Bu gün döyüş cəbhəsində düşmən üzərində qat-qat çox üstünlük qazanan Azərbaycan Ordusu düşmən təxribatlarının dəf edilməsi üçün əks-hücum əməliyyatlarını davam etdirir. Düşmənin saysız strateji nöqtəsini - alayını, silah anbarını, ayrı-ayrı texniki qurğusunu, eləcə də PUA-larını vurub sıradan çıxaran şanlı ordumuz cəbhəboyu istiqamətdə irəliləməkdədir.
Müdafiə Nazirliyinin məlumatına görə, sentyabrın 30-da Ağdərə (Madagiz) istiqamətində gedən döyüşlər zamanı Ermənistan ordusunun darmadağın edilən 6-cı dağatıcı alayına köməyə gələn 193-cü əlahiddə həmlə taborunun döyüş bayrağı və sənədləri ələ keçirilib.
Döyüş zamanı düşmənin döyüş bayrağının və sənədinin ələ keçirilməsi bizə hansı üstünlükləri qazandırır, ümumiyyətlə, bu nə deməkdir?
Mütəxəssislər qeyd edirlər ki, tarixdə belə hadisələr çox olub, döyüş bayrağını, vacib hərbi sənədləri qoruya bilməyən döyüş alayları bununla öz ordusunun zəifliyini, gücsüzlüyünü ortaya qoyublar. Ekspertlər deyirlər ki, Ağdərə istiqamətində gedən döyüşlər zamanı düşmənin döyüş bayrağını və sənədləri əldən verməsi Paşinyanın terrorçu ordusunun qorxaqlığının, cəsarətsizliyinin göstəricisidir. Onlar deyirlər ki, ermənilər yalnız dinc əhaliyə qarşı terror etməyi, insanları arxadan atəşə tutmağı bacarır, bizim əsgərlərlə üz-üzə gələndə isə nəinki bayraqlarını, sənədlərini, eləcə də özlərini itirirlər.
“Əslində, düşmənin döyüş bayrağının Milli Ordumuz tərəfindən ələ keçirilməsi mənəvi-psixoloji baxımdan da çox böyük mahiyyət daşıyır”
Azərbaycan Milli Elmlər Akademiyasının (AMEA) Fəlsəfə İnstitutunun aparıcı elmi işçisi, tarix üzrə fəlsəfə doktoru, ehtiyatda olan zabit Faiq Ələkbərli “Bakı-Xəbər”ə bildirdi ki, Azərbaycan Ordusunun bütün istiqamətlərdə uğur qazanması, xüsusilə də Cəbrayıl-Füzuli, Tərtər-Ağdam istiqamətində, eyni zamanda, Murov dağında böyük uğurlar əldə etməsi artıq düşmən üzərində qələbənin təməl daşlarını qoyub. “Xüsusilə də Ağdərə istiqamətində gedən döyüşlər zamanı Ermənistan ordusunun bəzi alaylarının darmadağın edilməsi, 6-cı dağatıcı alayına köməyə gələn 192-ci əlahiddə həmlə taborunun məhv edilməsi uğurumuzun davamlı olduğunu ortaya qoyur. Şübhəsiz ki, bizim başqa, daha böyük uğurlarımız var ki, zamanı çatanda Müdafiə Nazirliyi onları da ictimaiyyətə açıqlayacaq. 192-ci əlahiddə həmlə taborunun məhv edilməsi zamanı döyüş bayrağının və sənədlərin ələ keçirilməsi bizim bu istiqamətdə bir neçə məsələdə də uğurlarımızın davamlı olacağını ortaya qoyur. Əslində, düşmənin döyüş bayrağının Milli Ordumuz tərəfindən ələ keçirilməsi mənəvi-psixoloji baxımdan da çox böyük mahiyyət daşıyır. Düşmən ordusunun məhv edilməsi, üstəlik də onun döyüş bayrağının ələ keçirilməsi düşmənə ikiqat zərbədir. Eyni zamanda, həmin döyüş bayrağı ilə yanaşı, sənədlərin ələ keçirilməsi o deməkdir ki, Ağdərədən sonra Kəlbəcər istiqamətində daha böyük uğur əldə etməyimiz üçün bizə böyük yol açır. Bu anlamda bu sənədlər də bizim üçün çox vacibdir. Biz həmin sənədlər əsasında düşmənimizin taktikasını, onların bir çox planını, əsas dayaq məntəqələrinin harada yerləşməsini, haradan onlara kömək gələ biləcəyini öyrənməyimiz üstünlüyümüzdür, avantajımızdır”.
F.Ələkbərli qeyd etdi ki, hər gün, hər saat düşmən üzərində üstünlüyümüz artır. Gənclərimizin həm hərbiyə çağırışı böyük ruh yüksəkliyi ilə qarşıladığını, həm könüllü olaraq respublikamızın hər yerindəki hərbi çağırış məntəqələrinə, eləcə də Müdafiə Nazirliyinə müraciət edənlərin sayının yüz minlərlə olduğunu deyən F.Ələkbərli hesab edir ki, bu, ölkəmizdəki mənəvi-psixoloji vəziyyətin, vətənpərvərliyin yüksək olması ilə bağlıdır. “Ölkəmizdə böyük ruh yüksəkliyi var. Bunun müqabilində Ermənistanda isə böyük mənəvi-psixoloji böhran yaşanmaqdadır. Bunu ört-bastır etmək üçün müxtəlif bəhanələr yayırlar, yalan məlumatlar, dezinformasiyalar baş alıb gedir, Paşinyan hökuməti ölkənin gündəmini dəxli olmayan məsələlərlə məşğul edir ki, erməni xalqının başı qarışsın. Türkiyənin Azərbaycana bu döyüşlərdə hərbi yardım etməsi iddiasını ortaya qoymaqla KTMT-ni, yaxud Rusiyanı bura dəvət etmək istəklərindən danışırlar. Amma bunlar düşmənə heç nə qazandırmayacaq və mən zərrə qədər də şübhə etmirəm ki, bizim ordumuz daha böyük uğurlar əldə edib təkcə 7 rayonumuzu deyil, bütövlükdə, Dağlıq Qarabağı da düşmən işğalından azad edəcək” - deyə F.Ələkbərli vurğuladı.
İradə SARIYEVA
