“...Rusiyaya münasibət məsələsinə gəldikdə isə sizə bir fakt göstərə bilərəm. Pandemiyaya qədər bizdə Azərbaycana səfər edən Rusiya vətəndaşlarının sayı hər il təxminən 15-20 faiz artırdı. Keçən il bu göstərici bir milyona yaxın olub. Mən həmişə demişəm, rusiyalıları buraya cəlb edən təkcə bizim mətbəximiz, təkcə çimərliklər, təkcə tarix deyil, həm də odur ki, onlar burada özlərini rahat hiss edirlər. Öz mühitlərində olduğu kimi hiss edirlər, burada insanlarla rus dilində danışırlar.
Yəqin bilirsiniz ki, bizdə, Azərbaycanda təhsilin rus dilində olduğu neçə məktəb var. Onların sayı 300-dən çoxdur. Heç yerdə belə deyil. Rusiya ali məktəbləri, onların filialları. Rusiyanın musiqi, teatr kollektivləri pandemiyaya qədər, demək olar ki, hər həftə burada olurdu. Buna görə də Rusiyaya və Rusiya Federasiyasında yaşayan ruslara Azərbaycanda yalnız müsbət münasibət var. Siz artıq bir neçə gündür ki, buradasınız və erməni işğalı amilinin insanların ovqatına nə dərəcədə təsir göstərdiyini bilirsiniz. İnsanlar hər bir sözü, hər bir jesti, hər bir mimikanı duyurlar. Əlbəttə, açıq deməliyəm, bu müddətdə, bu günlər, bu həftələr ərzində bəzi Rusiya kanallarında qatı anti-Azərbaycan təbliğatını, tok-şouların iştirakçılarının saxtakarlığını, manipulyasiyasını, iştirakçılar heyətinin tarazlaşdırılmış olmamasını görəndə, Rusiyanın aparıcı telekanallarında Azərbaycan xalqı, Azərbaycan Prezidenti təhqir ediləndə, əlbəttə, bunlar Rusiyanın nüfuzunu artırmır. Mən bu məsələni Rusiya rəhbərliyinin diqqətinə çatdırmışam. O mənada yox ki, bunlar bizi narahat edir, Azərbaycan cəmiyyəti və ictimai fikri Azərbaycanın daxilində formalaşır. O mənada ki, belə münasibət haçansa bizim planlarımızda müəyyən çətinliklərə gətirib çıxara bilər. Rusiya ilə biz qarşılıqlı əlaqələri daha da inkişaf etdirməyi planlaşdırırıq. Hazırda biz iqtisadi və digər sahələrdə əməkdaşlıq üzrə beş yol xəritəsi üzərində fəal iş aparırıq. Siyasi baxımdan çox yaxşı məsələlər var. Lakin bu müddətdə Rusiya mediasında üzləşdiyimiz informasiya hücumu, əlbəttə, ictimai fikirdə Rusiyaya münasibətə böyük ziyan vurub. Düşünürəm ki, bu vəziyyəti qaydaya salmaq üçün vaxt və hər iki tərəfin rəhbərliyinin səyləri lazım gələcək”.
Bu fikirləri oktyabrın 10-da Azərbaycan Respublikasının Prezidenti İlham Əliyev Rusiyanın RBK televiziya kanalına müsahibəsində bildirib.
“Başda Vladimir Solovyovun verilişi olmaqla, bəzi verilişlərdə açıq şəkildə bizə qarşı bu cür ədalətsiz, xoşagəlməz münasibətlərə yol verilir”.
