Sentyabrın 27-də Ermənistan silahlı qüvvələrinin genişmiqyaslı təxribatından sonra Azərbaycan Ordusunun başlatdığı əks-hücum əməliyyatı uğurla davam edir. Ağır itkilər verən Ermənistan ordusu bir çox bölgəni itirib.
Qeyd edək ki, Azərbaycan tərəfindən, 27 sentyabrdan əvvəl düşmənin irimiqyaslı təxribat hazırlığında olduğu, bunun üçün hətta Suriyadan PKK/PYD terror qruplaşmasının xüsusilə erməni mənşəli üzvlərini, Livandan və başqa ölkələrdən müzdlu döyüşçüləri də işğal altında olan ərazilərə gətirdiyinə dair dəfələrlə dünyanın ən yüksək tribunalarından bəyanatlar verilib.
Artıq Ermənistan da başqa ölkələrin vətəndaşlarını işğal olunmuş ərazilərdə döyüşlərə cəlb etdiyini açıq etiraf edir. Ermənistan prezidenti Armen Sarkisyan "Əl Cəzirə" telekanalına müxtəlif ölkələrdən olan ermənilərin Dağlıq Qarabağda döyüşdüklərini deyib. "Onlar etnik ermənilərdir və müxtəlif ölkələrin vətəndaşları olmalarına baxmayaraq, Dağlıq Qarabağda vuruşmalarında pis bir şey yoxdur. Biz müxtəlif ölkələrdən olan ermənilərin hərbi əməliyyatlarda iştirakını qəbul edirik" - S.Sarkisyan bildirib.
Armenin bəhs etdiyi döyüşçülər isə təbii ki, Suriya və Livandan gətirilən terrorçular və muzdlulardır. Bunu dünya mediası da təsdiqləyir. Türkiyənin Dəmirörən Xəbər Agentliyi (DHA) yazır ki, Suriyada təlim keçmiş onlarla PKK/YPG terrorçusu Ermənistan tərəfindən işğal altındakı Qarabağa köçürülüb. Agentlik etibarlı mənbələrə istinadən yazır ki, avqust ayından bəri Suriyadan gətirilən terrorçular bir neçə marşrutla İran üzərindən işğal altında olan Qarabağa keçiblər.
DHA YPG terrorçularının Ermənistan silahlı qüvvələrinin zabitləri ilə bir arada olduğunu göstərən görüntülərdə də yayıb.
Almaniyanın tanınmış “Der Freitag” qəzeti də Ermənistan-PKK işbirliyinə dair məqalə dərc edib. Məqalədə bildirilir ki, Livan, Suriya və İraqdan erməni əsilli qaçqınları işğal olunmuş ərazilərdə yerləşdirməklə burada demoqrafik vəziyyətin dəyişdirilməsi nə qədər qanunsuz olsa da, bu, məsələnin bir tərəfidir. Lakin ABŞ və Avropa İttifaqı da daxil olmaqla, bütün Qərb ölkələri tərəfindən terror təşkilatı kimi qəbul edilən PKK döyüşçülərinin Dağlıq Qarabağda məskunlaşdırılması tamamilə başqa bir məsələdir.
Qəzet “Cairo24” xəbər agentliyinin etibarlı yerli mənbələrdən əldə etdiyi məlumatlara istinad edərək yazır ki, Ermənistan öz yüksək ranqlı diplomatları vasitəsilə kürd yaraqlılarının militant qolu olan və Lahur Şeyx Cəngi Talabani və Bafel Talabaninin rəhbərlik etdiyi Kürdistan Vətənpərvər İttifaqı ilə terrorçuların transfer planı barədə danışıqlar aparıb. Bu danışıqların ardınca Kürdistan Muxtar Regionunun rəhbəri Nexirvan Bərzani ilə kürd döyüşçülərin Dağlıq Qarabağa göndərilməsi üçün koridorun yaradılması planına dair danışıqlar cəhdi uğursuz alındı.
