Azərbaycan hazırda tarixinin ən yeni Vətən müharibəsini aparır. Biz kiminsə ərazisinə göz dikməmişik. Ərazilərimizi işğal edən düşməndən təmizləyirik. Bu şərəfli müharibədə bütün Azərbaycanın səfərbər olduğunu görürük.
Hamının ürəyi ordu ilə döyünür, bütün əhali cəbhədən gələn sevincli xəbərləri səbrsiliklə gözləyir. Xaricdə yaşayan soydaşlarımızın da, bu istiqamətdə fəallığını görürük. Onlar da hər an vətənimizə dəstək olmağa hazırlıqlarını bildirirlər. Diasporumuzun son günlər ərzində ciddi fəallığı nəzərə çarpır. Öz növbəsində, ölkəmizin diasporumuzdan da müəyyən gözlətilərinin olduğunu görürük.
Diaspor nümayəndələrimizdən həssaslıq tələb olunur
Diasporla İş üzrə Dövlət Komitəsinin bu gərginliyin fonunda xaricdə yaşayan soydaşlarımıza etdiyi müraciətə diqqət edək:
“Əziz həmvətənlər, Azərbaycan Respublikası Müdafiə Nazirliyinin rəsmi məlumatına əsasən, sentyabrın 27-si saat 06:00 radələrində Ermənistan silahlı qüvvələri genişmiqyaslı təxribat törədərək, cəbhəboyu zonada yerləşən Azərbaycan Ordusunun mövqelərini, Tərtər rayonunun Qapanlı, Ağdam rayonunun Çiraqlı və Orta Qaravənd, Füzuli rayonunun Alxanlı, Şükürbəyli və Cəbrayıl rayonunun Cocuq Mərcanlı kəndlərini iriçaplı silahlar, minaatanlar və müxtəlif çaplı artilleriya qurğularından intensiv atəşə tutub.
Hazırda Azərbaycan Respublikası silahlı qüvvələri Ermənistanın növbəti hərbi təcavüzünün qarşısının alınması, mülki əhalinin təhlükəsizliyinin təmin edilməsi məqsədilə zəruri əks-həmlə tədbirləri həyata keçirir. Azərbaycan Ordusu qüdrətlidir, Ermənistanın hərbi təxribatlarına layiqli cavab verməyə və işğal olunmuş torpaqlarımızı düşməndən azad etməyə hazırdır.
Xaricdə yaşayan azərbaycanlılara müraciət edərək, sosial şəbəkədə, elektron media və digər kütləvi informasiya vasitələrində rəsmi olmayan, dəqiqləşdirilməmiş və qeyri-obyektiv məlumatlardan istifadə etməməyə çağırırıq.
Əziz diaspor nümayəndələri, bizə daxil olan müraciətlərdən cəbhəboyu zonada baş verənlərdən nə qədər narahat olduğunuzu başa düşürük və bildiririk ki, xaricdə yaşayan hər bir soydaşımız Ermənistanın təxribatçı hərəkətlərinin, eləcə də Azərbaycanın haqlı mövqeyinin dünyaya çatdırılmasında, yaşadıqları ölkələrin ictimaiyyətinin doğru məlumatlandırılmasında fəallıq göstərməli, hazırda cəbhədə baş verənlərlə bağlı səhih məlumatların yayılmasında yaxından iştirak etməlidir. Azərbaycan Respublikasının Prezidenti cənab İlham Əliyevin bu gün xalqa müraciətində deyildiyi kimi: “Bu işğala son qoyulmalıdır və qoyulacaq! Biz haqq yolundayıq. Bizim işimiz haqq işidir. Biz zəfər çalacağıq. Qarabağ bizimdir, Qarabağ Azərbaycanındır!”.
147 diaspor təşkilatı ordumuz və dövlətimizə dəstəkdir...
Cəbhədə baş verən gərginliyin bütün dünya ölkələrindəki diasporumuzu ciddi narahat etdiyinin şahidi oluruq. Təsadüfi deyil ki, Azərbaycanın xarici ölkələrdə fəaliyyət göstərən 147 diaspor təşkilatı birgə bəyanat yayaraq ordumuza və dövlətimizə dəstəyini ifadə edib.
Bəyanatda deyilir:
"Biz – xarici ölkələrdə yaşayan azərbaycanlılar və Azərbaycan diaspor təşkilatları təəssüf hissi ilə bəyan edirik ki, 27 sentyabr 2020-ci il saat 06:00 radələrində Ermənistan silahlı qüvvələri atəşkəs rejimini kobud şəkildə pozaraq Azərbaycan Ordusunun cəbhəboyu zonada yerləşən mövqelərini iriçaplı silahlar, minaatanlar və müxtəlif çaplı artilleriya qurğularından intensiv atəşə tutub. Bu, Ermənistan silahlı qüvvələrinin cəbhəyanı ərazilərdə mülki əhalinin və obyektlərin atəşə tutmasının qəsdən və hədəflənmiş növbəti təxribatıdır. Ermənistan işğalçı qüvvələrinin təxribatı nəticəsində mülki əhali və hərbi qulluqçular arasında həlak olan və yaralananlar var, çoxsaylı evlərə və mülki obyektlərə ciddi ziyan dəyib.
