Məlum olduğu kimi, COVID-19 pandemiyası ilə bağlı olaraq hazırda Azərbaycanda da xüsusi karantin rejimi tətbiq olunur. Xüsusi karantin rejimi müddətində Azərbaycanda əhalinin sağlamlığının qorunması istiqamətində bir sıra tədbirlər görülür. Ölkə daxilində şəhərlərarası gediş-gəliş məhdudlaşdırılıb, dövlət sərhədi bağlanıb, paytaxtda metropolitenin fəaliyyəti müvəqqəti olaraq dayandırılıb.
Ölkə sərhədlərinin bağlanmasına qərar verilməmişdən əvvəl martın sonunadək xarici ölkələrdən 15 mindən artıq Azərbaycan vətəndaşı ölkəmizə təxliyyə edilib. Sərhədlər bağlandıqdan sonra isə Azərbaycan dövləti xarici ölkələrdə qalan vətəndaşlarımıza müraciət edərək onlara olduqları ölkədə qalmağı və həmin ölkənin karantin rejiminə riayət etmələrini tövsiyə etməklə yanaşı, vəziyyət düzələn kimi onların ölkəmizə təxliyyə ediləcəklərini bildirib.
Pandemiya ilə əlaqədar olaraq Rusiyada qalan Azərbaycan vətəndaşlarının ölkəmizə təxliyyə edilməsi dövlətin diqqət mərkəzində olan əsas məsələlərdən biridir. Keçən həftə Nazirlər Kabineti yanında Operativ Qərargahdan rəsmən bildirilib ki, aprelin 20-dən sonra Rusiyadakı və Türkiyədəki Azərbaycan vətəndaşlarının təxliyyəsi həyata keçiriləcək.
Bildiyimiz kimi, Azərbaycan vətəndaşlarının xüsusi karantin rejimi müddətində vətənə qayıtmaları ilə bağlı Azərbaycanın Rusiya Federasiyasındakı Səfirliyi və konsulluqlarına daxil olan müraciətləri nəzərə alınaraq www.evegedirem.info saytı yaradılıb. Rusiyanın müxtəlif bölgələrində yaşayan vətəndaşlarımız onlayn vasitəsilə portalda qeydiyyata düşürlər.
Hazırda saytda Rusiyadan 461 Azərbaycan vətəndaşının təxliyyə üçün müraciət etdiyi görünür.
Qeydiyyat beş gün davam edəcək, sonra müvəqqəti olaraq saxlanacaq. Bu vaxt ərzində qeydiyyatdan keçənlərin təhlili aparılacaq, onların təxliyyə planı hazırlanacaq. Bundan sonra qeydiyyat təkrar açılacaq.
Bildiyimiz kimi, Azərbaycan dövləti, ölkəmizin Rusiyadakı Səfirliyi mütəmadi olaraq oradakı vətəndaşlarımızla əlaqə saxlayır və mümkün qədər tezliklə onların vətənə qayıdışını təmin etməyə çalışır. Hazırda Rusiyada Azərbaycan vətəndaşlarının evegedirem.info portalında qeydiyyatdan keçərək vətənə qayıdışlarını reallaşdırmaq üzrə olduqları vaxtda Ermənistan Moskvanın “Domodedov” hava limanında aclıq, səfalət içində qalan vətəndaşlarını yaxın günlərdə təxliyyə etmək niyyətində olmadığını ortaya qoyur.
Ermənistanın Rusiyadakı səfiri Vardan Toqanyan hava limanına toplanan Ermənistan vətəndaşlarını olduqları ərazini tərk edib gecələmək üçün başqa yerlərə, otellərə getməyə çağırıb. Səfirliyin “Facebook” hesabında “Domodedov” aeroportunda ölkəsinə gəlmək istəyən vətəndaşlara səfir bildirib ki, yaxın 4 gün ərzində Moskvadan İrəvana təyyarə reysi nəzərdə tutulmayıb, yəni ermənilər yaxın günlərdə ölkələrinə getməkdən əllərini üzməlidirlər. Səfirlikdən, həmçinin, qeyd edilib ki, siyahıda 262 nəfərin adı var.
