“Əgər onlar işğalçını dayandıra bilmirlərsə, Azərbaycan əsgəri onları dayandıracaqdır. Azərbaycan əsgəri onları öz torpaqlarından çıxaracaq və haqq-ədaləti bərpa edəcək”. Bunu Prezident İlham Əliyev Ermənistanın sentyabrın 27-dən başlayan hərbi təxribatı zamanı yaralanan və Müdafiə Nazirliyinin Mərkəzi Hərbi Klinik Hospitalında müalicə olunan hərbçilərlə görüşündə deyib.
Dövlət başçısının sözlərinə görə, sentyabrın 27-də erməni silahlı birləşmələri bizə qarşı növbəti hərbi təxribat törədiblər: “Mən onları xəbərdar etmişdim. Onlara BMT kürsüsündən sözlərimi demişdim. Bütün beynəlxalq ictimaiyyətə sözlərimi demişdim ki, Ermənistan yeni müharibəyə hazırlaşır, Ermənistan dayandırılmalıdır. Əfsuslar olsun ki, beynəlxalq ictimaiyyət və bu məsələ ilə məşğul olan tərəflər erməni hökumətinə lazımi səviyyədə təsir edə bilməmişlər. Əgər onlar işğalçını dayandıra bilmirlərsə, Azərbaycan əsgəri onları dayandıracaqdır. Azərbaycan əsgəri onları öz torpaqlarından çıxaracaq və haqq-ədaləti bərpa edəcək”.
Prezident onu da qeyd edib ki, bizim bir şərtimiz var: “Torpaqlarımızdan qeyd-şərtsiz, tam və dərhal çıxıb rədd olmalıdırlar. Bu şərtim qüvvədədir və əgər bu şərtimə Ermənistan hökuməti əməl edərsə, döyüşlər dayanacaq, qan tökülməyəcək, sülh olacaq, bizim bölgəmizə sülh gələcək. Biz sülh istəyirik, biz məsələnin həllini istəyirik, əks təqdirdə 30 ilə yaxın danışıqlara ümid bəsləməzdik. Danışıqlara bizim sadiq qalmağımızın yeganə səbəbi o idi ki, ümid var idi. Bizə ümidlər verilirdi, bizə siqnallar göndərilirdi ki, bir qədər səbr edin, məsələ həll olunacaq. Amma mən demişdim ki, Azərbaycan xalqı bu işğalla heç vaxt barışmayacaq. Demişdim ki, əgər məsələ danışıqlar yolu ilə həll olunmazsa, Azərbaycanın tam haqqı var ki, məsələ hərbi yolla öz həllini tapsın”.
Göründüyü kimi, ölkə başçısı torpaqların işğaldan azad edilməsində qətiyyətli mövqe ortaya qoyur. Eyni zamanda, inamlı şəkildə hərəkət edir. Maraqlıdır, Prezident niyə belə inamlıdır?
“Başlıca amil onunla bağlıdır ki, Azərbaycan xalqı güc yolu ilə torpaqların azad olunmasını dəstəkləyir”
Məsələyə münasibət bildirən AMİP funksioneri Əli Orucovun fikrincə, Prezidentin inamlı danışması bir sıra faktorlardan irəli gəlir: “Birincisi, Azərbaycan xalqı güc yolu ilə torpaqların azad olunmasını dəstəkləyir. İkincisi, beynəlxalq hüquq bizim xeyrimizədir. Dağlıq Qarabağ Azərbaycanın tərkib hissəsi kimi beynəlxalq qurumlar və dünya dövlətləri tərəfindən tanınır. Bununla yanaşı, BMT Təhlükəsizlik Şurasının ortada 4 qətnaməsi var. Həmin qətnamələrdə işğala son qoyulması tələb edilir. Üçüncüsü, Azərbaycanın güclü ordusu var. Son illər Azərbaycan Ordusu xeyli güclənib. Ən müasir hərbi texnikaya, yüksək döyüş hazırlığına malikdir. Dördüncüsü, ATƏT-in Minsk Qrupunun vasitəçiliyinə bəslənən ümidlər özünü doğrultmadı. Beşincisi, dünyanın bir sıra dövlətləri Azərbaycanın haqq işini dəstəkləyir. Elə dövlətlər var ki, bunu açıq şəkildə bəyan edirlər. Elə dövlətlər də var ki, bu məsələdə bitərəf mövqe tutmaqla, dolayısı ilə Azərbaycanı dəstəkləyirlər”.
Bu və digər məsələlərdən çıxış edərək, Ə.Orucov hesab edir ki, qələbə bizimlə olacaq.
Vidadi ORDAHALLI
