Bakıda qatardan qaçan məhkum, “Qoca” ləqəbli Etibar Məmmədovun tutulması istiqamətində noyabrın 2-nə keçən gecə xüsusi əməliyyat keçirilib.
APA-nın xəbərinə görə, hüquq-mühafizə orqanlarının əməkdaşları onun Qaradağ rayonu ərazisində gizləndiyi yeri müəyyənləşdirib. Həmin ünvanda keçirilən əməliyyat zamanı E. Məmmədov və yanındakı şəxslər hüquq-mühafizə orqanı əməkdaşlarına silahlı müqavimət göstərib. Nəticədə E. Məmmədov zərərsizləşdirilib.
Baş Prokurorluğun mətbuat xidməti E. Məmmədovun öldürülməsi faktını təsdiqləyib. Hüquq-mühafizə orqanlarından verilən məlumata görə, atışmada polisə silahlı müqavimət göstərən Etibar Məmmədov və İlqar Əlihümbət oğlu Əzimov məhv edilib, daha bir nəfər – Anar Əsgərov yaralanıb.
1 saylı Kliniki Tibbi Mərkəzin baş həkimi Ədalət Dadaşov APA-ya açıqlamasında Anar Əsgərovun vəziyyətinin qənaətbəxş olduğunu qeyd edib. O bildirib ki, 1988-ci il təvəllüdlü A. Əsgərovun həyatı üçün həyati təhlükə yoxdur: “Güllə onun çiyin sümüyündən girib dirsəyə qədər irəliləyib. Hazırda güllə çıxarılmayıb. Qolunun sümüyü sınıb. Lazımı tibbi müdaxilədən sonra onu ifadə verməsi üçün istintaqa aparacaqlar”.
Xatırladaq ki, oktyabrın 23-də Bakı- Astara - Bakı planlı dəmir yolu qarovulu ilə xüsusi təyinatlı vaqonda Bakı şəhərinə müşayiət olunan 1980-ci il təvəllüdlü, əvvəllər məhkum edilmiş, hazırda Cinayət Məcəlləsinin (CM) müxtəlif maddələri ilə təqsirləndirilən Etibar Ələkbər oğlu Məmmədov və 1989-cu il təvəllüdlü, əvvəllər məhkum olunmamış, CM-nin müxtəlif maddələri ilə təqsirləndirilən Əli Rasim oğlu Ağami müşayiət altından qaçıb.
Qaçan məhbuslardan Əli Ağami bir neçə gün sonra Şirvan şəhərində tutulub. Bir neçə gün əvvəl məhkumların qaçmasına yardım etməkdə təqsirləndirilən 3 nəfər saxlanıb. Onlar Hacıyev Məhəmməd Famil oğlu, Günay Atakişiyeva və müğənni Fədayə Laçındır. Həmin şəxslər barəsində həbs qətimkan tədbiri seçilib.
Bundan başqa, baş verənlərlə bağlı Pentensiar Xidmətin bir neçə əməkdaşı həbs olunub və işdən azad edilib.
