Azərbaycan ordusunun uğurla davam edən hərbi əməliyyatlarının yaxın tezlikdə qələbə ilə sonuclanağına artıq heç bir şübhə yoxdur. Bütün bunlar, öz növbəsində, ekspertlərin fikrincə, Ermənistan daxilində siyasi hadisələrin də gedişinə təsir edəcək.
Söhbət ilk növbədə Nikol Paşinyan iqtidarının devrilməsindən gedir. Artıq Paşinyana müxalif olanlar bunun üçün arqumentlər də əldə edib. Axı, məlum hərbi əməliyyatlar məhz Paşinyanın avantüraları üzündən başlanıb. Deməli, məğlubiyyətə görə də məhz o cavab verməlidir.
İndilikdə görünən budur ki, rəqibləri bu xüsusda müəyyən hazırlıq işlərinə də başlayıb. Ermənistan mediası isə yazır ki, Paşinyan üçün daha bir problem müharibəni davam etdirmək gücündə olmamasıdır. Ölkənin iqtisadi və hərbi resursları buna imkan vermir. Belə vəziyyətdə Azərbaycanın yeni silahlar almağa hazırlaşması fonunda ölkəmizin üstünlüyünün daha da artması proqnozlaşdırılır. Bu da Ermənistanın və beləliklə, Paşinyanın məğlub duruma düşməsini qaçılmaz edir. Türkiyənin “Yeni Şəfəq” qəzeti məhz belə bir vaxtda məlumat yayıb ki, Azərbaycan Türkiyə PUA-ları sayəsində Qarabağdakı döyüşlərdə hava üstünlüyünə tam sahiblənib. Qəzet hazırda Azərbaycan Ordusunun arsenalında “Bayraqdar” TB2 PUA-larının olduğunu və Azərbaycanın bu sıraya "T-129 ATAK" helikopterləri və “Altay” tanklarını qatmaq istədiyini bildirib. Məlumata görə, Türkiyənin “Bayraqdar” PUA-ları Türkiyə-Ermənistan sərhədinə iyul ayında yerləşdirib. Bölgədə izləmələrə başlayan PUA-lar Ermənistanın xüsusi olaraq diqqətini cəlb edib. Nəticədə Tovuz təxribatından sonra Ermənistan ordu nümayəndələrinin təşkil etdiyi toplatıların birində “Bayraqdar” TB2-nin görüntüsü əsas mövzuya çevrilib. Qəzet, həmçinin” fevralın 25-də Türkiyə prezidenti Rəcəb Tayyib Ərdoğanla Azərbaycan prezidenti İlham Əliyevin iştirakı ilə Bakıda keçirilən 8-ci Ali Səviyyəli Strateji Əməkdaşlıq Şurasının iclasında iki ölkə arasında hərbi maliyyə əməkdaşlıq anlaşmasının imzalandığını bildirib. Məhz bu razılaşma əsasında Türkiyə Azərbaycana 200 milyon lirəlik maliyyə dəstəyi göstərib.
Azərbaycanın bu anlaşmadan sonra hərəkətə keçdiyi və Türkiyədən bir sıra silahları almaq istədiyi vurğulanıb. Belə ki, indiyə qədər Azərbaycanın Türkiyədən 6 ədəd “Bayraqdar” TB2 PUA-ları aldığı qeyd edilib. Bundan başqa, “Altay” tankları və "T-129 ATAK" helikopterləri üçün də tərəflər arasında danışıqların aparıla biləcəyi iddia olunub. NATO üzvü olan Türkiyənin bu silahları Azərbaycana verməsində heç bir problem olmadığı yazılıb. Buna səbəb kimi adıçəkilən silahların Türkiyənin öz istehsalı olması göstərilib. Xatırladaq ki, bir müddət əvvəl Türkiyənin milli müdafiə naziri Hulusi Akarı qəbul edərkən də prezident İlham Əliyev bu xüsusda maraqlı fikirlər səsləndirib. Belə ki, prezidentin sözlərinə əsasən, yaxın zamanlarda Türkiyə, bütün başqa sahələrdə olduğu kimi, hərbi-texniki əməkdaşlıq sahəsində də Azərbaycanın bir nömrəli tərəfdaşı olacaq: “Bizim bütün sahələrdə olduğu kimi, hərbi və hərbi-texniki sahədə də işbirliyimiz, əməkdaşlığımız sürətlə inkişaf edir. Sirr deyil ki, Türkiyənin hazırda çox güclü hərbi sənaye potensialı var və biz də bu potensialdan faydalanırıq. Biz çox sevinirik ki, Türkiyə bu gün ən müasir silahlar, hərbi texnika istehsal edir. Biz əlbəttə ki, bu günə qədər olduğu kimi, bundan sonra da bu imkanlardan faydalanmaq istəyirik. Əminəm ki, yaxın zamanlarda Türkiyə, bütün başqa sahələrdə olduğu kimi, hərbi-texniki əməkdaşlıq sahəsində də bizim üçün bir nömrəli tərəfdaş olacaq. Bildiyiniz kimi, həm siyasi, həm iqtisadi, həm də başqa sahələrdə bizim əlaqələrimiz bütün ölkələr üçün örnəkdir. Siz bilirsiniz, mən dəfələrlə demişəm ki, bu gün dünyada Türkiyə və Azərbaycan qədər bir-birinə yaxın və bağlı olan ölkələr yoxdur. Bu həqiqətdir. Bu həm tarixi və etnik köklərə əsaslanan həqiqətdir, eyni zamanda biz – iki qardaş ölkə öz siyasətimizlə bu birliyi daha da möhkəmləndirdik”.