Mülki əhalinin qəsdən hədəfə alınması beynəlxalq humanitar hüququn, o cümlədən 1949-cu il Cenevrə Konvensiyasının kobud surətdə pozulmasıdır. Ümumilikdə isə, 1992-ci ilin fevral ayında törədilmiş Xocalı soyqırımı, eləcə də 2020-ci ilin iyulunda - bütün dünyanın COVID-19 pandemiyası ilə mübarizə apardığı bir vaxtda törədilmiş Tovuz təxribatı Ermənistan silahlı qüvvələrinin mülki əhalini hədəfə almasının bariz nümunələridır.
BMT Baş Assambleyasının 75-ci sessiyasının ümumi debatlarının keçirildiyi bir şəraitdə Ermənistan öz hərəkətləri ilə beynəlxalq hüquqa, BMT Nizamnaməsinə zidd münasibətini və beynəlxalq ictimaiyyətə hörmətsizliyini bir daha nümayiş etdirir.
Azərbaycanın Tovuz rayonu istiqamətində dövlət sərhədində Ermənistan silahlı qüvvələrinin təxribatı dünyaya bir daha ermənilərin işğalçı olduğunu göstərdi. ABŞ Konqresi də Ermənistanı işğalçı ölkə kimi səciyyələndirdi. Bütün bunlardan sonra Ermənistan işğal etdiyi ərazilərdə Cenevrə Konvensiyasının tələblərinə və beynəlxalq hüquqa zidd olaraq qanunsuz məskunlaşdırmalar aparır, Livan, Suriya kimi müxtəlif ölkələrdən terrorçular işğal edilmiş ərazilərə cəmləşdirilir.
BMT Təhlükəsizlik Şurasının 822, 853, 874 və 884 saylı qətnamələrini yerinə yetirməyən, BMT Baş Assambleyasının 2006-cı və 2008-ci illərdə qəbul olunmuş “Azərbaycanın işğal olunmuş ərazilərində vəziyyət” adlı qətnamələrinə, BMT-nin, Ümumdünya Səhiyyə Təşkilatının və digər nüfuzlu beynəlxalq qurumların mövcud pandemiya ilə əlaqədar qəbul etdiyi müraciətlərə məhəl qoymayan Ermənistanın işğalçılıq siyasətini və təxribatçı hərəkətlərini davam etdirməsi beynəlxalq təşkilatlar və aparıcı dövlətlər tərəfindən kəskin şəkildə pislənilməlidir.
Biz dünya dövlətlərinə, beynəlxalq təşkilatlara müraciət edərək regionda sülh və sabitliyin təmin olunması üçün Ermənistan dövlətinə işğal etdiyi Azərbaycan torpaqlarını dərhal azad etməsi üçün təsir göstərməyə çağırırıq.
Xaricdəki soydaşlarımız aktiv təbliğatçı rolunda...
Biz şahidi oluruq ki, xaricdə yaşayan azərbaycanlılar, yaşadıqları ölkələrdə müəyyən mövqeyə sahib olan soydaşlarımız sosial şəbəkə hesablarından Azərbaycana və ordumuza dəstək nümayiş etdirirlər.
Onların bir qisminin paylaşımlarını təqdim edirik:
Türkiyədə yaşayan dünyaca məşhur azərbaycanlı dizayner Rüfət İsmayıl sosial şəbəkə hesabında “Qarabağ Azərbaycandır!” yazısı ilə şəkil paylaşaraq Azərbaycana dəstək nümayiş etdirib. Növbəti paylaşımında isə o, “Instagram” izləyicilərinə müraciət edib:
“Azərbaycan öz ərazisində ərazi bütövlüyü uğrunda müharibə aparır. Bu sizin torpaqlarınızda baş versəydi nə edərdiniz?”.
ABŞ-da yaşayan soydaşımız, şair, yazıçı, filologiya elmləri doktoru YUNESKO-nun Fəxri Mədəniyyət Səfiri Aleksandr Səlimov şəxsi sosial hesabında torpaqlarımızın işğaldan azad edilməsi uğrunda mübarizə aparan ordumuza dəstək nümayiş etdirib. O, şəxsi twitter hesabında yazır:
“Azərbaycan işğal edilmiş Ağdam, Cəbrayıl, Füzuli, Kəlbəcər, Qubadlı, Laçın, Zəngilan və digər işğal olunmuş ərazilərinin azad olunması uğrunda mübarizə aparmağa məcbur idi. Azərbaycanın yanında olun!”
