Gəncəyə raket hücumu ilə bağlı reportaj yayımlayıb və hadisəni açıq-aşkar mülki əhalinin hədəfə alınması olaraq qiymətləndirib. Reportajda Ermənistanla Azərbaycan arasında əldə edilmiş razılaşmanın ilk 24 saatda pozulduğu qeyd edilir. Diqqətə çatdırılır ki, Gəncə şəhərində yaşayış binasına atəş açıldıqdan sonra Azərbaycan Ermənistanın müharibə cinayəti törətdiyini bildirir.
Bununla yanaşı, reportajda Ermənistanın raket hücumu nəticəsində dağılmış evlərin, yaxınlarını itirmiş insanların görüntüləri təqdim edilir. BBC-nin hadisə yerində olan müxbiri dağıntıları göstərərək “Azərbaycanın ikinci ən böyük şəhəri olan Gəncədə bu insanların yaşadığı yerlərdən görün geriyə nə qalıb”, - deyə qeyd edir. Vurğulanır ki, bu, açıq-aşkar mülki əhalinin hədəfə alınmasıdır. “Bu dağılmış binalarda, mənzillərdə insanlar yaşayırdılar. Dağıntılar arasında yataqlar, yorğan-döşək görmək mümkündür. Hücum yerli vaxtla gecə saat 2-də baş verib.
Atəşkəs olmalı idi, lakin bu, əsl müharibənin əlamətləridir. Bəs indi nə olacaq? Atəşkəs artıq bitdimi? Bu suallarla Prezidentin köməkçisi Hikmət Hacıyevə müraciət etdik. H.Hacıyev dedi ki, əgər Ermənistan azərbaycanlı mülki əhaliyə hücumu davam etdirsə, Azərbaycan Ermənistanın hərbi hədəflərinə qarşı lazımi tədbirləri görmək məcburiyyətindədir. “Siz deyirsiniz ki, onlar sizə atəş açıb və sizin buna cavab vermək hüququnuz var. Bunlardan hansı olacaq? Siz atəşkəsə davam edirsiniz, yoxsa bu hücuma cavab verəcəksiniz” sualına cavabında Prezidentin köməkçisi deyib: “Hazırda biz atəşkəs rejiminə sadiq qalmışıq. Ancaq ermənilər Azərbaycanın mülki əhalisinə hücum etməyə davam etsələr, dünyadakı bütün dövlətlər kimi, bizim də özünümüdafiə hüququmuz var”.
Jurnalist raket hücumu nəticəsində dağılmış evlərdən birinin içərisindən də görüntüləri təqdim edir və dağıntılar arasındakı yorğan-döşəyi göstərərək “evin sakininin nəvələri bu yataqda yatırdılar, xoşbəxtlikdən onlar sağ qala biliblər”, - deyir.
“Dünya ictimai rəyini formalaşdıran BBC-nin bu barədə yazması ermənilər üçün böyük bir zərbədir”
Azərbaycan Mətbuat Şurasının sədr müavini, tanınmış media eksperti Müşfiq Ələsgərli bizimlə söhbətində bildirdi ki, BBC-nin Ermənistanın Gəncədə törətdiyi terror hadisəsini işıqlandırması Ermənistanın Azərbaycan xalqına qarşı həyata keçirdiyi vandalizim aktının ifşa olunmasında böyük rol oynayıb. “BBC transmilli KİV-dir, dünyanın çox böyük nüfuza malik KİV-indən biridir. Demək olmaz ki, orada hər şey qayda-qanunla gedir. Böyük Britaniyanın maraqları ortaya çıxanda BBC-i tərəf tutur. Amma digər məsələlərdə isə obyektiv davranmağa üstünlük verir, belə deyək, öz imicini qorumağa çalışır. Uzun illərdir bu müşahidə olunur. Britaniyanın marağı olmayan savaşla, digər məsələlərlə bağlı obyektiv işıqlandırma aparması təbii qəbul olunmalıdır. Məsələnin ikinci tərəfi də odur ki, BBC yaxşı bilir ki, burada