28/09/2020 13:38
728 x 90

Bakı Dövlət Sirkinin başında yenə “qara buludlar”...

Mahir Hümbətov: “...bina uzun illərdir əsaslı təmir olunmadan fəaliyyət göstərib”

img

Tamaşaçıların daim maraq göstərdiyi Bakı Dövlət Sirkində təhlükəsizliyin qorunması əsas məsələlərdən biri kimi rəsmi qurumların diqqət mərkəzində olmalıdır. Qeyd edək ki, artıq bir neçə ildir Bakı Dövlət Sirkinin hazırda yerləşdiyi binadan köçürülməsi, yeni bina ilə təmin olunması aktualdır.

1967-ci ildə istismara verilən sirkin binası indiyə qədər əsaslı təmir edilməyib. Bildiyimiz kimi, Fövqəladə Hallar Nazirliyi tərəfindən Bakı Dövlət Sirki ilə bağlı müəyyən haqlı iradlar bildirilib. İradlar əsasən sirk binasında təhlükəsizlik problemləri ilə bağlı olub.

Bakı Dövlət Sirki mütəmadi olaraq rəngarəng proqramlarla tamaşaçılar qarşısına çıxır və zəngin repertuarla onları sevindirir. Fövqəladə Hallar Nazirliyinin məlum iradı sirkin təhlükəsizliyi ilə bağlı ictimaiyyətdə müəyyən narahatlıqlar yaradıb. Hətta müəyyən fikirlərə görə, Bakı Dövlət Sirki bağlanacaq.

Yeri gəlmişkən, bu günlərdə Mədəniyyət naziri Əbülfəs Qarayev də mətbuata bildirib ki, Fövqəladə Hallar Nazirliyi tərəfindən Bakı Dövlət Sirki ilə bağlı müəyyən haqlı iradlar irəli sürülüb və bu iradların aradan qaldırılması üçün işlər görülür. Nazir, həmçinin, deyib ki, o, Bakı Dövlət Sirkinin bağlanmasını istəmir: “Çünki şəhərdə mütləq belə bir müəssisə olmalıdır. Sirk 40 ilə yaxındır ki, əsaslı təmir olunmadan fəaliyyət göstərir. Hesab edirəm ki, müvəqqəti olsa da, təhlükəsizliklə bağlı olan ölçüləri götürməliyik. Artıq bunların yarısını etmişik. Ümidvaram ki, bu mövsümdə sirk öz işini davam etdirə bilər. Amma bu məsələyə gələcəkdə mütləq baxılmalıdır”.

  • Kiçik texniki problemlər mövcud olsa da, bu, Bakı Dövlət Sirkinin fəaliyyətinə mane olacaq səviyyədə deyil”

Bakı Dövlət Sirkinin mətbuat katibi Mahir Hümbətov da “Bakı-Xəbər”ə bildirdi ki, nazirlik tərəfindən sirkdə bir sıra təhlükəsizlik tədbirləri görülüb və sirkin binasında müəyyən təmir işləri həyata keçirilib. Sirkdə təhlükəsizliklə bağlı hazırda narahatlığın olmadığını deyən M.Hümbətovun sözlərinə görə, Fövqəladə Hallar Nazirliyinin təhlükəsizliklə bağlı irəli sürdüyü tələblərin yerinə yetirilməsi istiqamətində də işlər görülüb: “Cənab nazirin qeyd etdiyi kimi, sirkdə təhlükəsizliklə bağlı xeyli iş görülüb. Bilirsiniz ki, binada texniki baxımdan müəyyən problemlər var və bina uzun illərdir əsaslı təmir olunmadan fəaliyyət göstərib. Burada kiçik texniki problemlər mövcud olsa da, bu, Bakı Dövlət Sirkinin fəaliyyətinə mane olacaq səviyyədə deyil. Biz truppaları dəvət edirik və normal şəkildə proqramlarımızı davam etdiririk. Təbii ki, sirkin vəziyyəti müasir tələblər səviyyəsində deyil. Söhbət bundan gedir. Burada müəyyən təmir işləri aparılıb, yanğından mühafizə sistemi yenidən qurulub. Yəni sirkdə FHN-in təhlükəsizliklə bağlı təlimatlarının böyük əksəriyyəti Mədəniyyət Nazirliyi tərəfindən həyata keçirilib. Bakı Dövlət Sirkinin gələcək fəaliyyəti artıq dövlətin nəzarətinə götürülüb”.

Sirkin köçürülməsinə gəlincə, M.Hümbətov bildirdi ki, bu barədə hələ dəqiq fikir bildirmək mümkün deyil. O vurğuladı ki, sirkin öz binasından köçürülməsi üçün ona yeni bina tikilməlidir. “Bir neçə ay əvvəl cənab nazir bildirmişdi ki, Bakı Dövlət Sirkinin yeni binaya ehtiyacı var, onun üçün müasir standartlara cavab verən yeni bina tikilməlidir. Sirkin köçürülməsi yalnız ona yeni bina tikildikdən sonra reallaşa bilər. Bu məsələ dövlətin nəzarətindədir” - deyə M.Hümbətov bildirdi.

İradə SARIYEVA

Son xəbərlər