Son günlərdə Ermənistanda hakimiyyətlə kilsə qarşıdurmasının daha geniş vüsət alması müşahidə olunur. Belə görünür ki, kilsənin də timsalında Paşinyan iqtidarına qarşı yeni bir müxalifət yaranır. Buna əsas səbəb Paşinyanın kilsə rəhbərliyini fəyişdirmək fikrindən vaz keçməməsi, sonuncunun isə “Qarabağ klanı” ilə yaxınlığıdır. Hələ ötən ildən baş nazir Nikol Paşinyan bəyan edir ki, Ermənistan xalqı hökumətin Ümumerməni Kilsəsinin daxili işlərinə qarışmağı tələb edərsə, hakimiyyət təcili olaraq bunu müzakirəyə çıxarıb uyğun addımlar atacaq. Onun sözlərinə görə, Ermənistan hökumətinin liberal siyasətini bəzi siyasi qüvvələr bəzən səhv olaraq zəiflik kimi dəyərləndirir:
“Bu hal artıq bəzi ruhani dairələrdə də müşahidə edilməkdədir. Bizim kilsənin daxili işlərinə müdaxilə etməyəcəyimiz barədə dediklərimizi “kilsədəkilər” zəiflik kimi qiymətləndirirlər. Onlar çox sərt əks-zərbə alıb birbaşa və dolayı olaraq diz çökəcəklər”. Digər tərəfdən, yuxarıda qeyd olunduğu kimi, Paşinyan kilsə rəhbərliyinin dəyişməsində də maraqlı olduğunu gizlətmir. Bu hal Ermənistan katolikosu II Qareginin sabiq prezident Robert Köçəryana azadlıq tələb etməsindən sonra yenidən aktuallaşıb. Xatırladaq ki, bu günlərdə Qaregin erməni mediasına açıqlamasında Robert Köçəryan barəsində həbs qətimkan tədbirinin dəyişdirilməsinin zəruriliyini bildirib:“Ermənistanın ikinci prezidenti Robert Köçəryana gəldikdə, həkimlərin prezidentin sağlamlığı ilə bağlı peşəkar fikirlərinə toxunaraq, ədalət mühakiməsinin həyata keçirilməsi ilə yanaşı bütün qabaqlayıcı üsul və tədbirlərin görülməsini, o cümlədən vəziyyətin daha da gərginləşməməsi üçün ehtiyat tədbirinin dəyişdirilməsini vacib sayırıq”. Katolikosun bu açıqlaması Ermənistan hakimiyyətinin xoşuna gəlmədi və gözlənildiyi kimi, Paşinyan komandası informasiya hücumu təşkil etdi. Müxtəlif hökumət rəsmiləri katolikosları qınayan açıqlamalar verdi. Ermənistan parlamentinin vitse-spikeri Alen Simonyan hətta bildirdi ki, minlərlə Ermənistan vətəndaşı artıq çoxdan katolikosun dəyişdirilməsini tələb edir:“Mən deyərdim ki, Ermənistanın minlərlə vətəndaşı artıq çoxdan katolikosun dəyişdirilməsini tələb edir. Düşünürəm ki, Qaregin illərlə səssiz qalıb, bu gün isə pulu bol olan Köçəryanın ilkin həbsinin dəyişdirilməsinin zəmanətçisi kimi çıxış etmək qərarına gəlib”.
Ancaq Paşinyan və komandası bununla kifayətlənməyərək, kilsə rəhbərliyini dəyişdirmək planlarını yenidən işə salıb. Artıq Paşinyanın ailəsinə aid “Aykakan Jamanak” belə bir yazı ilə çıxış edib ki, Paşinyan Köçəryanın azadlığını tələb edənləri bağışlamayacaq. Bu xüsusda Paşinyan hüquq-mühafizə orqanlarının rəhbərlərini yanına dəvət edərək, kilsə rahiblərini cinayətə cəlb etmək üçün hər cür səy göstərmələrini tapşırıb. Bundan başqa, hakimiyyət nəzarəti altında olan media vasitələrinə ləkələyici faktlar əsasında kilsəyə qarşı hücuma keçmək tapşırığı verilib. Artıq Milli Təhlükəsizlik Xidmətinin İstintaq departamenti kilsə yeparxiyasından birinin rəhbərinə qarşı ittiham irəli sürüb. Söhbət Ararat Patriarxal Yeparxiyasının lideri Navasard Kçoyandan gedir.
Məlumdur ki, Ermənistanın sabiq prezidenti Serj Sarkisyan Afrikanın illərdir qanlı vətəndaş müharibəsi içərisində olan ölkəsi Sierra-Leonada almaz biznesi qurub. Burada onun əsas tərəfdarlarından biri məhz kilsədir. Hər şey almaz biznesi ilə məşğul olan iş adamı Paylak Ayrapetyanın ona məxsus olan əmlakın və vəsaitin Kiprdə qeydiyyatda olan “Wlispera Holdings Limited” offşor şirkəti tərəfindən mənimsənilməsi barəsində açıqlamasından sonra ortaya çıxıb. Kiprin rəsmi dövlət qeydiyyat sənədlərinin təqdim olunmasından sonra aydın olub ki, “Wlispera Holdings Limited” offşor şirkətinin səhmdarlarından biri məhz Navasard Kçoyandır. Paşinyan bu prosesin qanundankənar olmasını əsas gətirərək Navasard Kçoyanı sıradan çıxarıb. Bununla kilsə rəhbərliyinə əsaslı zərbə vurmağa hazırlaşır. Paşinyan, eyni zamanda, kilsə daxilində inqilaba səbəb ola biləcək katoliklər arasında cinayət işləri və qalmaqallı media xəbərləri ilə Qareginə qarşı narazılığı artırmağı hədəfləyir. Bu fonda erməni mətbuatında Paşinyanın yüksək vəzifəli ruhanilərə qarşı materiallar toplamağı və kilsə sahəsində də inqilaba nail olmağı əmr etdiyi barədə davamlı söhbətlər açılır. “Politik.am” nəşri yazır ki, Ermənistan hökuməti qarşısına kilsə ilə aparılacaq belə bir siyasəti qoyubsa, bu olduqca ibtidai və işləməyən bir tezisdir:“Əslində, hökumətin hədəf aldığı qurumun rolundan və əhəmiyyətindən bir an ayrılsaq, hakimiyyətin təsadüfən qorxularını dilə gətirdiyinin şahidi olarıq. Demək olar ki, Köçəryanı azadlıqda görmək Paşinyan administrasiyasının ən böyük qorxusudur və hakimiyyəti hərəkətlərinə nəzarətetmə ampluasından çıxara biləcək gücə malikdir. II Qaregin şəxsiyyətinə müsbət və ya mənfi münasibətindən, dini etiqadından asılı olmayaraq, Paşinyanın sırf siyasi cəhətdən ən böyük qorxusu, daha doğrusu, hazırkı baş nazirin ən çox nədən qorxduğu amil ortaya çıxdı”.
İndiki durumda kilsə də Paşinyanın hakimiyyətini tam qəbul etmir. Kilsə bəyan edib ki, “Eçmiədzin”in dəstəyi olmadan heç bir hakimiyyət qala bilməz. Paşinyan da bunu özünə qarşı çağırış kimi qəbul edir. Digər tərəfdən məlumdur ki, Qaregin köhnə iqtidara yaxınlığı ilə seçilir. Paşinyan da kilsənin rəhbərliyində özünə loyal olan insanların yer almasını istəyir. Bu isə onlar arasında ziddiyyəti daha da dərinləşdirir.
Nahid SALAYEV