Ölkəmizdə nəşr edilən rusdilli “Novoye vremya” qəzetinin baş redaktoru Şakir Ağayev “Bakı-Xəbər”ə şərhində bildirdi ki, Prezident İlham Əliyev Rusiyanın RBK televiziya kanalına müsahibəsində real vəziyyəti açıqlayıb. “Prezident sözügedən telekanala müsahibəsində səsləndirdiyi fikirlərlə göstərdi ki, Rusiya telekanallarında yayımlanan bəzi şovinst verilişlərdə bizə qarşı səsləndirilən haqsız ittihamlar Azərbaycan-Rusiya münasibətləri məsələsində ictimai rəydə gərginliklər yarada bilər. Prezident nələri nəzərdə tutub? Təbii ki, cənab Prezident açıq şəkildə bildirdi ki, Rusiyanın bəzi telekanallarında bəzən anti-Azərbaycan mövqeyinin sərgilənməsi, Azərbaycan xalqının və Prezidentin təhqir olunması hallarına rast gəlinir. Bilirsiniz ki, başda Vladimir Solovyovun verilişi olmaqla, bəzi verilişlərdə açıq şəkildə bizə qarşı bu cür ədalətsiz, xoşagəlməz münasibətlərə yol verilir, anti-Azərbaycan mövqeyi sərgilənir, onlar ermənilərin haqısız mövqeyini dəstəkləyirlər. Bunların qarşısı alınmalıdır.
Sözsüz ki, bu bütün verilişlərə aid deyil. Şəxsən, sevinərəm ki, bu gün əvvəlkilərdən fərqli olaraq, Azərbaycanın haqlı, ədalətli mövqeyini müdafiə edən Rusiya politoloqları var. Markovun, Şevçenkonun və başqalarının adını çəkə bilərik. Bilirsiniz, Prezident bu fikri səsləndirməklə onların nəzərinə çatdırdı ki, Azərbaycana qarşı sərgilənən haqsız münasibətlər ictimai rəyə təsir göstərir. Yəni bəzi Rusiya kanallarında nümayiş olunan və bizə qarşı qərəzli mövqe sırgilənən verilişlərə baxandan sonra Azərbaycan vətəndaşlarında, sosial şəbəkələrdə, ictimaiyyətdə Rusiya haqqında müxtəlif mənfi rəylər, fikirlər formalaşır, bu da Azərbaycan-Rusiya münasibətlərinə mənfi təsir göstərir. Belə deyək, gələcəkdə Azərbaycan-Rusiya münasibətləri hər iki ölkənin rəhbərliyi tərəfindən daha geniş şəkildə qurulanda, təbii ki, bütün bunlar, xalqın fikri, ictimai rəy nəzərə alınacaq. Bu cür mənfi rəylə də yeni münasibətləri qurmaq daha çətin olur. Prezident bunları nəzərdə tutur ki, belə məsələlərə yol vermək olmaz, çünki bizim gələcəkdə daha böyük işlərimiz var, elə edilməlidir ki, bu münasibətlər qurulanda ictimai rəy ona maneçilik törətməsin. Prezident bunu açıq deyir və bunu Rusiya rəhbərliyinin də nəzərinə çatdırıb.
Mən belə hesab edirəm ki, Azərbaycanın haqlı, ədalətli mövqeyi Rusiya mətbuatında daha geniş şəkildə müzakirə olunmalıdır. Burada Azərbaycanın müdafiəsindən söhbət getmir, haqqın, ədalətin müdafiəsindən gedir”.
Ş.Ağayevin sözlərinə görə, Rusiya özü də vaxtilə separatizmlə üzləşmiş bir dövlət olub və bu ölkə separatizmə qalib gəlib, öz ərazi bütövlüyünü qoruyub saxlayıb, bu onun daxili işi olub və daxili işi kimi də onun öhdəsindən uğurla gəlib. “Bu gün Azərbaycan da separatizmlə, terrorizmlə mübarizə aparır, öz ərazi bütövlüyünün bərpası uğrunda mübarizə aparır, öz tarixi, əzəli torpaqlarını işğaldan azad edir. Prezident istəyir ki, Azərbaycanın öz ərazi bütövlüyünün bərpası uğrunda terrorçuluqla, separatizmlə mübarizə apardığı, dövlətimizin haqlı mövqeyi, haqq yolunda olduğu Rusiya ictimaiyyətinə, cəmiyyətinə, rusdilli auditoriyaya bu şəkildə çatdırılsın. Prezident nəzərdə tutur ki, bu məsələ belə olarsa, təbii, Azərbaycan-Rusiya münasibətlərində ictimai rəydə daha yaxşı, daha obyektiv fikirlər formalaşa bilər” - deyə Ş.Ağayev vurğuladı.
İradə SARIYEVA
