Paşinyanın ən böyük nailiyyəti – bütün siyasi rəqiblərin məhvi, erməni mediası “partlayır”...
"Məxməri inqilab” Ermənistanda hansı dəyişikliklərə gətirib çıxardı? Erməni cəmiyyəti iki ildir bu suala cavab tapmaqda aciz qalıb. Ümumiyyətlə, bu "inqilab” onların həyatında nəyisə dəyişdimi və yaxud Nikol Paşinyan bu müddət ərzində hansısa bir ciddi uğura imza atmağa müvəffəq olubmu?
Sözügedən məsələləri qabardan Ermənistanın “168.am” nəşri yazır ki, Paşinyanın iki il ərzində ən ciddi uğuru rəqiblərini sıradan çıxarmaq olub. Faktiki olaraq, artıq bu gün ona qarşı çıxa biləcək ciddi bir siyasi qüvvə qalmayıb. Xarici siyasətdə ilk vaxtlarda müstəqil olmağa çalışsa da, sonradan bundan da imtina etdi. Forpost damğasını əbədi olaraq öz üzərində gəzdirməyə üstünlük verdi. Ölkəyə vəd olunan investisiya axını da baş verməyib: “Əhali artmır, miqrasiya dayanmır, yaşlı insanların çəkisi artır, kəndlər boşalır və sonra da dağılır”.
Göründüyü kimi, Ermənistanda Paşinyanla bağlı ciddi inamsızlıq sindromu formalaşır. Maraqlıdır, bütün bunlar Nikola hansı siyasi perspektiv vəd edir?
- “...bütün iqtisadi və sosial təşəbbüslər baş tutmayacaq”
Sözügedən məsələni “Bakı-Xəbər”ə şərh edən politoloq Məhəmməd Əsədullazadə bununla bağlı bir sıra məqamlara toxundu: “Ermənistanda baş verənlər həm siyasi, həm də iqtisadi müstəvidə, demək olar ki, inkişafa deyil, tənəzzülə doğru gedir. Ermənistanda hakimiyyət çevrilişindən sonra bu ölkədə islahatlar, həqiqətən, köhnə hakimiyyət mənsublarının həbsilə yadda qaldı. Ondan sonra bu ölkədə müsbətə doğru dəyişikliklər, demək olar ki, baş vermədi. Xalq ölkədə siyasi, iqtisadi və sosial problemlərin həllini gözləyirdi. Ancaq, məlum olduğu kimi, hazırkı məqamda Ermənistanda bu sahələrdə irəliləyiş yoxdur. Çünki ölkədə iqtisadiyyatda artım yoxdur. İnkişaf iqtisadi artım olmadan mümkün deyil. Ölkə Rusiyanın forpostu olaraq qalır və bu yöndə proseslər davam edir. Bu ölkənin işğalçı siyasəti Ermənistanın müstəqil dövlət kimi formalaşmasında böyük baryerdir. Ona görə də Nikol Paşinyanın islahatlar anonsu elə anons kimi qalmaqdadır. Nə qədər Qarabağ məsələsində bu ölkə kompromisə getməsə, işğala son verməsə, bütün iqtisadi və sosial təşəbbüslər baş tutmayacaq. Ümumiyyətlə, Ermənistanda demoqrafik problem dərinləşməklə, bir növ, ölkə əhalisizləşir. Demək, Ermənistanı xoş gələcək gözləmir. Bunun nədəni işğalçı siyasətindədir”.
Politoloq hesab edir ki, Paşinyanın limiti, demək olar, tükənib.
Vidadi ORDAHALLI