gizlədiləsi bir şey yoxdur və bu məsələdə obyektiv mövqe tutsalar, öz imiclərini qorumuş olarlar. Azərbaycan dövləti, hökuməti bu məsələdə çox operativ işlədi. Ermənistan tərəfindən Gəncənin raketlə vurulmasından sonra Gəncəyə xarici səfirliklərin və bir sıra beynəlxalq KİV-in nümayəndələri dəvət edildi, hadisələr onlara yerində göstərildi. Yəni bu, operativ şəkildə elə işləndi ki, onun üzərinə başqa ad qoymaq mümkün olmasın. Gəncədə baş verənlər bütün dünyaya göstərildi ki, bu terror aktını dinc əhaliyə qarşı Ermənistan törədib və bu bir erməni terroru, erməni vandalizmidir. Bu, həmçinin, Ermənistanın beynəlxalq normativlərə əhəmiyyət verməməsinin göstəricilərindən biridir. Bu baxımdan, Azərbaycan öz işini elə qurdu ki, bu terror hadisəsinə fərqli və saxtakar yanaşma sərgilənməsin. Burada həm BBC-nin öz imicini qorumaq baxımından obyektivlik etməsi, digər tərəfdən, Azərbaycanın bu terror aktı ilə bağlı ətraflı məlumatlar verməsi BBC-nin reallıqları yaymasına səbəb oldu. BBC, bir növ, bu reallıqları yaymağa məcburdur. Çünki fakt göz qarşısındadır. BBC-nin Ermənistanın Gəncəni raket atəşinə tutması faktını yayımlaması və hadisəyə münasibət bildirməsi erməni vandalizminin beynəlxalq aləmdə ifşa edilməsi baxımından böyük hadisədir. BBC dünyanın ən böyük KİV şirkətlərindən biridir, bəlkə də birincisidir. Dünyanın hər yerində siyasi mərkəzlər tərəfindən izlənir, hər yerdə diqqətlə, sayğı ilə qarşılanan bir KİV qurumudur. Dünyada BBC haqqında bir fraza quraşdırıblar. Deyirlər ki, dünyada hanısa bir hadisə baş veribsə və BBC onu yazmayıbsa, demək, o hadisə baş verməyib, yox, hadisə yoxdursa, BBC onun haqqında yazıbsa, demək, o hadisə baş verib. Təbii ki, belə böyük, dünya ictimai rəyini formalaşdıran BBC-nin bu barədə yazması ermənilər üçün böyük bir zərbədir, Ermənistanın informasiya cəbhəsinin yarılmasıdır”.
M.Ələsgərli onu da vurğuladı ki, keçən əsrin 90-cı illərində Qarabağ müharibəsi zamanı Azərbaycanın ciddi informasiya blokadasında olması bizim geri düşməyimizə səbəb olub. O qeyd etdi ki, bizim o zaman informasiya yaymaq imkanlarımız məhdud olub, bu da həmin dövrdə bizə ciddi problemlər yaradıb. “Bu dəfə isə belə olmadı. Sağ olsun dövlətimiz, informasiya məsələsini çox yüksək səviyyədə qurub. Cənab Prezident özü də informasiya cəbhəsində gedən proseslərə çox ciddi diqqət yetirir. Mən “Facebook” hesabımda da yazmışam, qısa müddət ərzində cənab Prezident şəxsən 10 nüfuzlu beynəlxalq KİV qurumuna müsahibələr verib. Bu özü çox böyük işdir. Prezidentin köməkçisi Hikmət Hacıyev intensiv olaraq xarici KİV-də çıxışlar edir. Bu baxımdan, beynəlxalq KİV-in informasiyası Azərbaycanın xeyrinə yönləndirilir. Əlbəttə, CNN-də, başqa KİV qurumlarının da yayımladığı müsahibələr, məlumatlar çox qiymətlidir. Bunların içində BBC-nin yanaşması çox diqqətəlayiqdir” - deyə M.Ələsgərli qeyd etdi.
İradə SARIYEVA
