Məlum olduğu kimi, sentyabrın 28-də BMT-nin Baş katibi Antonio Quterreşin təşəbbüsü ilə onunla Azərbaycan Respublikasının Prezidenti İlham Əliyev arasında videokonfrans formatında görüş olub.
Prezident İlham Əliyev Ermənistanın Azərbaycana qarşı törətdiyi hərbi təxribatla bağlı hadisələrin gedişinə dair məlumat verib. Qeyd edib ki, sentyabrın 27-də Ermənistan təmas xətti boyunca Azərbaycan Silahlı Qüvvələrinin mövqelərini və yaşayış məntəqələrimizi ağır artilleriyadan atəşə tutub və bunun nəticəsində mülki şəxslərimiz və hərbi qulluqçularımız həlak olublar. Azərbaycan tərəfi özünümüdafiə məqsədilə uğurlu əks-hücum əməliyyatları həyata keçirir.
Prezident İlham Əliyev vurğulayıb ki, Ermənistan tərəfi birinci dəfə deyil belə hərbi təxribatlar törədir. Belə ki, işğalçı ölkə bu ilin iyul ayında Azərbaycan-Ermənistan dövlət sərhədində buna oxşar təxribat həyata keçirib, avqust ayında isə erməni diversiya dəstəsi təmas xəttini keçməyə cəhd edib. Eyni zamanda, Ermənistan Azərbaycanın işğal olunmuş ərazilərinə başqa ölkələrdən xarici vətəndaşların qanunsuz məskunlaşmasını həyata keçirir ki, bu da Cenevrə Konvensiyasına görə, beynəlxalq hüququn ciddi pozulmasıdır.
Dövlət başçısı onu da qeyd edib ki, Ermənistanın Baş naziri Azərbaycana qarşı hərbi əməliyyatlarda iştirak etməyə məcbur ediləcək on minlərlə mülki vətəndaşdan ibarət silahlandırılmış mülki könüllülər dəstələri yaradıb.
Prezident İlham Əliyev söhbət zamanı bildirib ki, o, Ermənistanın yeni müharibəyə hazırlaşmasını BMT Baş Assambleyasının 75-ci sessiyasının ümumi debatlarında çıxışında qeyd edib.
Dövlət başçısı deyib ki, Ermənistan rəhbərliyi şüurlu şəkildə danışıqlar prosesini pozur. Ermənistan rəhbərliyinin “Dağlıq Qarabağ Ermənistandır” bəyanatı danışıqlara ciddi zərbə vurub. “Azərbaycan Dağlıq Qarabağla danışıqlar aparmalıdır” bəyanatı isə danışıqlar formatının dəyişdirilməsi cəhdidir ki, bu da qəbuledilməzdir və bu, Minsk Qrupunun rəhbərliyi tərəfindən də bildirilib.
Prezident İlham Əliyev deyib ki, Ermənistan-Azərbaycan Dağlıq Qarabağ münaqişəsi yalnız beynəlxalq hüquq normaları və Azərbaycanın ərazi bütövlüyü çərçivəsində, Ermənistan silahlı qüvvələrinin işğal olunmuş ərazilərdən dərhal, qeyd-şərtsiz və tam çıxarılmasını tələb edən BMT Təhlükəsizlik Şurasının müvafiq qətnamələri əsasında həll olunmalıdır.
BMT Baş katibinin Prezidentimizə zəngi və danışığa təşəbbüs etməsi o demək deyilmi ki, Qarabağ probleminin hazırkı həll yolunda Azərbaycanın siyasətinə tam dəstək var?
