Xarici ölkələrdə fəaliyyət göstərən bəzi KİV-in Azərbaycana qarşı qərəz nümayiş etdirdiyi məlumdur. Ermənipərəst mövqedən çıxış edən bu KİV-in sırasında “Evronyus” telekanalı da var. Dəfələrlə ölkəmizə qarşı xoşagəlməz süjetlər yayımlayan “Evronyus” bu dəfə bir qədər də irəli gedib.
“Evronyus” telekanalının Azərbaycana qarşı qərəzli mövqe sərgilədiyi haqqında “Baku TV” məlumat yayıb. Onun verdiyi xəbərə görə, Ermənistanın koronavirusla mübarizəsindən bəhs edən süjetdə 2018-ci ildə bu ölkədə hakimiyyət dəyişikliyindən sonra görünməmiş bir yüksəliş olduğu, iqtisadi artım baxımından Azərbaycanı və Gürcüstanı qabaqladığı, yoxsulluğun ən aşağı səviyyəyə endiyi bildirilib.
Məlum olduğu kimi, kanalın Ermənistanda “iqtisadi artımı” qaldırıb dağ başına qoyması gülüncdür. Çünki Ermənistan Cənubi Qafqazın ən acınacaqlı vəziyyətin hökm sürdüyü respublikasıdır.
Ekspertlər qeyd edirlər ki, Ermənistanda iqtisadi vəziyyət heç də göstərildiyi kimi deyil. Onsuz da vəziyyəti ağır olan Ermənistanda karantin rejiminin tətbiqi ölkə iqtisadiyyatını çətin hala salıb. Bir çox sektorda istehsalat 90 faiz azalıb.
Xatırladaq ki, martın 16-dan karantin rejimi tətbiq edilən Ermənistanda məhdudiyyətlər mayın 14-dək davam edəcək. Rəsmi İrəvan isə məhdudlaşdırıcı tədbirləri tədricən yüngülləşdirəcəyini vəd edir.
“Evronyus” Paşinyanın Ermənistanı koronavirusdan xilas etmək üçün tədbir görmək əvəzinə, ianə diləndiyini niyə qeyd etmir?”
BDU-nun Tarix fakültəsinin Erməni araşdırmaları elmi-tədqiqat və tədris mərkəzinin böyük elmi işçisi, ermənişünas alim İsmayıl Tanrıverdi “Bakı-Xəbər”ə bildirdi ki, Ermənistanda seçkilərdən sonra heç bir müsbət dəyişiklik baş verməyib, əksinə, Paşinyan hakimiyyətə gələndən sonra bu ölkədə vəziyyət günü-gündən daha da pisləşib. “Hesab edirəm ki, “Evronyus”un Ermənistanda seçkilərdən sonra müsbət dəyişikliklər baş verdiyi ilə bağlı yaydığı süjet, tamaşaçılara çatdırdığı informasiya yalan üzərində qurulub. Çünki bu, reallığı əks etdirmir. Bütün dünya bilir ki, 2018-ci il seçkilərindən sonra erməni cəmiyyəti, sözün həqiqi mənasında, dilənçi vəziyyətinə düşüb. Ermənistan iqtisadi cəhətdən Azərbaycandan və Gürcüstandan üstün deyil, qat-qat aşağıdır. Ermənistanın iqtisadiyyatı yoxdur ki, orada artım baş versin. Yoxsulluq səviyyəsinə gəlincə, bu ölkədə yoxsulluq səviyyəsi aşağı düşməyib, əksinə, artıb. Bilirsiniz ki, Paşinyanın nüfuzu həddindən çox aşağıdır və hətta srağagün erməni saytları Paşinyanı sərt tənqid etmişdi. Erməni mətbuatı yazıb ki, Paşinyan, utan, Ermənistanda koronavirusa yoluxanların sayı Gürcüstanla Azərbaycanda bu virusa yoluxanların toplam sayına bərabərdir. Yəni Gürcüstan və Azərbaycanda virusa yoluxan insanları bir yerə toplasaq, 3 milyon əhalisi olan Ermənistanda bu virusa yoluxanların sayı onlara bərabər gəlir. Azərbaycanla Gürcüstanın ikisinin bir yerdə 14 milyon əhalisi varsa, Ermənistanda əhalinin sayı heç 3 milyon deyil. Rəsmi statistikada 3 milyon göstərilsə də, oradan köçənlərin sayı da çoxdur”.