Rusiyada qalmış vətəndaşlarını Bakıya gətirmək üçün Azərbaycan dövlətinin davamlı iş apardığını deyən ekspertlər hesab edirlər ki, bu istiqamətdə dövlətimiz ortaya bitkin bir model qoyub. Rusiyadan vətəndaşlarımızın ölkəmizə daşınması üçün dövlətin artıq tədbirlər görməyə başladığını və evegedirem.info portalında vətəndaşların qeydiyyatına başlandığını deyən ekspertlərin fikrincə, bu istiqamətdə Azərbaycanla Ermənistan heç cür müqayisə edilə bilməz. Ekspertlər bildirirlər ki, Ermənistanın hazırda Moskvanın “Domodedov” hava limanında aclıq-səfalət içində olan vətəndaşlarını ölkəyə qaytarmaq üçün heç bir planının olmaması Ermənistanın Rusiyadakı səfirinin “yaxın 4 gün ərzində Moskvadan İrəvana təyyarə reysi planlaşdırılmayıb, buradan dağılın” deyə yaydığı səs yazısından aydın şəkildə görünür deyən ekspertlərin sözlərinə görə, Azərbaycan isə mütamadi olaraq Rusiyadakı vətəndaşlarımızın qeydinə qalıb, onların vətənə qayıdışını mümkün qədər tez reallaşdırmağa çalışıb. Bununla bağlı Azərbaycan Səfirliyinin işlər gördüyünü, səfirlikdə “qaynar xətt”lə paralel olaraq, evegedirem.info portalının da istifadəyə verildiyini əsas gətirən ekspertlər qeyd edirlər ki, karantinə qədər də Azərbaycan dövləti mərhələli şəkildə, xüsusi çarter reysləri ilə vətəndaşlarını ölkəyə təxliyyə etməklə bu məsələdə yeni dəst-xətt ortaya qoydu. Bu gün Azərbaycanın vətəndaşlarını Rusiyadan təxliyyə etməsi prosesi də yeniliklərlə müşayiət olunur.
“...onları Ermənistanda hər hansı bir perspektiv gözləmir”
“Xalq Cəbhəsi” qəzetinin baş redaktoru, tanınmış politoloq Elçin Mirzəbəyli “Bakı-Xəbər”ə bildirdi ki, Ermənistan bütün məsələlərdə olduğu kimi, bu məsələdə də Azərbaycandan çox-çox geridə qalır. “Əslinə qalanda mən nə iqtisadi potensial, nə hərbi güc, nə beynəlxalq nüfüz, nə də digər amillərlə bağlı Azərbaycanla Ermənistanı müqayisə etməyin tərəfdarı deyiləm. Amma region dövlətləri ilə, o cümlədən də Ermənistanla paralellər aparmalı olsaq, Azərbaycanda təkcə öz vətəndaşlarının ölkəyə təxliyyə edilməsi ilə bağlı deyil, bütövlükdə, COVID-19 pandemiyasına qarşı mübarizədə həyata keçirilən tədbirlərin tamamilə fərqli olduğunu görə bilərik. Azərbaycanda prosesə kifayət qədər peşəkar və ardıcıl bir yanaşma var. Ermənistanda isə, bütövlükdə, bütün sahələrdə olduğu kimi, bu prosesin özündə də bir xaos hökm sürür, burada hər hansı bir sistemli idarəetmədən söhbət gedə bilməz. Ermənistan nəinki Rusiyada yaşayan vətəndaşlarını ölkəyə gətirməkdə maraqlı deyil, hətta bunu, faktiki olaraq, heç arzulamır. Çünki buna hazır deyil. Eyni zamanda, təkcə Rusiyadan deyil, digər ölkələrdən də Ermənistan vətəndaşlarının təxliyyə edilməsi ilə bağlı proseslər də indiyə qədər hər hansı bir formada həyata keçirilməyib. Hansı vətəndaşlar öz imkanları çərçivəsində geriyə qayıdıblar. Amma Ermənistan dövləti öz hesabına indiyədək vətəndaşlarını təxliyyə etməyib”.
E.Mirzəbəyli qeyd etdi ki, hazırda, faktiki olaraq, dünyanın hər yerində koronavirus pandemiyası hökm sürür və bu virusa qarşı mübarizə metodları dövlətlərin potensialının və idarəçilik sisteminin nə qədər çevik olduğuna görə də fərqlənir. “Qənaətimə görə, Azərbaycan Rusiyadakı vətəndaşlarımızın ölkəmizə təxliyyə edilməsi, gətirilməsi məsələsində də kifayət qədər peşəkar və ardıcıl formada hərəkət edir. Ölkəmizə gəlmək istəyən vətəndaşlarımız üçün müvafiq qaydada imkanlar yaradılır və həmin şəxslər ölkəyə gələcəklər və onların yerləşdirilməsi üçün də müfaviq ərazilər ayrılacaq. Bildiyimiz kimi, onlar müəyyən müddətdə karantində qalmalıdırlar. Bu istiqamətdə də ortada Azərbaycan dövlətinin planlı şəkildə hərəkəti var. Amma Ermənistanda bu imkanlar da yoxdur. Bu ölkədə insanlar onsuz da koronavirus oldu-olmadı, Ermənistandan qaçmağa can atırlarsa, onlar bu ölkəyə niyə qayıtsınlar ki? Çünki onları Ermənistanda hər hansı bir perspektiv gözləmir” - deyə E.Mirzəbəyli qeyd etdi.
İradə SARIYEVA
