Bədii filmlərin baxımlı və diqqətçəkən olmasında onların musiqi tərtibatının da böyük rolu var. Azərbaycan və dünya kinosunun elə örnəkləri var ki, biz o filmləri həm də musiqisinə görə sevirik. Ölkəmizdə kino musiqisi sahəsində böyük təcrübə olduğunu hər birimiz bilirik, lakin bunu son illər çəkilən filmlərdə görə bilmirik. Müasir Azərbaycan filmlərinin musiqi tərtibatının aşağı səviyyədə olması məsələsini mütəxəssislər dəfələrlə gündəmə gətirsə də, bu filmləri çəkən adamlar bunu paxıllıq, qısqanclıq və görülən işlərə kölgə salınması kimi qiymətləndirib.
Onu da vurğulayaq ki, müasir filmlərin bəzilərində xalq musiqisindən, eləcə də filmə aidiyyatı olmayan hazır musiqi nümunələrindən, hətta xarici bəstəkarların əsərlərindən də istifadə edilir. Azərbaycanda kino musiqisinə kifayət qədər bələd olan bəstəkarların olmasına baxmayaraq, onlara filmlərə musiqi yazmaq barədə sifarişlər verilmir.
Azərbaycanın müasir kino musiqisinin bərbad vəziyyətdə olduğunu mədəniyyət naziri Əbülfəs Qarayev də dilə gətirib. Azərbaycan Bəstəkarlar İttifaqının X qurultayında çıxış edən mədəniyyət naziri Əbülfəs Qarayev “Son illər filmlərimizdə qorxunc, heç bir ümid verməyən fon musiqiləri səslənir, niyə bəstəkarlarımız bununla məşğul olmurlar?” - deyə bildirən nazir bəstəkarlara səslənərək bu problemin aradan qaldırılmasında iştirak etməyə çağırıb: “Düzdür, biznes mühiti tamam başqa məsələlər diqtə edir, ancaq biz dövlət olaraq yaradıcı ittifaqlara dəstək veririk. Azərbaycan bəstəkarları bununla niyə məşğul olmurlar? Əgər belə getsə, filmlərimizdə, seriallarda texniki musiqidən başqa bir musiqi görməyəcəyik. Ona görə mən bəstəkarlarımızı bu məsələlərdə həssas olmağa çağırıram. Gəlin, bu barədə məsələ qaldıraq, bu kimi problemlər həll olunsun”.
Nazirin irəli sürdüyü fikrin tamamilə həqiqəti əks etdirdiyini deyən musiqişünas, pedaqoq, Azərbaycan Bəstəkarlar İttifaqının katibi, Bakı Musiqi Akademiyasının professoru Zemfira Qafarova baki-xeber.com-a bildirdi ki, çox zaman müasir kino musiqsini təsadüfi adamlar yazır. “Bu sahədə həqiqətən də ciddi problemlər mövcuddur. Müasir filmlər üçün musiqini əsasən bəstəkarlıq savadı, təcrübəsi olmayan təsadüfi adamlar yazır. Bilirsiz ki, bu gün bir şeir yazan adam özünü “şair”, bir mahnı yazan isə “bəstəkar” hesab edir. Hazırda bu istiqamətdə ciddi problemlər var. Fikrimcə, bunun səbəbi həmin filmlərin istehsalına rəhbərlik edənlərlə, eləcə də quruluşçu rejissorlarla bağlıdır. Onlar bu məsələdə xüsusilə diqqətli olmalıdırlar. Yəqin ki, onların zövqləri elə yüksək səviyyədə deyil, bu səbəbdən də kimə gəldi kino musiqisi yazmağı həvalə edirlər. Vəziyyət belədir. Müasir film istehsalı ilə məşğul olanlar daha samballı, daha səviyyəli bəstəkarlara müraciət etsələr bu sahədəki mövcud nöqsanlar təkrarlanmaz. Bizim yaxşı bəstəkarlarımız var ki, onlar kino musiqisinə böyük töhfələr verə bilərlər. Azər Dadaşov, Sərdar Fərəcov, Cəlal Abasov, Firəngiz Əlizadə, Elnarə Dadaşova və başqaları çox gözəl kino musiqisi yazmaq əzmindədirlər. Azərbaycan bəstəkarlıq məktəbi ölməyib, bu gün də yaşayır, bu məktəbin çox istedadlı təmsilçiləri var”.
Z.Qafarova qeyd etdi Azərbaycan bəstəkarlarının X qurultayı çərçivəsində bir sıra konsertlər keçirilib və həmin konsertlərdə səsləndirilən musiqilər bir daha Azərbaycan bəstəkarlarının gücünü, qüdrətini təsdiqlədi. “Düzdür, Üzeyir Hacıbəyov, Qara Qarayev, Fikrət Əmirov yoxdur, amma onların irsi yaşayır, davamçıları var. Peşəkar Azərbaycan bəstəkarlarının kinoda iştirak etməməsi qarşı tərəfin onlara sifariş verməməsi ilə bağldır. Təəssüf ki, kiminlə dostluq edirsə onu da kino musiqisi yazmağa cəlb edir. Amma belə olmamalıdır. Mən gunahı yalnız musiqi savadı olmayanları kinoya cəlb edirlərdə görürəm və bu da nəticə etibarı ilə Azərbaycan filmlərinin musiqi tərtibatının bu cür bərbad olmasına səbəb olur. Nazir tamamilə doğru deyib, bu sahədə ciddi problemlər var. Bu işi görənlər, kinorejissorlar, şirkət rəhbərləri bu məsələyə ciddi yanaşsalar yaxşı olar” - deyə Z.Qafarova bildirdi.
İradə SARIYEVA