Qeyd edək ki, son illər ərzində Türkiyə hərbi sənayedə bir çox uğurlara imza atıb. Qeyd edək ki, Azərbaycan indiyədək Türkiyədən 122 millimetr çaplı “T-122 Sakarya" reaktiv atəş sistemləri, “Qasırğa” raketləri, ROKETSAN şirkətinin istehsalı olan TR-107 artırılmış mənzilli raketləri və digər silahlar alıb. Özü də bunlar kifayət qədər mükəmməl silahlardır. Ölkəmiz Türkiyədən "T-129 ATAK" tipli hücum vertolyotu alınmasına da çox maraq göstərir. Xatırladaq ki, Türkiyə və İtaliyanın ortaq layihəsi olan "T-129 ATAK" hərbi helikopterlərinin sürəti saatda 300 kilometrə çatır, hər cür hava şəraitində, gecə və gündüz uçuş həyata keçirə bilir. Helikopter həm də Türkiyə istehsalı olan kompyuter sistemi ilə təchiz edilib. Helikopterin 42 fərqli avionika və silah sistemi Türkiyə şirkətləri tərəfindən istehsal olunur. Ekspertlər bildirir ki, "T-129 ATAK" döyüş helikopterlərinin alınması Azərbaycan hərb aviasiyasını daha güclü hala gətirəcək. Azərbaycan Silahlı Qüvvələri dost Türkiyədə istehsalı başlamış ən yeni "Altay" tankına diqqət yetirir. Məlumat üçün qeyd edək ki, “Altay” Cənubi Koreyanın “K2” tankının müasirləşdirilmiş formasıdır. Tankda “Qara panter”in 60% -dək texnologiyalarından istifadə edilib. Qeyd edək ki, Koreyanın “K2” tankının imkanları asanlıqla Çin, yaxud Şimali Koreyanın döyüş meydanına çıxara biləcəyi istənilən texnikanı geridə qoyur. Tankda istifadə olunan möhkəm zirehin tərkibi naməlum qalır. “K2” tankının qorunma və əks-hücum mexanizmi mükəmməldir. Bir növ M1A2 markalı ABŞ tankına bənzəyir, amma çəkisi qat-qat yüngüldür. Tank özü avtomatik şəkildə insan müdaxiləsi olmadan hədəfi müəyyən edə və vura bilir. Hədəflər sırasına təkcə maşınlar yox, helikopterlər də daxildir. Düşmənin canına qorxu salan "Altay" isə Türkiyənin hazırladığı 3-cü nəsil müharibə tankıdır. Uzun müddət dizayn mərhələsində olub. Hər cür şəraitdə istifadəsi mümkün olan tank NATO hərəkatının standartlarına uyğundur. O, modern tanklardakı ən yeni texnologiyalarla təchiz edilib. Üstün atəş gücü və hədəfi dəqiq vurma, yüksək hərəkət qabiliyyətinə malikdir. Onun üzərində bir çox fərqli sursatdan ata bilən 120 millimetrlik 55 kalibrlik top var. Atış nəzarət sistemi sayəsində hərəkətdə olan hədəfləri belə yüksək dəqiqliklə vurur. Bundan başqa, bu hərbi texnikada hər cür təhlükədən qoruyan zireh heyətə kimyəvi, bioloji, radioaktiv və nüvə təhdidlərinin belə olduğu şəraitdə çalışmağa imkan verir.
Ramil QULİYEV
