Ankarada Azərbaycan Xarici işlər naziri Ceyhun Bayramovun Türkiyə Xarici işlər naziri Mövlud Çavuşoğlu ilə görüşü keçirilib.
Nazirlərin təkbətək görüşündən sonra nümayəndə heyətlərinin iştirakı ilə keçirilən geniş tərkibli görüşdə ikitərəfli əməkdaşlığın gündəliyinin bir çox istiqamətləri, regional və qlobal məsələlər üzrə geniş fikir mübadiləsi aparılıb.
Türkiyə XİN rəhbəri Azərbaycanın Xarici işlər naziri Ceyhun Bayramovla birgə keçirdiyi mətbuat konfransında 12 iyul hadisələrini xatırladaraq deyib ki, o gün nə demişdiksə, bu gün də onu deyirik:”Qardaş Azərbaycan yalnız deyil, bütün imkanlarımızla qardaş Azərbaycanın yanındayıq, yanında olmağa da davam edəcəyik. Ermənistan illərdir qardaş Azərbaycan torpaqlarının 20 faizini işğal altında saxlayır və bu günə qədər verilən bütün beynəlxalq qərarlara baxmayaraq, bu münaqişənin həllində maraqlı deyil. Bu təxribatı da bir daha Ermənistanın əsl məqsədlərini göstərdi.
Bu münaqişə bu günə kimi niyə həll olmayıb? Bu sualın cavabı beynəlxalq ictimaiyyətin, xüsusən də Minsk Qrupunun səmimi bir şəkildə bu müaniqşənin həlli üçün çalışmamasındadır".
Mövlud Çavuşoğlu deyib ki, Azərbaycan Türkiyəyə təbii qaz nəqli üzrə artıq birinci yerdədir. “Gələcək illərdə biz Azərbaycandan qaz alışı həcmini artıracağıq”, - o deyib.
Türkiyə XİN rəhbəri məlumat verib ki, Cənubi Qafqaz regionunda Azərbaycanla reallaşdırılan logistika layihələri ilə yanaşı, hazırda reallaşdırılmasına “çox böyük önəm verilən” daha iki layihə var.
“Söhbət Qars-Naxçıvan dəmir yolu və Türkiyə-Naxçıvan qaz kəmərinin tikintisindən gedir. Eyni zamanda, Türkiyədən Azərbaycanın Naxçıvan Muxtar Respublikasına təbii qaz nəqlini nəzərdə tutan layihə böyük strateji əhəmiyyət kəsb edir”, - deyən Çavuşoğlu vurğulayıb ki, Türkiyə və Azərbaycan “qarşılıqlı ticarət və sərmayələrin həcmini mütləq artıracaq”, həmçinin mədəniyyət və təhsil sahələrində əməkdaşlığı möhkəmləndirmək niyyətindədirlər.
“Biz Azərbaycan XİN başçısı ilə bu məsələləri müzakirə etdik. Əlbəttə ki, iqtisadiyyat, ticarət və investisiya sahələrində əməkdaşlıq çox vacibdir, lakin bütün sahələrdə qarşılıqlı əlaqələrin genişləndirilməsi üçün səylərimizi davam etdirəcəyik”, - türkiyəli nazir deyib.
Çavuşoğlu bildirib ki, Türkiyə Azərbaycana iki ölkə turistlərinin daxili pasportlarla səfərlərinin təşkilini təklif edir:“Biz Azərbaycanla iki ölkə turistlərinin 90 gün ərzində qarşılıqlı vizasız səfərləri ilə bağlı məsələni artıq həll etmişik (2020-ci il avqustun 13-dən etibarən qüvvəyə minir - İF). Lakin bu kifayət deyil. Azərbaycan və Türkiyə vətəndaşları üçün daxili pasportlarla qarşılıqlı səfərləri təşkil etmək zəruridir”, - o deyib.
Çavuşoğlu xatırladıb ki, Türkiyə artıq Gürcüstan və Ukrayna ilə daxili pasportlarla qarşılıqlı səfərləri təşkil edib.
“Yeni nəsil elektron şəxsiyyət vəsiqələrində bütün zəruri məlumatın olduğunu nəzərə alaraq, daxili pasportlarla səfərlərin təşkilinə dair təkliflər irəli sürmüşük və onları həyata keçirəcəyik”, - Türkiyə XİN rəhbəri bildirib.
Azərbaycanın Xarici işlər naziri Ceyhun Bayramov deyib ki, Türkiyə ilə münasibətlərin daha da genişlənməsi, dərinləşməsi Azərbaycan siyasətinin əsas istiqamətlərindəndir:"Qardaş Türkiyə hər zaman Azərbaycanın beynəlxalq hüquqa əsaslanan mövqeyini dəstəkləyir. 12 iyul tarixində Ermənistanın törətdiyi təxribat zamanı da biz qardaş Türkiyənin bu dəstəyinin şahidi olduq. Buna görə mən həm öz adımdan, həm Azərbaycan xalqı adından təşəkkürümü bildirirəm.
Azərbaycan hər zaman bütün məsələlərdə Türkiyənin haqq işini dəstəkləyir və Türkiyənin yanındadır. Burada göstərilən qonaqpərvərliyə görə təşəkkür edirəm".
Ceyhun Bayramov deyib ki, Azərbaycan-Türkiyə münasibətləri geniş sahələri əhatə edir. Bugünədək iki ölkə arasında 241 müqavilə imzalanıb və onların icrası həyata keçirilir. Hazırda 29 əlavə müqaviləyə baxılır və yaxın zamanlarda onların imzalanması baş tutacaq. O deyib ki, bütün sahələrdə dinamik inkişaf gedir. Təkcə 2020-ci ilin ilk 5 ayında ticarət dövriyyəmiz əlavə olaraq 20 faiz artıb.
Sonda Ceyhun Bayramov Mövlud Çavuşoğlunu Azərbaycana dəvət edib. Dəvəti qəbul edən Türkiyə XİN rəhbəri Azərbaycanda özünü evindəki kimi hiss etdiyini bildirib və tezliklə Azərbaycana səfər edəcəyini qeyd edib.
