Qarabağ cəbhəsində düçar olduğu böyük uğursuzluq terrorçu Ermənistanın başqa yollara, daha iyrənc üsullara əl atması ilə nəticələnib. Terrorçu ölkənin siyasi-hərbi rəhbərliyi öz uğursuzluğunu ört-bastır etmək üçün tarixdə analoqu olmayan cinayətlər törətməkdə davam edir.
Azərbaycan Ordusunun qarşısında duruş gətirə bilməyən düşmən sentyabrın 27-dən başlayaraq ardıcıl olaraq yenidən ölkəmizin şəhər və kəndlərini, yaşayış məntəqələrini uzaqvuran raketlərlə, artilleriya silahları ilə atəşə tutur, mülki əhalimizi qətlə yetirir, ağır şəkildə yaralayır. Ermənistan nəinki cəbhəyanı yaşayış məntəqələrimizdə bu kimi cinayətlər törədir, bildiyimiz kimi, cəbhədən çox-çox uzaqda yerləşən şəhərlərimizi, qəsəbələrimizi də atəşə tutur, düşmən ölkənin hücumu nəticəsində insanlarımız həlak olurlar.
Son günlər düşmən ölkə respublikamızın ikinci böyük şəhəri Gəncəni bir neçə dəfə atəşə tutub.
Ermənistan ordusunun Gəncənin mərkəzindəki çoxmənzilli yaşayış binalarını raket atəşinə tutması nəticəsində 9 nəfər həlak olub, 40-a yaxın şəxs yaralanıb.
Məlum olduğu kimi, işğalçı Ermənistan Respublikasının silahlı qüvvələri beynəlxalq hüququn norma və prinsiplərini, 1949-cu il tarixli Cenevrə Konvensiyaları və onların Əlavə Protokollarını, habelə 10 oktyabr 2020-ci il tarixdə saat 12:00-dan etibarən elan edilmiş humanitar atəşkəs rejiminin tələblərini pozaraq, Azərbaycanın dinc əhalisini qəsdən hədəfə alıb, yaşayış məntəqələrini ağır artilleriyadan atəşə tutaraq terror əməllərini davam etdirir.
Öz cinayətlərini Azərbaycanın digər şəhərlərinə qarşı da davam etdirən Ermənistan Mingəçevir, Bərdə, Ağdam, Beyləqan, Goranboy və digər şəhərlərimizi də tez-tez atəşə tutur.
Ermənistanın cinayətkar hərbi-siyasi rəhbərliyinin özü də açıq şəkildə bildirib ki, bizim hədəfimiz Azərbaycanın dinc əhalisidir, onları öldürmək, ev-eşiklərini dağıtmaq, onları xof, qorxu içində yaşatmaq istəyirik.
Ermənistanın Gəncəyə və digər yaşayış məntəqələrimizə qarşı həyata keçirdiyi terror aktları onu deməyə əsas verir ki, düşmən ölkə Azərbaycanda ikinci Xocalı soyqırımını gerçəkləşdirməyi planlaşdırır. Belə olmasaydı, Ermənistan dinc əhalini, mülki şəxsləri, qadınları, uşaqları, qocaları hədəfə almazdı. Bu, açıq göstərir ki, Ermənistanda yenə də uşaq qatilləri meydandadır və onlar cəzasız qaldıqları üçün bu mənfur əməllərini davam etdirirlər. Azərbaycan Ordusunun dinc erməni əhalisini hədəfə almadığı məlumdur, amma erməni ordusu bizim dinc əhalini öldürməyə, bizə qarşı soyqırım törətməyə hazırlaşır.
