“Hesab etmirəm ki, indi Ermənistanda bir inqilab baş verməsi və qatı millətçilərin, radikalların, azərbaycanofobların hakimiyyətə gəlməsi Azərbaycanın xeyrinə olar”. Bunu Prezident İlham Əliyev Rusiyanın RBK televiziya kanalına müsahibəsində deyib.
Ölkə başçısının sözlərinə görə, münaqişəni siyasi yolla həll etməyə üstünlük verilməlidir: “Uzun illər boyu bizim bütün fəaliyyətimiz buna yönəlmişdi. Bu səbəbdən, dünən və bu gecə Moskvada aparılmış məsləhətləşmələr çərçivəsində biz onlardan danışıqlar masası arxasında tam təslim olmalarını tələb etdik. Başa düşürük ki, Paşinyan rejimi yetərincə zəifləyib. Bu rejim daxili siyasi səbəblərə görə eskalasiyadan əvvəl də zəifləmişdi. İndi daha çox zəifləyib. Mən hesab etmirəm ki, indi Ermənistanda bir inqilab baş verməsi və qatı millətçilərin, radikalların, azərbaycanofobların hakimiyyətə gəlməsi Azərbaycanın xeyrinə olar. Buna görə biz razılaşdırılmış bəyanat çərçivəsində konkret tarixlər göstərilməsində təkid etmədik. Lakin şübhəsiz ki, bu, erməni işğalçı qüvvələrinin bizim ərazilərdən razılaşdırılmış şəkildə çıxarılmasını nəzərdə tutur. Bəyanatda substantiv danışıqlara, yəni baza prinsiplərinə istinad edilir, orada isə hər şey konkret yazılıb: beş rayon nə vaxt azad ediləcək, daha iki rayon nə vaxt azad ediləcək”.
Göründüyü kimi, Prezident indiki məqamda Ermənistanda yeni inqilabın baş verməsinin Azərbaycan üçün məqbul olmadığını deyib. Ümumilikdə, bunun bir sıra səbəbləri var. Maraqlıdır, bəs ekspertlər bunu necə şərh edir?
“Prezident humanitar atəşkəsə razılıq verməklə, bir növ, Paşinyana şans verdi ki, ağıllı ol”
Məsələyə münasibət bildirən AMİP funksioneri Əli Orucovun sözlərinə görə, indiki məqamda Paşinyanın devrilməsi Azərbaycanın maraqlarına uyğun deyil: “Əvvəla, Paşinyan kimi sarsaq siyasətçinin buraxdığı ciddi səhvlər cəbhə bölgəsində status-kvonu dəyişməyə unikal şans yaradıb. Bunun sayəsində şanlı Azərbaycan Ordusu düşmənə güclü zərbələr endirərək ərazilərimizin müəyyən hissəsini azad edib. Ən başlıca məqamlardan biri də ondan ibarətdir ki, ordumuz 1994-cü ildə imzalanan atəşkəsdən üzü bəri Ermənistanın illərlə qurduğu müdafiə mövqelərinin böyük hissəsini məhv edib. Düşmənin gözləmədiyi yerlərdən hücum edərək vacib yaşayış məntəqələrini və strateji əhəmiyyətli yüksəklikləri işğaldan azad edib. Xüsusən də Hadrut qəsəbəsinin azad edilməsi işğalçı Ermənistana çox güclü zərbə oldu. Onlar heç cür bunu həzm edə bilmirlər. Erməni tərəfi Füzuli şəhərindən əvvəl Cəbrayılın azad ediləcəyini gözləmirdi. O üzdən, bütün qüvvələrini Füzuli şəhəri istiqamətində cəmləşdirmişdilər. Ordumuz uğurlu strateji və taktiki manevr edərək vacib uğura imza atdı. Eyni zamanda, ötən dövr ərzində çoxsaylı düşmən texnikası və canlı qüvvəsi məhv edildi. Bütün bunlara rəğmən, indiki şəraitdə Paşinyanın devrilməsi Azərbaycanın maraqlarına uyğun deyil. Ən azı ona görə ki, Paşinyanın hakimiyyətə gəlməsi Rusiyanın layihəsi deyildi. Paşinyandan əvvəl 20 il Ermənistanı “Qarabağ klanı” idarə edib. Bu klanın təmsilçiləri olan Robert Köçəryanla Serj Sarkisyan Rusiyanın bir nömrəli vassalları olub. Eyni zamanda, adıçəkilən şəxslər bilavasitə Qarabağdakı separatizmə və ərazilərimizin işğalına rəhbərlik ediblər. Onların da arxasında Rusiya dayanıb. Sonra da həmin qüvvələr Rusiyanın yardımı ilə prezident Levon Ter-Petrosyanı devirib Ermənistanda hakimiyyəti qamarlayıblar. İndi həmin qüvvələr Ermənistanda müxalifətdədir. Ancaq deməzdim ki, Ermənistan ictimaiyyətində onların ciddi nüfuzu var. Sadəcə, Qarabağ cəbhəsində Ermənistanın üzləşdiyi məğlubiyyət “Qarabağ klanı”nın yenidən hakimiyyətə gəlməsinə yol aça bilər. Onlar hakimiyyətə gəlsə, danışıqlarda daha sərt mövqe tuta bilərlər. Zatən biz bunu 1998-2018-ci illərdə görmüşük. O üzdən, Prezident İlham Əliyev humanitar atəşkəsə razılıq verməklə, bir növ Paşinyana şans verdi ki, ağıllı ol. İndi Paşinyanın bundan nə dərəcədə düzgün nəticə çıxaracağı yaxın zamanlarda bəlli olacaq”.
Siyasi ekspert hesab edir ki, Azərbaycan diplomatik cəbhədə hücumlarını bir az da artırmalıdır.
Vidadi ORDAHALLI
