Xilaskar ordumuzun Qarabağı və ətraf rayonları erməni işğalından azad etmək uğrunda müqəddəs savaşı davam edir. Sentyabrın 27-dən Ermənistanın hərbi təxribatına cavab olaraq zəfər yürüşünə başlayan Azərbaycan əsgəri tarixi ədalətin bərpası üçün bütün cəbhə boyu Ermənistan silahlı qüvvələri tərəfindən otuz ilə yaxın işğal altında saxlanan ərazilərimizi azad edir.
Haqq yolunda haqq savaşı aparan əsgərlərimizin döyüş ruhu, qələbə əzmi həm cəmiyyətimizin daxilində özünəinam hissini, həm də Silahlı Qüvvələrimizə xalqımızın etimadını daha da artırır.
Ordumuzun gücünü görən işğalçı ölkə mülki əhalini hədəf alır. Döyüş başlayandan bu günə kimi ermənilər Azərbaycanın ikinci böyük şəhəri olan Gəncəni atəşə tuturlar. İşğalçı ölkə iki hftə ərzində Gəncəyə müxtəlif növ raketlər atıb. Təəssüf ki, təcavüzkar ölkə raketləri əhalinin sıx olduğu məkanlara atır.
Qeyd etdiyimiz kimi, ermənilər təmas xəttində döyüş başlayan gündən bəri Gəncəni hədəf götürürlər. Ermənilər oktyabrın 11-də Gəncə şəhərinin mülki əhalisinin sıx yaşadığı məntəqələri raket atəşinə tutub. Gəncə şəhərinə atılmış raketlərdən biri mülki şəxslərin yaşadığı yaşayış binasına düşüb. 4-ü qadın olmaqla 9 nəfər həlak olub, 6-sı azyaşlı uşaq olmaqla 34 nəfərdən çox insan müxtəlif dərəcədə yaralanıb.
Döyüş başlayan gündən bəri ermənilər Azərbaycanın ikinci böyük şəhəri olan Gəncəni atəşə tutmaqda davam edirlər.
“Ermənistan dinc sakinləri hədəf alır, onların gözləntisi budur ki, Azərbaycan da mülki şəxslərin yaşadığı yerlərə hücum etsin, ancaq…”
Hərbçi Rasim İsgəndərov bildirdi ki, mülki insanları hədəf alan Ermənistanın məqsədi müharibənin miqyasını genişləndirməkdir: “Gəncədə raketin məhz mərkəzə, əhalinin sıx yaşadığı yerə atılması Ermənistan rəhbərliyinin xain və çirkin niyyətini bir daha göstərmiş oldu. Bu günlərdə Ermənistan hərbçilərinin hər dəfə geri çəkildikcə daha çox mülki insandan qisas almaq cəhdlərini müşahidə etdik. Amma indi bu xain Gəncə hücumunu humanitar atəşkəs elan olunmasının fonunda gördük. Özü də tək Gəncə deyil, Mingəçevir də hədəf seçilmişdi. Məncə, Gəncədəki insan itkilərinə səbəb olan xain hücumda bir neçə məqsəd var. Birincisi, bu, Ermənistan rəhbərliyinin daxili auditoriyaya hesablanmış iyrənc addımı idi. Məqsəd budur - xalqa göstərsinlər ki, "bizim ordumuz güclüdür, hətta Gəncəni vururuq, geri də çəkilmirik”. Digər məqsədləri isə vətəndaşlarımızı qorxu içində saxlamaqdır. Bunlar panika yaratmadır. İşğalçı ölkə Gəncəyə xain hücumuna görə də layiqli cavabını alacaq”.
Həmsöhbətimiz onu da əlavə etdi ki, Ermənistan terrorçu dövlətdir və regional təhlükəsizlik üçün ciddi problemdir: “Ermənistan dinc sakinləri hədəf alır. Onların gözləntisi budur ki, Azərbaycan da mülki şəxslərin yaşadığı yerlərə hücum etsin. Ancaq Azərbaycan beynəlxalq hüquqa hörmət edərək bu addımı atmır. Ermənistanın məqsədi başqa ölkələri də müharibəyə cəlb etmək və bölgədə gərginlik yaratmaqdır. Ermənistanın barbarlığına “dur” deyilməlidir və bu mövzuda dünyadan ədalət gözləyirik”.
Günel CƏLİLOVA