Qeyd edək ki, Aleksandr hazırda Delaver Universitetində İspaniya və Latın Amerikası ölkələri ədəbiyyatından dərs deyir. 2008-2010-cu illərdə Delaver Universitetinin senatoru seçilib, 2010-2012-ci illərdə isə Delaver Universiteti Senatının prezidenti olub.
Türkiyənin Adana şəhərində yaşayan, Çukurova Universitetinin Teatr bölümünün rəhbəri, Azərbaycanın Xalq artisti Cahangir Novruzov da sosial şəbəkə hesabında Azərbaycanın işğal olunmuş torpaqlarının azad olunması naminə ədalətli mövqeyini dəstəkləyib. O, şəxsi “Instagram” səhifəsində üzərində “Azərbaycan öz ərazisində və ərazi bütövlüyü uğrunda müharibə aparır” yazılmış şəkil paylaşıb.
Rusiyada yaşayan azərbaycanlı jurnalist Səadət Kadırova da sosial şəbəkə hesabında Azərbaycana dəstək olduğunu nümayiş etdirib. Onun fikirləri bu sözlərlə başlayıb : “Azərbaycan cəmiyyəti heç vaxt əvvəlki kimi olmayacaq…”
“Azərbaycan uğrunda ölməyə hazır olan soydaşlarımızın çoxluğu bizi çox qürurlandırır”
Bütöv Azərbaycan Xalq Cəbhəsi Partiyasının dünya azərbaycanlıları və türk dünyası ilə əlaqələr üzrə katibi Bünyamin Qəmbərli “Bakı-Xəbər”ə açıqlamasında bildirdi ki, bugünlər ərzində biz Azərbaycan xalqının özünə xas olan xüsusiyyətlərə uyğun tərzdə davranışlarını müşahidə edirik: “Bilirsiniz ki, bizim xalq dar gündə birlikdə olmağı, bütün umu-küsüləri kənara qoymağı bacarır. Hazırda Vətənimiz üçün olduqca həlledici mərhələdir. Biz yağı düşməni öz ərazimizdən qovmaq üçün zorla bu müharibəyə təhrik edilmişik. Azərbaycan ordusunun əks həmlələri nəticəsində çox sevindirici xəbərlər alırıq. Belə həssas mərhələdə bütün vətəndaşlarımızla yanaşı, dünyada olan azərbaycanlılar da bizimlə yumruğu bir nöqtəyə vurmalıdır. Bilirsiniz ki, Azərbaycanda hərbi vəziyyət elan olunub. Zəruri tələblərə görə sosial şəbəkələrə girişdə məhdidiyyələr var. Bu səbəbdən də, dünyadakı diaspor nümayəndələrimiz Azərbaycan həqiqətlərini, erməni yalanlarını və ən başlıcası, hazırda baş verən müharibədəki əsl reallıqları doğru-düzgün şəkildə dünya birliyinə çatdırmalıdır. Biz görürük ki, diaspor nümayəndələrimiz bu istiqamətdə ciddi fəallıq nümayiş etdirir və bu bizi sevindirir. Amma bunun miqyasını bir qədər də genişləndirməyə ehtiyac var. Həmin soydaşlarımızın içində çox az sayda fərdlər var ki, bu məsələdə də erməni dəyirmanına su tökür, parçalanma aparamağa çalışır. Bir daha xatırladıram ki, belə məqamda bütün siyasi baxışlar, siyasi mənsubiyyət kənara qoyulmalı, hamı ordunu düşünməlidir. Etiraf etməliyik ki, biz yalnız səngərdə deyil, eyni zamanda dünya çapında sıx təşkilatlanmış və böyük təcrübəsi olan erməni diasporu ilə də mübarizə aparırıq. Onların informasiya təxribatlarını ifşa etməyin ən böyük yükü məhz xaricdə yaşayan soydaşlarımızın üzərinə düşür. Çoxlu sayda diaspor təşkilatlarının bəyanatları ilə tanış oluruq. Azərbaycan uğrunda ölməyə hazır olan soydaşlarımızın çoxluğu bizi çox qürurlandırır. Onların sıralarında elələri var ki, heç Azərbaycanda doğulmayıb, ancaq ürəkləri bura ilə, Vətən torpağı ilə döyünür”.
50 milyonluq Azərbaycan xalqının bu birliyi bir daha göstərir ki, yağı düşmən heç vaxt bizim qarşımızda duruş gətirə bilməyəcək.
Məhəmmədəli QƏRİBLİ
Yazı Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun maliyyə dəstəyilə çap olunur.
