Sənət adamları Qarabağ şəhidlərinin övladlarının xeyir işinə “qiymət oxuyur”...

Bəzi sənət adamları onlara bəslənən ictimai sevgi və hörmətdən sui-istifadə etməyi həyat tərzinə çeviriblər. Bədii qiraət sahəsində, eləcə də muğam ifaçılığında öz yeri olan müəyyən sənət adamları var ki, onlar xalqı ancaq dildə sevir, əməldə isə xalqı, xalqın təmsilçilərini yada belə salmaq istəmirlər.

Bu yaxınlarda bir neçə şəhid ailəsi ilə söhbətdə qəribə halla rastlaşdıq. Şəhid ailələri öz övladlarının toyunda, məclisində iştirak etmələri üçün bir neçə xalq və əməkdar artistə müraciət ediblər. Təbii ki, onların məclisdə iştirak etməsi üçün şəhid ailələri qulplarından çıxan qədər sənətçilərə hörmət etməyi də düşünüblər. Şəhid analarından birinin arzusu olub ki, məclisdə hər kəsin tanıdığı bədii qiraətçi və xanəndə iştirak etsin. Onlar bununla bağlı həmin sənətçilərə müraciət etdikdə xanəndə 6-7 min manat, bədii qiraətçi isə 1500-2000 min manat pul istəyib, deyiblər ki, bu pul ödənəcəyi təqdirdə məclisə gələ bilərlər. Şəhid ata-anasına belə münasibət göstərən sənətçilərin adlarını etika naminə qeyd etmək istəmirik, amma təəssüf ki, pulu şəhid qanından, şəhid anasının gözüyaşlı arzusundan üstün tutanlar az deyil. Halbuki, həmin sənətçilər şəhid analarının xatirinə o məclislərdə təmənnasız da iştirak edə bilərdilər. Amma pul qazanmaq ehtirası hər şeydən güclü olduğu üçün, onlar öz bazar qiymətlərini şəhid ailələrinə də deməkdən çəkinmirlər. Məsələ burasındadır ki, şəhid ata və analarına çox zaman bəzi xalq və əməkdar artistlərin sayğısızlığının şahidi olmuşuq.

Ziyalılar belə sənətçilərin xalqın adından sui-istifadə etdiyini qeyd edirlər.

• “Şəhid övladının, nəvəsinin toyuna, məclisinə pulla getməyin özü ayıbdır”

Ədəbiyyatşünas-alim Leyla Məmmədəliyeva bizimlə söhbətində bildirdi ki, şəhid ata və anasının dəvətinə pul müqabilində “hə” deyən sənətçilər çoxdur. Bəzilərinin son zamanlar şəhidlər, ata-ana haqqında mahnılar, şeirlər əzbərləyib məclislərdə ifa etdiyini və buna görə də külli miqdarda pul qazandığını deyən L.Məmmədəliyevanın sözlərinə görə, hətta bədii qiraətçilər var ki, ona hansısa şair kitab verdikdə belə həmin kitabı vərəqləyib arasında pul olub-olmadığını yoxlayır. “Bizim bəzi xalq və əməkdar artistlər var ki, onlar həddindən artıq pulgirdirlər və hətta öz yaxınlarının məclislərinə belə, təmənnasız getmirlər. Şəhidlər Azərbaycan xalqının qürur yeridir və hər bir insan şəhidlərin ruhuna, onların ata-anasına hörmət, sayğı, sevgi bəsləməlidir. Mən özüm də dəfələrlə şahidi olmuşam ki, şəhid ailələrində düzənlənən məclislər zamanı şəhid anası deyir ki, filan müğənni toyda, məclisdə iştirak etsə, ürəyimdən olardı. Ananın arzusu ilə həmin sənətçilərlə əlaqə yaradılır, vəziyyət onlara izah edilir və sənətçilərin də bir çoxu “mən məclisə filan qiymətə gedirəm, həmin məbləği verirsinizsə gəlirəm, vermirsinizsə vaxtımı almayın” deyirlər.

Bu yaxınlarda əməkdar artistlərdən biri, özü də tanınmış bədii qiraətçidir, şəhid atasından onların məclisində iştirak etmək üçün 1500 manat pul istəyib, deyib ki, qiymətim budur, iki-üç şeir deyəcəyəm və sizdən bu pulu alacağam. Şəhid atası ondan xahiş edib ki, həyat yoldaşım sizi məclisdə görmək istəyir, sizin ana haqqında dediyiniz şeir onun çox xoşuna gəlir, heç olmasa gəlin o şeiri deyin, imkan daxilində hörmətinizi edəcəyik. Həmin bədii qiraətçi bundan imtina edib. Belə hallar çoxdur. Vətən torpağının düşməndən müdafiəsi uğrunda canından keçən şəhidlərin ata-analarına bu cür münasibət göstərmək bir sənət adamına, xalq və əməkdar artistə yaraşmaz. Xalq və əməkdar artistlərin şəhid ailələrinin məclisində bir-iki mahnı, şeir ifa etmək üçün şəhid ata-anasından külli məbləğdə pul tələb etməsi, onlara konkret qiymət deməsi vicdansızlıqdır. Məncə, elə adamlar nə xalqın adından danışa bilər, nə də şəhidin xatirəsini əziz tutduğunu deyə bilər. Onların buna mənəvi haqqı yoxdur. Şəhid övladının, nəvəsinin toyuna, məclisinə pulla getməyin özü ayıbdır” - deyə alim bildirdi.

İradə SARIYEVA