Deputatlıq mandatı əldə etməyə yalnız siyasət adamları, iqtisadçılar, tanınmış ictimai-siyasi xadimlər, mütəxəssislər deyil, siyasətlə heç bir əlaqəsi olmayan şou-biznesçilər, müğənnilər, sənətçilər də can atırlar. Biz zaman-zaman bu halın şahidi olmuşuq. Bir sıra şou müğənniləri mandat əldə etmək üçün keçən parlament seçkilərinə qatılıblar, lakin onlar, demək olar ki, heç bir seçici səsi toplaya bilməyərək deputatlıq kürsüsünə həsrət qalıblar.
Bir neçə gün əvvəl Yeni Azərbaycan Partiyasının Siyasi Şurasının ölkə parlamentinin buraxılması ilə bağlı qərar qəbul etməsi yenidən şou-biznesçiləri aktivləşməyə vadar edib. Ölkədə parlamentin buraxılması prosesi reallaşmamış, artıq bir sıra şou-biznesçilər, bəzi erotika “qəhrəmanları” millət vəkili olmaq iddialarını ortaya qoyublar. Onlar arasında indidən qanunsuz təbliğata başlayanlar da var. Bu gün elə şou-biznesçilər deputat olmaq istəyilə çıxış edir ki, adam təəccüblənir. Parlament şou-biznes məkanı deyil, bura kifayət qədər ciddi, mötəbər, ölkənin həyatında mühüm rol oynayan, taleyüklü məsələlərin müzakirə və həll edildiyi bir təsisatdır. Millət vəkilliyi isə şou göstərmək deyil, bu iş ciddi analitik təfəkkür, savad, geniş siyasi bilik, təcrübə tələb edən bir sahədir.
Qiymət Məhərrəmli: “Şou adamları deputat toxunulmazlığı əldə etmək və sonra isə mandatın verdiyi səlahiyyətlərdən...”
Filologiya üzrə fəlsəfə doktoru, tanınmış tədqiqatçı-alim Qiymət Məhərrəmli “Bakı-Xəbər”ə bildirdi ki, şou-biznesçilərin deputatlığa kütləvi maraq göstərməsi böyük faciədir. Öz sahəsində heç bir iş görməyən bəzi şou-biznesçilərin millət vəkili olmaq istəyinin kökündə onların hüquqi toxunulmazlıq əldə etmək istəməsi dayanır. “Parlamentin tərkibi kifayət qədər bilikli, savadlı, siyasətdən, iqtisadiyyatdan, beynəlxalq aləmdən xəbəri olan, geniş təfəkkürə, siyasi-hüqiqi, iqtisadi biliyə sahib olan insanlardan təşkil olunmalıdır. Millət vəkili olmaq insandan böyük məsuliyyət tələb edir. Ümumiyyətlə, sənət adamlarının, xüsusən də şou-biznesçilərin parlamentə can atması, deputatlıq mandatı əldə etmək iddiasında olması təsadüfi deyil. Şou adamları deputat toxunulmazlığı əldə etmək və sonra isə mandatın verdiyi səlahiyyətlərdən geniş surətdə sui-istifadə etmək istəyirlər. Şou-biznesçilər xalqa canları yandığı üçün millət vəkili olmaq istəmirlər. Onlar bu mandatı öz həmkarlarına zərbə vurmaq üçün əldə edirlər. Elə adamlar millət vəkili olmağa iddia edir ki, adam məəttəl qalır. Bu adamların nə səsi, nə istedadı, nə də savadı var. Sabah onların hansısa biri deputat seçilərsə, ölkəni necə təmsil edə bilər? Deputat savadlı olmalıdır, bizim şou-biznesçilər arasında isə iki-üç nəfər savadlı adam var, qalan hamısı savadsızdır”.
Q.Məhərrəmli bildirdi ki, bu gün parlamentdə olan deputatların xeyli qisminin səsini seçiciləri eşitməyib. Onların parlamentin “ölü canlar”ı olduğunu deyən Q.Məhərrəmli hesab edir ki, şou müğənniləri də millət vəkili seçilərsə, ağızlarına su alanlardan olacaqlar. “Siz özünüz də yaxşı bilirsiniz ki, sənət adamlarının çoxu parlamendə heç bir iş görməyib. Sadəcə, orada özlərini göstəriblər. Sənətin, mədəniyyətin, ədəbiyyatın kifayət qədər problemi var ki, onların birini də səsləndirməyiblər” - deyə Q.Məhərrəmli bildirdi.
Ənvər Çingizoğlu: “Şou müğənniləri, şoumenlər deputat olmaq iddiasına düşməklə özlərini gülünc vəziyyətə salır, lağ obyektinə çevirirlər”
Tanınmış etnoqraf-alim Ənvər Çingizoğlu da hesab edir ki, şou-biznesçilərin parlament seçkilərində iştiraka can atmasının səbəbləri onların öz şəxsi mənafeyilə bağldıır. “Xalq onsuz da şou-biznesçiləri sevmir, heç şou-biznesçilər də xalqı sevmir. Bu adamlar həmişə öz məqsədlərini həyata keçirmək üçün vəziyyətdən istifadə ediblər. Şou müğənnilərinin deputat olmaq istəyinin kökündə onların mandat əldə etməsi dayanır. Amma hesab edirəm ki, savadı, siyasi təfəkkürü olmayan şou-biznesçilər, şoumenlər Milli Məclis üzvlüyünə seçilə bilməz. Şou müğənniləri, şoumenlər deputat olmaq iddiasına düşməklə özlərini gülünc vəziyyətə salır, lağ obyektinə çevirirlər. Şou-biznesçilərin parlament seçkilərinə qatılması pis haldır, parlament onlar üçün deyil” - deyə Ə.Çingizoğlu bildirdi.
İradə SARIYEVA
