Ermənistanın İctimai Televiziya kanalında baş nazir Nikol Paşinyanın məlum videosundan sonra istefalar davam edir. Erməni mətbuatının verdiyi xəbərə görə, daha əvvəl kanalın icraçı direktoru Marqarita Qriqoryan vəzifəsini tərk edib. Televiziyanın yayım işinə cavabdeh olan Vardan Hakobyan da işdən uzaqlaşdırılıb.
Televiziya və Radio üzrə Milli Komissiyanın iclasından sonra məlum olub ki, İctimai Televiziya və Radio şirkətinin İdarə Heyətinin sədri Ara Şirinyanın, proqram direktoru Tereza Kərimyan, İctimaiyyətlə əlaqələr və xarici əlaqələr üzrə direktor Tiqran Danielyan, İnsan resursları departamentinin direktoru Nazeli Nikoqosyan və xəbərlər və analitik proqramlar direktoru Petros Kazaryan da istefa ərizəsi yazıb. İstefalara səbəb baş nazir Nikol Paşinyanın vətəndaşlara etdiyi cümə müraciəti ilə bağlı videogörüntülərin yayılması olub. Belə ki, onun koronavirus pandemiyasının sosial-iqtisadi təsirləri barədə xalqa birbaşa efirdə müraciətindən əvvəl lentə alınmış texniki məşqdə çəkilən kadrlardan düzəldilmiş video yayılıb. Kadrlarda Paşinyanın öskürdüyü, bu zaman əli ilə ağzını tutmadığı, su şüşəsini başına çəkdiyi, dərman atdığı görünür. Videonun “müəllif”ləri bəlli olmasa da, sosial şəbəkə istifadəçiləri bildiriblər ki, kadrlar sadəcə “sızdırılıb”.
Qeyd edək ki, Ermənistanda insan haqlarının pis vəziyyətdə olması ilə bağlı hətta dünyanın tanınmış hüquq müdafiə təşkilatları həyacan təbili çalır. Bu günlərdə yayılan “Amnesty İnternational” təşkilatının hesabatında Ermənistanda hakimiyyətin məhkəmə sisteminə çiddi təzyiqlər etdiyi öz əksini tapıb. Ancaq aydın şəkildə görünür ki, Ermənistanda insan haqları və demokaratik təsisatlara hücum yalnız məhkəmə-hüquq sistemini əhatə etmir. Paşinyan öz siyasi rəqiblərini bütün vasitələri tətbiq etməklə sıradan çıxarır. Hətta pandemiyadan istifadə edərək, xarici ölkələrdə olan bəzi arzuolunmaz səfirləri geri çağırıb. Konstitusiya Məhkəməsi ilə bağlı xüsusi referendum keçirir ki, hakimləri asanlıqla istefaya göndərə bilsin. İctimai Televiziya ilə bağlı yaşananlar isə Paşinyanın medianı da ciddi hədəfə aldığını üzə çıxarır. Belə antidemokratik addımlar, Paşinyanın demokratiya imitasiyasını ifşa edən faktlar beynəlxalq hesabatlarda niyə tam əks edilmir?
Hüquq müdafiəçisi Əhməd Şahidov “Bakı-Xəbər”ə açıqlamasında bildirdi ki, beynəlxalq təşkilatlar Ermənistanla bağlı neqativlikləri tam əks etdirmir:
“Bu yaxınlarda dərc edilən “Amnesty İnternational”ın hesabatında biz bunun bir daha şahidi olduq. İnandırım sizi, məhz Ermənistanla bağlı hesabatı oxuduqdan sonra bir daha tam əmin oldum ki, bu təşkilatın başbilənləri ya ermənidir, ya da erməni lobbisinin əlaltıları. Çünki Ermənistanla bağlı hesabatında “Amnesty İnternational” o qədər neytral fikirlər səsləndirir ki, Ermənistanı yaxından tanımayan adamın bu ölkəyə simpatiya bəsləməkdən başqa seçimi qalmır. Sanki dünyanın ən “demokratik” və “humanist” ölkəsi elə Ermənistanmış. Nədənsə, bu təşkilat Ermənistanda müxalif siyasi partiya liderinin türmədə aclıq aksiyası keçirərək dünyasını dəyişməsindən yazmır. Azərbaycanın işğal olunmuş torpaqlarından, bu torpaqlarda dağıdılmış məscid və tarixi abidələrdən, 6 ildir Şuşa həbsxanasında qanunsuz girov saxlanılan Dilqəm Əsgərov və Şahbaz Quliyevdən, beynəlxalq qanunvericiliyi tapdalayaraq "Qarabağ Ermənistandır!" deyən Paşinyanın şovinist çağırışlarından, paytaxt İrəvanın mərkəzində ucaldılan faşist heykəlindən və bu kimi digər məqamlardan danışmır bu insan haqları təşkilatı. Amma Azərbaycana gələndə hər şeyi görür. Daha doğrusu, hər şeyi əyri görür. Ermənistanda demokratiyanın bütün dəyərlərinə hakimiyyətin basqısı var. İnsan haqları ilə bağlı vəziyyət gərgindir. Son hadisələr göstərir ki, Paşinyan mediaya qarşı da avtoritar yanaşma ortaya qoyur. Onun barəsində hansısa materialın efirə getməsi bütün bir televizya kanalının istefası ilə nəticələnib. Bu faktlar bir daha sübut edir ki, Ermənistanda demokratiyadan əsər-əlamət yoxdur”.
Məhəmmədəli QƏRİBLİ