Paşinyanın koronavirusla mübarizədə heç bir planının olmamasının Ermənistan əhalisinin dayanmadan virusa yoluxmasına səbəb olduğunu deyən İ.Tanrıverdi hesab edir ki, Paşinyan erməni xalqını virusdan xilas etmək üçün heç bir iş görmür, yalnız, ənənəsinə sadiq qalaraq, ianə dilənir: “Erməni mediası Ermənistanda baş verən hakimiyyət dəyişikliyinin Ermənistana gətirdiyi uğursuzluqlar barədə kifayət qədər yazır. Bu gün “Evronyus” Paşinyanın Ermənistanı koronavirusdan xilas etmək üçün tədbir görmək əvəzinə, ianə diləndiyini niyə qeyd etmir? Bu faktları beynəlxalq ictimaiyyətə çatdırsaydı, daha obyektiv görünmüş olardı. Erməni mediası ingilis və rus dillərində yaydıqları məlumatları Ermənistandakı “inkişafı” təbliğ etmək üzərində qururlar. “Evronyus” da bu məlumatlara aldanıb və onu tirajlayıb. Erməni dilində olan məlumatlar isə Ermənistanın, Paşinyan rejiminin tamamilə iç üzünü açıb göstərir.
Paşinyan Ermənistan əhalisindən koronavirusa görə nümunələr götürülməsinə yardım etmələri üçün Avropa ölkələrinə müraciət edib. O deyib ki, bizim test alıb əhaliyə tətbiq etmək imkanımız yoxdur, Avropa ölkələri bizə kömək etsinlər. Paşinyanın rəhbərliyi ilə ianə hesabına yaşayan Ermənistan öz “iqtisadi göstəriciləri” ilə güclü iqtisadiyyata malik olan Azərbaycanı necə üstələyə bilər? Yeri gəlmişkən deyim ki, bu gün Ermənistan dünyanın müxtəlif ölkələrindən göndərilən ianələr hesabına mövcudluğunu qoruya bilir. Bu ölkənin əhalisi ancaq ianə hesabına yaşayır. Çindən, ABŞ-dan, Fransadan və digər Avropa ölkələrindən bu ölkəyə ianələr edilib. Pandemiya dövründə Ermənistana koronavirusla mübarizə aparması üçün Avropa Birliyindən 51 milyon dollar yardım edildi, Çindən iki təyyarə yardım gəldi. Ermənilərə maska, test, həkimlərin istifadə etdiyi geyimlər yardım edilir. Azərbaycanda isə vəziyyət fərqlidir. Pandemiya başladığı gündən Azərbaycan özü müxtəlif dövlətlərə yardımlar göstərir, maliyyə vəsaiti ayırır, bir çox halda testləri və digər vəsaitləri öz maliyyəsi hesabına alır. Bundan başqa, Azərbaycan dövlətinin etdiyi yardımlara qarşılıq olaraq, bizim ölkəmizə də müxtəlif dövlətlər yardımlar edirlər. Bu da pandemiya dövründə yardımlaşma, əməkdaşlıq anlamına gəlir.
Bir müddət əvvəl ermənilər 50 ədəd süni tənəffüs cihazını kreditlə aldıqlarını açıqlayıblar. Sonra da ermənilər özləri deyirlər ki, bunun adı kredit olsa da, sonda biz onu hədiyyə kimi qəbul edəcəyik”.
İradə SARIYEVA