Məlumatlara görə, Ermənistanın səyləri yüzlərlə silahlı terrorçunun PKK-nın İraqdakı dayaq mərkəzi hesab olunan Sülemaniyyədən Dağlıq Qarabağa göndərilməsi ilə nəticələnib. Çoxları tərəfindən PKK-nın Suriya qolu hesab edilən YPG-li terrorçulardan ibarət ayrıca bir qrup Suriya-İraq sərhədində yerləşən Qamışlı adlı regiondan Dağlıq Qarabağa göndərilib. Sonra isə üçüncü bir qrup da eyni istiqamətə yola salınıb.
Qeyd edilir ki, bu, Ermənistanın öz məqsədləri üçün terrorçu və muzdlulardan istifadə etdiyi ilk hal deyil. Hələ ötən əsrin 90-cı illərində Dağlıq Qarabağda müharibə zamanı belə edilmişdi. Müəllif daha sonra kürdlərin hələ sovetlər dönəmində Ermənistan və Rusiya tərəfindən alətə çevrildiyini qeyd edir.
Diqqətə çatdırılır ki, hazırkı Ermənistan hökuməti Azərbaycana qarşı savaş tonuna üstünlük verir və ölkədaxili siyasət, eləcə də səhiyyə və iqtisadi böhrandan irəli gələn hesablamalar əsasında danışıqlar prosesini əngəlləyir. Erməni hökuməti prinsip etibarilə razılaşdırılmış ATƏT çərçivəsində danışıqlara qoşulmaqdan imtina etməklə kifayətlənmir, o, eyni zamanda, sülh danışıqlarının yenidən başlamasını tələb edir. Erməni əhalisi getdikcə öz övladlarını cəbhəyə göndərməkdən imtina etdiyinə görə, hesab olunur ki, Ermənistan hökumətinin terrorçu qruplardan olan döyüşçülərdən istifadə etməklə öz vətəndaşları arasında insan itkisini minimuma salmaq qərarına gəlib. Baş nazir Nikol Paşinyan hətta ölkədə xalq milisi təşəbbüsü barədə elan verib və Burkina Faso kimi dünyanın böhranlarla silkənən regionlarında bunun üçün təhlükəli nümunələri görmək olar.
Məqalədə, həmçinin Qafqazda son illərin ən ağır düşmənçilik əməllərinin Ermənistan silahlı qüvvələrinin Tovuz rayonuna hücumu ilə başladığı əks olunub. Qeyd edilib ki, həmin hücumlar zamanı mülki əhali arasında da ölən və yaralananlar olub və hadisələrin gedişatı Ermənistanın yenidən atəşkəsə riayət etmədiyini göstərib.
Müəllif yazır ki, Dağlıq Qarabağ regionunun getdikcə hərbiləşdirilməsi və eləcə də Yaxın Şərqdəki yarımhərbi qruplardan muzdluların iştirakı münaqişənin beynəlxalq miqyas almasına və regional güclərin çətin vəziyyətə düşməsinə səbəb ola bilər. Ermənistanın təhlükəli hərəkətləri Azərbaycan və Avropa üçün strateji əhəmiyyət daşıyan regionda sabitliyin daha da pozulmasına yol aça bilər. Azərbaycan neft və qazını, eləcə də digər ixrac məhsullarının enerji və nəqliyyat bağlantıları ilə Gürcüstan, Türkiyə və Avropaya nəqli, o cümlədən Bakı-Tbilisi-Ceyhan neft kəməri, Bakı-Tbilisi-Ərzurum qaz kəməri, Bakı-Tbilisi-Qars dəmir yolu kimi böyük infrastukturlarını təhlükə altına almaqla Ermənistan Avropanın enerji və nəqliyyat təhlükəsizliyinə ciddi təhdidlər yaradır.
TAHİR
