Cənubi Qafqaz ölkələri sırasında koronavirus Ermənistanı daha çox sarsıtmaqda davam edir. Bu durumda hakimiyyətdən artan narazılıq da Nikol Paşinyan üçün ciddi problemə çevrilir. Erməni mediası yazır ki, Paşinyan artan narazılıqdan ehtiyatlanaraq, cəmiyyətin diqqətini yenidən başqa istiqamətə yönəltməyə çalışır. Məsələn, o, “Vətən” partiyasının lideri, Milli Təhlükəsizlik Xidmətinin keçmiş rəhbəri Artur Vanetsyana qarşı, hansı yolla olursa-olsun, cinayət işi açılmasına çalışır. Bu yolla da cəmiyyətin diqqətini bir müddət üçün bu məsələ üzərində cəmləşdirməyi hədəfləyir.
Reallıqda isə koronavirus Ermənistanı çpkdürməkdə davam edir. Artıq Ermənistanda koronavirusa yoluxanların sayı 41 min nəfərə çatıb. Səhiyyə Nazirliyinin Xəstəliklərə Nəzarət və Profilaktikası Milli Mərkəzi bildirir ki, pandemiya qurbanlarının sayı 800 nəfəri ötüb. Koronavirus diaqnozu qoyulmuş daha 228 nəfər isə başqa səbəblərdən ölüb. Ekspertlərin fikrincə, Ermənistan hökuməti koronavirusa yoluxma və ölüm faktlarını bilərəkdən gizlədir. Mütəxəssislərin sözlərinə görə, faktiki olaraq, Ermənistanda koronavirusa yoluxanların sayı 100 mindən də çoxdur. Pandemiya qurbanlarının sayı isə minlərlədir. Səhiyyə Nazirliyi artıq bir neçə gündür ki, başqa səbəblərdən ölən koronavirus xəstələrinin dəqiq sayını bilmir. Bu durumda artan narazılığa son qoyulması üçün Paşinyan rəqiblərinə qarşı inzibati metodları işə salıb. Onlardan biri də Artur Vanetsyandır. Amma məsələ burasındadır ki, Vanetsyana qarşı cinayət işi açmaq üçün heç bir əsas yoxdur. Bu durumda erməni mediası yazır ki, Paşinyanın gedişləri ilə ölkədə neobolşevizm qurulur. Qeyd edilən məqamla bağlı Ermənistanın “168.am” nəşri yazır:“Bu gün Ermənistan olduqca maraqlı günlər yaşayır, çünki ortaq bir siyasi gündəm və baxış yoxdur, üstəlik, ölkənin gündəlik həyatı “baş redaktorun” şıltaqlığı və istəkləri ilə formalaşır. İstənilən ibtidai mövzu ictimai diqqət mərkəzinə çevrilə və təriflənə bilər, yaxud əksinə, ən vacib məsələ sadəcə arxa plana atıla bilər. Bu gün cəmiyyətin bir hissəsi zombiləşdirilib, ictimai diskussiya isə iflasa uğrayıb, daha doğrusu, sosial şəbəkələrin sahəsinə keçib. Hər yerdə erməni gerçəkliyinin ilk öncə yükləndiyi, sonra idarəolunmaz xaos yaradan təhdid və təhqirlərin şahidi oluruq. Günün mövcüd bürokratları ictimai sferanı tam nəzarət altına alıblar, bu da ölkə daxilindəki demokratik proseslərin parçalanmasına, yalançı demokratik proseslərlə əvəz olunmasına səbəb olur. Nəticədə ölkədə tədricən klassik neobolşevizm qurulur. Paşinyanın, əslində özü və siyasi komandası üçün nəyin prioritet olduğuna dair fəaliyyət gündəminin olmadığını açıq şəkildə deyə bilərik. Eyni zamanda görürük ki, Paşinyan atdığı addımları Konstitusiyaya uyğun həyata keçirmək əvəzinə, istənilən qərarı qəbul edərkən öz fikir və hisslərini rəhbər tutur. Bölücü xətlərin davamlı tətbiqi yolverilməz və tənqid olunan haldır, bunun üçün yalnız günün neobolşevik hökuməti məsuliyyət daşıyır. Mövcud siyasi rəhbərlik qanunlara riayət edilməli olduğunu başa düşmür, halbuki bu, qanunların aliliyilə idarə olunan hər hansı bir dövlətin qızıl qaydasıdır, amma bu gün açıq şəkildə dövlətin qorxu atmosferi yayan addımlarını görürük. Demək olar ki, gündəlik olaraq, ən yüksək orqanların xəbəri və ya xüsusi tapşırığı olmadan reallaşması mümkün olmayan repressiv mexanizmlərin istifadəsi və açıq çəkildə güc nümayişinin şahidi oluruq. Bu, cəmiyyətdə hökumət əleyhinə qarışıqlıqların yaradılması və ya gözlənilən hər hansı bir addımın qarşısını almaq üçün edilir. Nikol Paşinyanın iki ilə yaxındır apardığı siyasi kursa neobolşevizmdən başqa bir ad vermək mümkün deyil. Keçən əsrin 20-30-cu illərində hər yerdə xainlərin və hər bir fərqli məsələlərdə günahkarın necə axtarıldığını bilirik, bu gün həmin hərəkətlərin təkrarlanması baş verir, Paşinyan müxtəlif uğursuzluqlarını gizlətmək üçün günahkarlar “təyin edir”. Tez-tez indiki hakimiyyətin müxtəlif mənsublarının “heç bir məhkəmə prosesinə müdaxilə etmədiklərini” bəyan etdiklərini eşidirik, ancaq hökumət üçün siyasi problemlər yaradan siyasətçilərin və ya iqtisadi fəaliyyətlə məşğul olanların necə “şərləndiklərini” və onlara qarşı cinayət işi açıldığını, hakimiyyət üçün arzuolunmaz şirkətlərdə “sürpriz” yoxlamalar aparıldığını görürük”. O da qeyd edilir ki, Paşinyan hökuməti ilə yüz il əvvəl bolşeviklər tərəfindən atılan addımlar arasında müqayisə aparılsa, onlarla oxşarlıq ortaya çıxar:“Bolşeviklər də, Paşinyan da hakimiyyətə gəldikdən sonra kilsəni, milli dəyərləri hədəf almağa çalışdı, hər ikisi açıq senzura və digər partiyaların nümayəndələrinə qarşı müxtəlif təzyiqlərlə məşğul oldu. Bolşeviklər bir vaxtlar fədakarlıqla qışqırdıqları kimi, Nikol da istənilən “köhnə” qalıqları təmizləməyə çalışır və özünü hər şeyin “başlanğıcı” hesab etmək istəyir. O zaman olduğu kimi, indi də tarixin necə redaktə olunmasına cəhd edildiyinə şahid oluruq. Bütün bunlarla yanaşı, Paşinyan öz qabiliyyətsizliyi ilə ötən əsrin əvvəllərində baş verənlərin macəraçılarından daha “üstün”dür, çünki onlar ilk öncə Nikolun malik olmadığı özünəməxsus bir ideologiyaya sahib idilər. Bolşeviklər, daha sonra isə kommunistlər əsl vətəndaşı yaratmaq üçün özünəməxsus bir mexanizmə sahib idilər, Paşinyanın isə belə bir vətəndaş haqqında mifik düşüncədən başqa heç bir şeyi yoxdur”.
Samirə SƏFƏROVA
