Iyulun 12-də günorta saatlarından başlayaraq Ermənistan silahlı qüvvələrinin bölmələri Azərbaycan-Ermənistan dövlət sərhədinin Tovuz rayonu sahəsində atəşkəs rejimini kobud şəkildə pozaraq artilleriya qurğularından istifadə etməklə mövqelərimizi atəşə tutub.
Azərbaycan-Ermənistan dövlət sərhədinin Tovuz istiqamətində iyulun 13-nə keçən gecə ərzində və sonrakı günlərdə də gərginlik davam edib. Artilleriya, minaatan və tankların tətbiqi ilə gedən gecə döyüşlərində bölmələrimizin dəqiq atəşi ilə düşmənin dayaq məntəqəsi, artilleriya qurğuları, hərbi hissəsi ərazisində avtomobil texnikası və canlı qüvvəsi məhv edilib. Həmin döyüşlərdə Azərbaycan Ordusu da itkilər verib. Qeyd edək ki, Ermənistanın bu təxribatını bəzi ölkələr və nüfuzlu beynəlxalq təşkilatlar dərhal pisləyib.
Görünən budur ki, beynəlxalq ictimaiyyət Azərbaycan-Ermənistan sərhədində gərginləşmiş vəziyyəti diqqətlə izləyir. Beynəlxalq strukturlar və müxtəlif dövlətlərin rəsmi nümayəndələri tərəflər arasında açıq şəkildə rəsmi Bakını dəstəklədiklərini bəyan ediblər.
Qarabağ münaqişəsinin nizama salınması danışıqlarında vasitəçi mandata sahib olan ATƏT-in Minsk Qrupu iyulun 13-də vəziyyətlə bağlı bəyanat yayıb. Bəyanatda Minsk Qrupunun həmsədrləri atəşkəs rejiminin son pozuntularını qınayıb. ATƏT-in Minsk Qrupuna həmsədrlik edən ölkələr olan Rusiya, ABŞ və Fransadan da müxtəlif səviyyələrdə neytral xarakterə malik bəyanatlar olub.
Ermənistanın üzv olduğu, Azərbaycanın üzv olmadığı Kollektiv Təhlükəsizlik Müqaviləsi Təşkilatının bəyanatı beynəlxalq strukturların reaksiyasından xüsusi diqqətə layiqdir. Təşkilatın katibliyi tərəfləri hərbi əməliyyatları dərhal dayandırmağa çağırıb. Maraqlıdır ki, bu vəziyyətdə rəsmi Kiyev Bakıya öz dəstəyini bildirmək fürsətini növbəti dəfə əldən verməyib.
Türkiyə Prezidenti, Xarici İşlər Nazirliyi və müxtəlif digər qurumları birmənalı olaraq Azərbaycana dəstək verib.
Pakistan Xarici İşlər Nazirliyi də birmənalı olaraq Azərbaycana dəstək olub.
İran Prezident administrasiyası səviyyəsində Azərbaycanın ərazi bütövlüyünü dəstəklədiyini və bunun ölkəsi üçün prioritet məsələ olduğunu bildirib. Moldova Azərbaycanın ərazi bütövlüyünü dəstəklədiyini bəyan edib. Ukrayna XİN Azərbaycan-Ermənistan sərhədində vəziyyətin gərginləşməsi ilə bağlı narahatlığını bildirərək vurğulayıb ki, Ukrayna tərəfi Azərbaycan Respublikasının suverenliyinin və ərazi bütövlüyünün qorunması əsasında onun beynəlxalq səviyyədə tanınmış sərhədləri ilə vəziyyətin həllini dəstəkləyir. Ermənistanın strateji müttəfiqi hesab olunan Rusiya, erməni lobbi qruplarının güclü olduğu Fransa və ABŞ bitərəf mövqedən çıxış edib.
