Amal Həsənli: “ ... hər bir ailədə sevinc hisslərinin yaranmasına səbəb oldu”
Bir neçə ildir cəmiyyətimizdə ən aktual olan məsələ problemli kreditlərlə bağlı idi. Məlum olduğu kimi, Prezident İlham Əliyevin imzaladığı fərmanla problemli kreditlərlə bağlı çətinliklərə son qoyulub. Əhalini ciddi narahat edən bu problemin dövlət başçısı tərəfindən həll edilməsi əhalinin bu sahədə ümidlərinin dirçəlməsinə səbəb olub.
Məlum olduğu kimi, vətəndaşların heç də hamısı banklardan öz adına kredit götürməyib. Xeyli sayda adam öz yaxın qohumları olan təqaüdçülərin, müharibə veteranlarının, əlillərin adlarına kredit götürüb. Bu da o insanların müxtəlif problemlər yaşamasına səbəb olub. Prezidentin problemli kreditlərlə bağlı məsələnin həll edilməsi məqsədilə imzaladığı fərmanın belə şəxslər üçün nə kimi əhəmiyyəti olacaq?
İqtisadiyyat üzrə fəlsəfə doktoru Amal Həsənli “Bakı-Xəbər”ə bildirdi ki, bütövlükdə, Prezident tərəfindən belə bir fərmanın imzalanması cəmiyyətin sosial həyatında mühüm əhəmiyyət kəsb edir. Bu fərmandan, bir sıra vətəndaşlar kimi, müharibə veteranları, əlillər də bəhrələnə biləcəklər. O hesab edir ki, fərmanın bu qəbildən olan insanlar üçün həm iqtisadi, həm sosial, həm də mənəvi tərəfləri var. Alimin sözlərinə görə, yaxın qohumlarının ucbatından problemli kredit böhranına düşən əlillər, müharibə veteranları və təqaüdçülər də bu sahədəki problemlərini həll edə biləcəklər. “Cənab Prezident İlham Əliyevin problemli kreditlərlə bağlı son fərmanı Azərbaycanda hər bir ailədə sevinc hisslərinin yaranmasına səbəb oldu. Dünyada baş verən qlobal problemlər, dünyada yaşanan iqtisadi böhranlar dövründə dövlət başçımızın bu fərmanı göstərir ki, ölkəmiz iqtisadi cəhətdən güclüdür. Bu fərman 800 minə yaxın əhalini əhatə edəcək ki, bunlar içərisində xüsusilə də qaçqınlara, əlillərə, müharibə veteranlarına da şamil olunacaq. Eyni zamanda, Azərbaycanda əhalinin banklara münasibətinin müsbət mənada dəyişməsinə də şərait yaradacaq.
Prezidentin fərmanının öz yaxınları, qohumlarına kredit götürən müharibə veteranları, əlillər, təqaüdçülər və bu qəbildən olan digər təbəqə üzvləri üçün əhəmiyyəti böyükdür. Bu fərman onları da əhatə edəcək və üzləşdikləri problem aradan qalxacaq. Məlumdur ki, Azərbaycanda qaçqınların, əlillərin, müharibə veteranlarının həyat səviyyəsinin yüksəldilməsi üçün müsbət addımlar atılır”.
O vurğuladı ki, bu fərman həm də əngəlsiz kredit sisteminin formalaşmasına imkan verəcək. Məlum olduğu kimi, bəzi banklar qaçqınlara, əlillərə, müharibə veteranlarına kredit verilən zaman bürokratik əngəl yaradırdı. “Cənab Prezident bu fərmanı ilə bütün bürokratik əngəllərin aradan qaldırılmasına təkan verdi. Burada həm qaçqınlar, əlillər, müharibə veteranları daha az faizlə kreditlər götürə biləcəklər, həm də qohumlarının onlar üçün yaratdığı problemlər aradan qaldırılacaq. Prezidentin bu mühüm fərmanından sonra ölkəmizin hər bir evində bir daha problemli kreditlə bağlı qayğılar olmayacaq” - deyə A.Həsənli qeyd etdi.
İradə SARIYEVA
