Rüfət Quliyev: “Güzəştlər həm dollar, həm də manatla götürülən kreditlərə aiddir” Pərviz Heydərov: “Fərmanın ikinci hissəsində manatla götürülən kreditlərə güzəştin tətbiq olunması ilə bağlı qeyd edilir ki, bunun üçün dövlət tərəfindən Mərkəzi Banka vəsait ayrılacaq”
Məlum olduğu kimi, Prezident İlham Əliyev fevralın 28-də Azərbaycanda fiziki şəxslərin problemli kreditlərinin həlli ilə bağlı əlavə tədbirlər haqqında Fərman imzalayıb. Azərbaycanda əhalinin rifahını yüksəltmək, sosial müdafiəsini və layiqli həyat səviyyəsini təmin etmək dövlətin sosial-iqtisadi inkişaf konsepsiyasının prioritetlərindəndir.
Dövlət başçısı dünya bazarında neftin qiymətinin 3-4 dəfə azalması ilə bağlı baş vermiş devalvasiya nəticəsində fiziki şəxslərin xarici valyutada olan kreditləri üzrə onların üzləşdiyi maliyyə itkisini qarşılamaq, o cümlədən, problemli kreditlər məsələsinin həllinə dövlət dəstəyini təmin etmək məqsədilə qərara alıb ki, vaxtı ötmüş kreditlər xüsusi qaydada qiymətləndirilməklə manatla ödəniləcək.
Bununla yanaşı, fərmanda o da əks olunub ki, güzəştlər həm dollar, həm də manatla götürülən kreditlərə aiddir. 17 min manatadək kredit götürmüş vətəndaşlarımız da güzəştlərdən yararlana biləcəklər.
Manatla olan kreditlərə güzəştin şamil olunmasına münasibət bildirən millət vəkili Rüfət Quliyev “Bakı-Xəbər”ə açıqlamasında qeyd etdi ki, Prezidentin problemli kreditlərlə bağlı imzaladığı fərman olduqca möhtəşəmdir. Bu fərman sayəsində insanların devalvasiya nəticəsində yaşadığı sıxıntılar aradan qalxacaq: “Fərmanda dollar və manatla olan kreditlər məsələsi nəzərdə tutulub. Dollarla kredit götürülənlərə devalvasiyanın fərqi ödənəcək. Manatla götürülən kreditlərin qaytarılması üçün yeni şərtlər veriləcək. Kimsə manatla kredit götürüb, hazırda banka 10 mindən çox borcu var və 1 ildən çoxdur ödəyə bilmir. Belə olduğu halda, onun bütün faiz və cərimə borclarının hamısı silinəcək.
Məsələn, vətəndaş manatla kredit götürüb, hazırda banka 15 min manat borcu var və onu ödəməkdə çətinlik çəkir. Bu halda təkcə 15 min manatın özü qalacaq, qalan məbləği ödəmək üçün bank həmin şəxsə 5 il müddətə vaxt verəcək və ildə borca 1 faiz tətbiq edəcək”.
Millət vəkilinin sözlərinə görə, güzəştlər həm dollar, həm də manatla götürülən kreditlərə aiddir. 17 min manatadək kredit götürmüş vətəndaşlarımız güzəştlərdən yararlana biləcəklər.
İqtisadçı-ekspert Pərviz Heydərov bizimlə söhbətində bildirdi ki, problemli kreditlərlə bağlı Prezident İlham Əliyevin imzaladığı fərmanda dollarla götürülən kreditlərlə yanaşı, milli valyuta ilə götürülən kreditlərə də güzəşt şamil olunacaq: “Fərmanda əks olunub ki, məbləği 10 min dollardan çox olmayan bütün xarici valyutada olan kreditlər, eyni zamanda 17 min manatadək kredit götürmüş vətəndaşlarımız da güzəştlərdən yararlana biləcəklər. Manatla olan kreditlərə güzəştin tətbiq olunması məlum fərmanın ikinci hissəsinə aiddir. Fərmanın ikinci hissəsində manatla götürülən kreditlərə güzəştin tətbiq olunması ilə bağlı qeyd edilir ki, bunun üçün dövlət tərəfindən Mərkəzi Banka vəsait ayrılacaq. Eyni zamanda, dollar dəyərində banklara qiymətli kağız veriləcək ki, onların valyuta mövqeyi güzəştlərin tətbiqi ilə əlaqədər pisləşməsin”.
Günel CƏLİLOVA