Avropa İttifaqının (Aİ) Cənubi Qafqaz və Gürcüstan böhranı üzrə xüsusi nümayəndəsi Toivo Klaar da məlum təxribatla bağlı öz “Twitter” mikrobloqunda fikirlərini bölüşüb. O, Azərbaycan-Ermənistan dövlət sərhədində atışmanın çox narahatedici olduğunu vurğulayıb.
Beynəlxalq ictimaiyyətin bu dəfə məsələyə belə operativ və Ermənistanı qınayan tərzdə reaksiya verməsi nəyin əlaməti sayıla bilər?
Azərbaycan Sosialist Partiyasının sədri Elşən Həsənov “Bakı-Xəbər”ə açıqlamasında bildirdi ki, bunun bir sıra əsaslı səbəbləri var:“Artıq Ermənistanın informasiya diversiyası tam gücü ilə işləmir. Biz həmin blokadanı nəinki yarmışıq, hətta indi onlara qarşı informasiya cəbhəsində hücum mövqeyindəyik. Eyni zamanda, bu dəfə Ermənistanın taxribata dövlət sərhədindən başlaması onların niyyətinin nədən ibarət olmasına qəti şübhə yeri saxlamadı. Bəlli oldu ki, Ermənistan silahlı qüvvələrinin Tovuz rayonu istiqamətində həyata keçirdiyi hərbi təxribatın məqsədi Azərbaycan Ordusunun nəzarət etdiyi mövqeləri ələ keçirməkdən ibarət olub. Təsadüfi deyil ki, sözügedən təxribatdan sonra Ermənistan Müdafiə Nazirliyinin rəsmi “Twitter” hesabından paylaşılan məlumatda bildirilir ki, düşmən ölkənin müdafiə naziri David Tonoyan ATƏT-in Minsk Qrupunun şəxsi nümayəndəsi Andrey Kaspşiklə sonuncu görüşündə yeni strateji mövqelər ələ keçirməklə bağlı niyyətlərini ifadə edir. Mülki sakinlərimizin düşmənin ağır texnikasının hədəfinə tuş gəlməsi isə Ermənistan dövlətinin əsl xislətini ortaya qoydu. Digər tərəfdən, Azərbaycanın dünyada nüfuzunun, çəkisinin gündən-günə daha da artması, beynəlxalq mövqelərinin daha da güclənməsi Ermənistanın bu şəkildə sərt qınanmasına səbəb oldu. Ölkəmizin diplomatik uğurları, dövlət başçımızın irəli sürdüyü təşəbbüslərin beynəlxalq arenada əsaslı şəkildə dəstəklənməsi, o cümlədən ölkəmizin sədrlik etdiyi beynəlxalq təşkilatlardakı uğuru da buna səbəb olan amillərdəndir. Ermənistanın təxribata əl atmağının bir səbəbi də məhz bu amillə bağlıdır. Qoşulmama Hərəkatının Zirvə toplantısının geniş rezonans doğurması, Azərbaycanın təşəbbüsü ilə BMT Baş Assambleyasının xüsusi iclasının keçirilməsi barədə qərar qəbul edilməsi Ermənistanı ciddi narahat edir.
Bunların hamısı zəncirvari şəkildə bir-birinə bağlı olduğundan ortada belə nəticə var. İndi siz təsəvvür edin ki, bizim beynəlxalq qurumlarla işləməli olan nazirliyimizin fəaliyyəti həmin zaman daha yüksək səviyyədə olsaydı, nəticə necə olardı? Bilirsiniz ki, Prezident müşavirədə dedi ki, həmin gərgin anlarda sabiq XİN rəhbərini yerində tapa bilməyib. Ümidvaram ki, yeni rəhbərlik diplomatik arenada işi daha yaxşı təşkil etməklə ermənilərin daha da ifşa olunmasına şərait yaradacaq”.
Artıq Ermənistanın, bütün sahələrdə olduğu kimi, beynəlxalq əlaqələr sistemində də siyasətinin tam süquta uğradığına şübhə yeri qalmır.
Məhəmmədəli QƏRİBLİ
