"Ermənistan atəşkəs rejimini kobud şəkildə pozub, Gəncə şəhərinin dinc sakinlərini raketlə atəşə tutub. Bu, müharibə cinayətidir və Cenevrə konvensiyalarının kobud şəkildə pozulmasıdır". Bunu Prezident İlham Əliyev “Tvitter” hesabında yazıb.
Dövlət başçısı həmçinin qeyd edib ki, həmin raket hücumu Ermənistanın Vardenis rayonundan həyata keçirilib. Prezident qeyd edib ki, indiyədək ümumilikdə Azərbaycanın 41 mülki şəxsi həlak olub, 200 nəfərdən çoxu isə yaralanıb: “Ermənistan tərəfinin məqsədi işğaldan azad edilmiş əraziləri yenidən işğal etməkdir". Dövlət başçısı bildirib ki, Ermənistanın hərbi-siyasi rəhbərliyi törətdiyi cinayətlərə görə məsuliyyət daşıyır: “Azərbaycan tərəfi bütün bunlara layiqli cavab verəcək!”
Maraqlıdır ki, Ermənistan bu addımı Rusiyada tərəflər arasında əldə olunan humanitar atəşkəs razılaşmasının qüvvəyə minməsindən bir neçə saat sonra atıb. Bu, açıq-aşkar Rusiyanın vasitəçiliyi ilə aparılan danışıqlara hörmətsizlikdir. Maraqlıdır, Rusiya Ermənistanın bu addımına niyə sərt reaksiya vermir?
Böyük Azərbaycan Partiyasının sədri Elşad Musayev “Bakı-Xəbər”ə açıqlamasında bildirdi ki, ölkə başçısının həmin kanala müsahibəsində bir çox məsələlərə açıq şəkildə aydınlıq gətirilib: “Prezident müsahibəsində qeyd etdi ki, humanitar atəşkəs Rusiyanın vasitəçiliyi ilə imzalansa da, Ermənistanın Vardenis rayonu ərazisindən Gəncəyə raket atılıb. Prezidentin bu açıqlamasından belə nəticə çıxdı ki, Ermənistan Rusiyaya da hörmətsilik edir. Həm də Rusiyanın fəaliyyətsilikdə günahlandırılması mənasını da kəsb edə bilərik. Bir tərəfdən atəşkəs təşəbbüsü ilə çıxış edirlər, arxada isə Ermənistanın dinc əhalini hədəfə almasına göz yumurlar. Belə çıxır ki, Ermənistan üzərinə götürdüyü öhdəliklərə əməl etməyəcək, Rusiya da həmin ölkəni gizli şəkildə dəstəkləməkdə davam edəcək. Biz müxalif qüvvələr olaraq bu məsələnin üstünə daha ciddi şəkildə getməliyik. Elə detallar var ki, onların hakimiyyət tərəfindən açıq etiraf olunması gərək deyil. Bunu müstəqil adamlar və ya digər təsisatlar etməlidir. Biz açıq deyirik ki, Rusiya bu prosesdə Ermənistana birmənalı şəkildə dəstək verir. Görünən budur ki, əldə olunan atəşkəs də formal xarakter daşıyır. Həmsədr ölkə kimi Rusiya və Fransa vaxtında bu məsələnin nizamlanması ilə bağlı üzərlərinə düşən öhdəlikləri yerinə yetirmədilər. İndiki məqamda isə bizim uğurlu əməliyyatlarımızı dayandırmaq istədilər. Bununla Ermənistan üçün güzəşt qoparmağı planlayırlar. Zaman dəyişib. Açıq deməliyik ki, bu proseslə bağlı aparılan danışıqlar masasında Türkiyənin olması mütləqdir. Heç bir ölkədən çəkinmədən bunu etməliyik. Azərbaycan 90-cı illərin əvvəlindəki mövqeyindən çəkilməlidir. Azərbaycan cəmiyyətinin Türkiyəyə münasibəti birmənalı olaraq müsbətdir. Hamı Türkiyəni bu prosesdə yaxından görmək istəyir. Türkiyə də üzərinə düşən nə varsa onu edir”.
Müsahibimizin sözlərinə görə, bu məsələdə bizim cəmiyyət olaraq üzərimizə ağır yük düşür: “Bu məsələdə hakimiyyəti tək buraxmamalıyıq. Həm media, həm müxalifət fəallıq göstərməlidir. Biz əlimizdən gələn dəstəyi veririk, bundan sonra da verməyə hazırıq. Açıq deyirik ki, bu məsələdə həməsdrlər Ermənistanın tərəfini tutur. Gəncə hadisəsinə görə biz onların sərt bəyanatını görməliydik. Oldumu? Deməli, bu nizamlanma formatında Türkiyə mütləq şəkildə olmalıdır. Rusiya Ermənistanın atdığı imzaya etdiyi hörmətsiliyə görə ona sərt söz demirsə, deməli, planda onun da əli var. Rusiyadan çox da çəkinməməliyik. Bu, əvvəlki qüdrətdə olan Rusiya deyil. Ya Rusiya neytral mövqe tutmalıdır, ya da prosesdən kənara çəkilməlidir”.
Təbiidir ki, atəşkəs yalvarışlarını edən Ermənistanın birdən-birə cəsarətlənib dinc əhalini ballistik raketlə hədəfə alması təsadüfi deyil. Azərbaycanın mövqeyi prinsipialdı və belə təxribatlar bizi mövqeyimizdən yayındıra bilməz.
Məhəmmədəli QƏRİBLİ