“...ermənilərin daxili aləminin, düşüncəsinin, psixologiyasının humanizmdən, insani hisslərdən tam uzaq olmasının göstəricisidir”
Analitik İnformasiya Mərkəzinin rəhbəri, politoloq Rasim Quliyev “Bakı-Xəbər”ə bildirdi ki, terrorçu Ermənistanın hədəfinin Azərbaycanın dinc əhalisi olduğunu bütün dünya bilir. “Əvvəla onu deyim ki, Azərbaycanın dinc, əli silahsız mülki insanlarını ermənilərin hədəfə alması, onları qətlə yetirməsi faktları yeni deyil. Biz bunun XX əsrin əvvəllərində də, sonrakı dövrlərdə də bu cür olduğunu bilirik. Ermənilər Çar Rusiyası tərəfindən Azərbaycan torpaqlarında yerləşdirildikdən sonra onların quldur dəstələri Azərbaycan xalqına qarşı saysız cinayət aktı törədib, soyqırım həyata keçiriblər. Bu, azərbaycanlılara qarşı tarixdə bir neçə dəfə soyqırım törədən ermənilərin daxili aləminin, düşüncəsinin, psixologiyasının humanizmdən, insani hisslərdən tam uzaq olmasının göstəricisidir.
Son olaylardan sonra terrorçu Ermənistanın Azərbaycanın dinc sakinlərini müharibə gedən ərzidən deyil, öz ərasizindən atəşə tutması həm bu ölkənin yürütdüyü terror siyasəti ilə bağlıdır, həm də onların bizim əhaliyə düşmən kimi yanaşması ilə əlaqədardır. Faktiki olaraq, Gəncə də, digər yaşayış məntəqələrimiz də Ermənistan ərazisindən atəşə tutulur. Bu da açıq şəkildə onu göstərir ki, Ermənistan Azərbaycanın dinc sakinləri ilə müharibə aparır. Ardıcıl olaraq düşmən dövlət Azərbaycan xalqına qarşı bu cür mənfur siyasət yürüdür. Bu, məsələnin bir tərəfi. Digər tərəfdən, Ermənistanın Azərbaycanın dinc əhalisinə qarşı törətdiyi terror aktlarının məqsədi nədir? Düşmən dövlətin əsas məqsədi dinc əhali arasında qorxu, təşviş, çaşqınlıq yaratmaq, daxili birliyi sarsıtmaqdır. Bu, Ermənistanın bizim daxili birliyimizi pozmaq üçün həyata keçirdiyi təxribatların bir hissəsidir. Ermənistan həm hərb meydanında, həm də danışıqlar masasında uduzduğunu açıq-aşkar görür. Buna görə də harada oldu, Azərbaycan ərazisində diversiya həyata keçirir. Bu həm mənəvi, həm də hərbi cəhətdən Ermənistanın keçirdiyi diversiyadır. Terrorçu Ermənistanın Azərbaycanın dinc əhalisini, xüsusən də uşaqları, qadınları, qocaları qətlə yetirməsi bu ölkənin xalqımıza qarşı növbəti genosid planı hazırladığını deməyə əsas verir. Ermənistan növbəti soyqırım törətmək məqsədi güdür. Bu ölkənin cinayətkar davranışları bunu deməyə əsas verir.
Amma erməni terrorçuları nə qədər yaşayış məntəqələrimizi atəşə tutsalar da, nə qədər insanlarımızı yaralasalar da, qətlə yetirsələr də, Azərbaycan vətəndaşlarının milli dövlətçilik, vətənpərvərlik hisslərini öldürə bilməzlər”.
R.Quliyev qeyd etdi ki, Azərbaycanın və Ermənistanın Xarici İşlər nazirlərini Moskvaya Rusiyanın Xarici İşlər naziri dəvət edirsə, orada humanitar atəşkəs haqqında razılığa gəlinirsə, hər iki dövlətin Xarici İşlər nazirləri bu razılığı öz imzaları ilə dövlət adından təsdiqləyirlərsə, atəşkəs haqqında razılığa imza atan Ermənistanın Xarici İşlər naziri özünün gəldiyi və geri qayıtdığı mülki təyyarəyə raketlər yığıb öz ölkəsinə gətirirsə, həmin raketlərdən səhərisi gün Gəncə atəşə tutulursa, burada hansı siyasətdən, səmimiyyətdən söhbət gedə bilər? R.Quliyevin sözlərinə görə, bütün bunlar Ermənistanın yürütdüyü mənfur, terrorçu siyasəti açıq şəkildə ortaya qoyur.
İradə SARIYEVA
