Ordumuzun zəbt edilmiş ərazilərdə düşmənə qarşı yeni uğurlu hərbi əməliyyatı ermənilər arasında şok effekti yaradıb. Elə bu səbəbdəndir ki, düşmən zəbt edilmiş ərazilərdən qaçır. Erməni tərəfi bunu təxliyyə ilə əlaləndirsə də vəziyyət tamam başqadır.
Ermənistanın Rusiyadakı səfiri Vardan Toqanyan "Qovorit Moskva" radiosuna müsahibəsində etiraf edir ki, Azərbaycanın əks-hücum həmlələri Ermənistanda və Dağlıq Qarabağda yaşayan ermənilər arasında ciddi təlaşa səbəb olub. Erməni səfir bildirib ki, İrəvanda Dağlıq Qarabağ əhalisinin təxliyəsi planı üzərində iş gedir: "Ermənistan bölgədə vəziyyətin gərginləşməyə davam etməsi halında Dağlıq Qarabağ əhalisinin təxliyəsi üçün humanitar dəhlizlərin təşkili imkanlarını nəzərdən keçirir. Bu cür məsələlər nəzərdən keçirilir. Lakin ümid edirik ki, iş bu yerə gəlib çatmayacaq".
Rusiyanın “İzvestiya” qəzetinin bölgəyə ezam olunmuş müxbiri isə qeyd edir ki, işğal olunmuş Dağlıq Qarabağın Xankəndi şəhərində ermənilərin özbaşına təxliyəsi həyata keçirilir. Onun sözlərinə görə, insanlar kütləvi şəkildə İrəvana göndərilir: “Onları dərhal göndərirlər. Təxliyə olunanların İrəvanda heç bir qohumu və qalacağı yer yoxdur. Ancaq onlara orada mütləq qarşılanacaqlarını vəd edirlər. Amma onları elə-belə göndərirlər. Erməniləri sakitləşməyə çağıran separatçıların rəhbəri Araik Arutyunyanın müraciəti də heç bir effekt vermir”. Rusiyalı ekspert Yevgeni Norin bunları təbii sayır: “Azərbaycan 90-cı illərdə atəşkəsdən sonra öz silahlı qüvvələrinə çox böyük pullar yatırıb. Ermənistan Azərbaycandan xeyli kasıbdır, onun hərbi büdcəsi xeyli azdır. Üstəlik, Azərbaycanın Türkiyənin qismində güclü xarici dəstəyi var, hansı ki, bu ölkənin dəstəyi əvvəllər daha az ifadə olunurdu. Üzücü müharibədə ermənilərin vəziyyəti kifayət qədər mübahisəli olacaq. Rəqibləri onlardan maddi-texniki baxımdan üstündür, özü də dəfələrlə”. Elə Madagizdəki erməni ordusunun tamamilə demoralizə olunması da rus ekspertin dediklərinin təsdiqidir.
Müdafiə Nazirliyinin Mətbuat Xidmətinin rəisi, polkovnik Vaqif Dərgahlı bu xüsusda bildirib ki, Azərbaycan ordusunun genişmiqyaslı döyüş əməliyyatı nəticəsində Madagizdəki Ermənistan ordusunun alayı tamamilə demoralizə olunub, ölümqabağı əzabları başlayıb. "Şəxsi heyət təşviş içindədir. Dəstək məqsədilə yeni gələn ehtiyat qüvvələri də daxil olmaqla bir çoxları döyüşə girməkdən imtina edir və döyüş əməliyyatı rayonunu tərk edirlər". Yevgeni Norin isə qeyd edir ki, Qarabağdakı yeni münaqişənin gedişatı yaxın vaxtlarda aydınlaşacaq: “İndi situasiya çox dayanıqsızdır. Çox güman ki, Azərbaycan ordusu daha çox öz üstünlüyündən istifadə edib erməni mövqelərinin tədricən əzilməsini həyata keçirəcək. Onlar, çox güman ki, Amerika ordusunun İraqdakı üslubunda olduğu kimi tank kalonu ilə Xankəndiyə girməyəcəklər. Bu müharibədə, daha çox, Azərbaycan ordusu öz üstün atəş gücü ilə erməni ordusunun əzilib məhv edilməsini həyata keçirəcək”. Digər rusiyalı ekspert Andrey Zorin isə qeyd edib ki, bu müharibə çoxdan gözlənilirdi. Çünki Ermənistan Azərbaycan ərazisinin beşdə birini işğal edib. Münaqişənin dinc yolla nizamlanmasına dair danışıqlar isə nəticəsiz qalıb.
Sosial şəbəkələrin erməni seqmentindən məlum olur ki, ermənilər təşviş içindədir. Onlar Paşinyanın istefasını tələb edir, Ermənistan Müdafiə Nazirliyinin mətbuat katibi Şuşan Stepanyanın yaydığı məlumata skeptik yanaşır və itkilərin açıqlanmamasına biganə qalmırlar. Bu da erməni tərəfində panikanı daha da artırır. Beləliklə, görünən budur ki, Azərbaycan ordusu erməni təxribatlarının qarşısını çox məharətlə alır və bir neçə yaşayış məntəqəsi, strateji yüksəkliklər və postlar erməni işğalçılarından azad olunub. Bu fonda işğal olunmuş ərazilərdə, Ermənistan daxilində çox ciddi təşviş var, həm hərbçilər, həm də mülki şəxslər mövqelərini, yaşadıqları yerləri qaçaraq tərk edir. Halbuki, onlardan fərqli olaraq, xalqımızda çox böyük ruh yüksəkliyi var və hər bir Azərbaycan vətəndaşı bir əsgər kimi bu savaşa hazırdır.
Samirə SƏFƏROVA