“Azərbaycan tam o dəstəyi qazanıb”
Siyasi İnnovasiya və Texnologiyalar Mərkəzinin direktoru, politoloq Mübariz Əhmədoğlu “Bakı-Xəbər”ə şərhində bildirdi ki, BMT Baş katibinin Prezident İlham Əliyevə zəngi və danışığa təşəbbüs etməsi Qarabağ probleminin hazırkı həll yolunda Azərbaycanın siyasətinə tam dəstək verildiyinin ifadəsidir. M.Əhmədoğlu hesab edir ki, Dağlıq Qarabağ məsələninin BMT-yə çıxarılmasının özü Azərbaycanın xeyrinə olan böyük hadisədir. “Azərbaycan dövləti düzgün siyasət aparmağı bacarır. Hazırda Dağlıq Qarabağ probleminin tənzimlənməsi vasitəçiliyi ilə məşğul olan ATƏT-in Minsk Qrupunun həmsədri olan hər üç dövləti həm də BMT Təhlükəsizlik Şurasının üzvüdür. Bu dövlətlər Dağlıq Qarabağ problemini öz monopoliyalarında saxlamaq üçün məsələnin BMT Təhlükəsizlik Şurasında müzakirəyə çıxarılmasını istəmirdilər. Azərbaycan Prezidentinin gücü, bacarığı ondadır ki, uzun illər bu istiqamətdə ardıcıl siyasət yürütməklə, çıxışlar etməklə nəhayət ki, Dağlıq Qarabağ məsələsini BMT-nin Təhlükəsizlik Şurasına çıxardı. Biz özümüz dəfələrlə Dağlıq Qarabağ məsələsini BMT Baş Assambleyasına çıxarmışıq, bu qurumun da bir neçə qətnaməsini almışıq. Amma bunlar heç biri 1993 və 1994-cü illərdə qəbul olunan 4 qətnamənin yerini vermir.
BMT-nin Baş katibinin zəngi və təşəbbüslərini, həmçinin də bu məsələnin BMT Təhlükəsizlik Şurasında müzakirəyə çıxarılmasını Prezident İlham Əliyevin Ermənistan üzərində çox ciddi psixoloji qələbəsi hesab edirəm. Çünki ermənilər üçün Dağlıq Qarabağ məsələsində yeganə ümid yeri, vasitəçi ancaq ATƏT-in Minsk Qrupudur. Onlar yalnız ATƏT-in Minsk Qrupunu qəbul edirlər, çünki Ermənistan özü razılıq verməsə, Ermənistan əleyhinə heç bir sənəd qəbul edilmir. ATƏT-in Minsk Qrupundan başqa dünyada olan bütün qurumlar, o cümlədən də BMT-nin Baş Assambleyası və Təhlükəsizlik Şurası mojaritar səsvermə mexanizmi ilə işləyir”.
BMT-nin Azərbaycana münasibətinin Ermənistan üçün çox qorxulu vəziyyət yaratdığını deyən M.Əhmədoğlu hesab edir ki, ermənilər həm hərbi əməliyyatlardan, həm Prezidentimizin beynəlxalq səviyyədə həyata keçirdiyi siyasətdən əndişələniblər. “Hazırda bizim Prezidentin həm erməni təxribatına qarşı cavabı, həm də siyasi aksiyası var. BMT-də baş verəcək hadisələr də, əməliyyatdan sonra baş verənlər də onu göstərəcək ki, ermənilər daha əvvəlki adamlar deyillər. Yeri gəlsə, Azərbaycan Prezidentinin böyüklüyünü qəbul etmək məcburiyyətində qalacaqlar. Amma, eyni zamanda, Azərbaycan Prezidentinin bu siyasətinə başqa prizmadan da yanaşmaq lazımdır. Həmsədr ölkələr bəzən bu məsələyə laqeyd yanaşırlar, həmsədr dövlətlərdən biri həmişə çalışırdı ki, bu problem onun özünün monopoliyasında qalsın, o elə ATƏT-in Minsk Qrupunu da öz monopoliyasına salmışdı, Qarabağ məsələsinin başqa yerlərdə müzakirə edilməsinə imkan vermirdi. Amma İlham Əliyev Dağlıq Qarabağ probleminin tənzimlənməsini ATƏT-in Minsk Qrupunun monopoliyasından çıxardı. Bu baxımdan, BMT-nin Baş katibinin təşəbbüslərini mən çox yüksək qiymətləndirirəm”.
M.Əhmədoğlu qeyd etdi ki, Dağlıq Qarabağ probleminin BMT Təhlükəsizlik Şurasının iclasına çıxarılmasının təşəbbüskarı beş Avropa dövlətidir - Böyük Britaniya, Almaniya, Fransa, Estoniya və Belçka. “BMT Təhlükəsizlik Şurasının iclasında müzakirənin gündəliyinin Azərbaycanın maraqlarına uyğun olduğunu görəcəyik. Hesab edirəm ki, Azərbaycan tam o dəstəyi qazanıb. Amma indi qərarın nə olub-olmayacağını bilmirəm, əsas odur ki, ermənilərə ciddi psixoloji zərbə vurulub” -deyə M.Əhmədoğlu vurğuladı.
İradə SARIYEVA
